ಸಾದ್ ಸೈಮಾಚೊ (- ಎಚ್. ಮನೋಜ್ ಜೆ)

[ಕವಿತಾ] ಸಾದ್ ಸೈಮಾಚೊ  (- ಎಚ್. ಮನೋಜ್ ಜೆ)

ಯುಗಾಂ ಯುಗಾಂನಿ ಮನಶಾಕ್ ಸರ್ವ್ ರಿತಿನ್ ಜಿಯೆಂವ್ಕ್ ಕುಮೊಕ್ ಕೆಲ್ಲೆಂ ಸಯ್ಮ್ ಆತಾಂ ಮನಶಾಕ್ ಅಪಲ್ಯಾ ಕರ್ನೆಂಚೆರ್ ನಿಯಾಳ್ ಕರುಂಕ್ ದಿತಾ ಮ್ಹಳ್ಳೆಂ ಚಿಂತಪ್ ದಿಂವ್ಚಿ ಕವಿತಾ ಹಿ. ಕಾಂಯ್ ಮನಿಸ್ ಜೊ ಕೊಣಾಕ್‌ಚ್ ಆಯ್ಕಾನಾಸ್ಚೊ, ಕೊಣಾಥಾವ್ನ್‌ಚ್ ಶಿಕಾನಾಸ್ಚೊ, ಅಪುಣ್‌ಚ್ ವರ್ತೊ ಮ್ಹಳ್ಳೆ ಚಿಂತಪಾಚೊ ಹಂಕಾರಿ ಕಾಂಯ್ ಸಯ್ಮಾಥಾವ್ನ್ ಶಿಕುಂಕ್ ಸಕ್ತಾ? ಹೆಂಚ್ ವ್ಹಡ್ ಪ್ರಶ್ನ್.

[ಕವಿತಾ] ಸಾದ್ ಸೈಮಾಚೊ  (- ಎಚ್. ಮನೋಜ್ ಜೆ)

ಸಾದ್ ಸೈಮಾಚೊ 

ರಾವಾತ್ ಥಾಂಬಾತ್ ಆಯ್ಕಾತ್

ಹೆಂ ಕೊಣಾಚೆಂ ರುದನ್

ಜಾಲಾಂ ಕೊಣಾಕ್ ಲಾಗೂನ್

ಆಯ್ಕಾತ್ ಕಾನ್ ದಿವ್ನ್

ಸೈಮಾ ಕುಸ್ತಾರ್ ಮಿರಯ್ಲೊ ಝೆತ್

ಸಾಂಬಾಳ್ ಕರುಂಕ್ ತಿಕಾ ದಿಲೊನಾ ಹಾತ್

ಸ್ವಾರ್ಥ್ ಸಾದ್ಪ್ಯಾನಿ ಕೆಲೊ ಘಾತ್

ಸಮ್ಜೂನ್ ಸೈಮಾಕ್ ಬಾಪಾಯ್ಚೊ ಫಾತ್

ಧರ್ತರೆನ್ ಘೆತ್ಲ್ಲೆ ಕುಶೀಂತ್

ದವ್ರ್ಲ್ಲೊ ಆಮ್ಚೆರ್ ಮಾಯೆಚೊ ಹಾತ್

ಆಮಿ ಮಾತ್ ಲಾಯ್ಲಿ ಸೈಮಾಚಿ ವಾಟ್

ರಡ್ಟಾ ಆತಾಂ ಭುರ್ಗಿಂ ಬಾಳಾ ದೀಸ್ ರಾತ್

ಜಾಣ್ಟ್ಯಾಂನಿ ಪುಜ್ಲೆಲಿ ತೀಕಾ

ಮಾನೂನ್ ಧರ್ತರಿ ಮಾಯ್

ಜಣ್ ಎಕ್ಲ್ಯಾಕ್ ತಿ ಜಾಯ್

ತಿ ಫಕತ್ ಸರ್ವಸ್ವ್ ದಿತಾ

ಮಾಗೀನಾ ಕೆನ್ನಾಚ್ ಕಾಂಯ್

ಆತಾಂ ತರಿ ಸಾದೂರ್ ಜಾವ್ನ್

ಸೈಮಾಚಿ ಘೆವ್ಯಾ ಜತ್ನಾಯ್

ರಾಖುಯಾ ಮಾಯೆಚೆಂ ದಾಯ್ಜ್

ಗಳೊವ್ನ್ ಘಾಮಾಚ್ಯೊ ಪಾವ್ಳ್ಯೊ ಆಯ್ಜ್

ಇಬಾಡ್ ಕೆಲ್ಯಾ ತೀಚಿ ಕುಸ್

ಕರುನ್ ಪರ್ಯಾವರಣಾಚೊ ವಿಧ್ವಂಸ್

ಕಶ್ಟಾ ಧಾಗ್ಯಾರ್ ಗುಂಥ್ಯಾಪರತ್

ಪಿಕಾ ಮೊತ್ಯಾಂಚಿ ಮಾಳ್

ತೀಚೊ ಸಾದ್ ಆಯ್ಕಲೊನಾ

ಮನೀಸ್ ತಿಗೊವ್ಕ್ ಪಾವ್ಚೊನಾ

ಸ್ವಾಸ್ ಘೆವಂಕ್ ಉರ್ಚೊನಾ

ದೆಖೂನ್

ರಾವಾತ್ ಥಾಂಬಾತ್ ಆಯ್ಕಾತ್

ಸಾಯ್ಬಾನೊ ಹೊ ಸೈಮಾಚೊ ಸಾದ್

- ಎಚ್. ಮನೋಜ್ ಜೆ. [ಜ್ಯೂನ್, 2020]