ಎಕಾ ಫೊಂಡಾಚಿ ಕಥಾ

ಹೆ ಫೊಂಡ್ ರಸ್ತ್ಯಾಚೆ ಮಾತ್ ನ್ಹಯ್, ರಾಜಕೀಯ್, ಸಾಮಾಜಿಕ್ ಚಿಂತ್ಪಾಚೆ ಫೊಂಡ್, ಜೆ ’ಪಾವ್ಸ್’ ಮ್ಹಳ್ಳ್ಯಾ ಕಾಳಾರ್ ಅಪ್ಲೆಂ ತೋಂಡ್ ಉಸವ್ನ್ ಮೊರ್ನಾಚೆ ಪಾಕಾಟೆ ಫುಲವ್ನ್ ಬಸ್ತಾತ್. ಹೊ ಬೊಂಗೊಸ್ತೊಳ್ ಫಕತ್ತ್ ಮಂಗ್ಳುರ್ಚ್ಯಾ ರಸ್ತ್ಯಾಂಚೊ ಮಾತ್ ನ್ಹಯ್, ಅಖ್ಖ್ಯಾ ದೇಸಾಚ್ಯಾ ಚಡ್ತಾವ್ ರಸ್ತ್ಯಾಂಚೊ. ಹೆಚ್ಚ್ ಫೊಂಡಾಕ್ ಪಡುನ್ ಜಾಯ್ತ್ಯಾಂನಿ ಜಾಯ್ತೆಂ ಹೊಗ್ಡಾಯ್ಲಾಂ.

ಸಂಯ್ಬಾನ್ ಕಾಣ್ಯೆಗಾರ್ ಜಾವ್ನ್ ಕವಿತಾ ಬರಯ್ತೆಲ್ಯಾಂ ಪಯ್ಕಿಂತ್ಲೊ ವಾಲ್ಟರ್ ದಾಂತಿಸ್ ಎಕ್ಲೊ. ಸಮಾಜಿಕ್ ಕಿರ್ಕೊಳ್ ಕರ್ನೆವಿರೋದ್ ಧಯ್ರಾನ್ ವಿಡಂಬನಾತ್ಮಕ್ ರಿತಿಚೊ ಆವಾಜ್ ಕರ್ಚಿ ಮುಳಾವಿ ಜವಾಭ್ದಾರಿ ಎಕಾ ಕವಿಚಿ. ಆನಿ ಹ್ಯೇ ಕವಿತೆಂತ್ ಸಯ್ತ್ ತಿಚ್ಚ್ ಜವಾಭ್ದಾರಿ ಕವಿನ್ ಸಾಂಭಾಳ್ಳ್ಯಾ ಮ್ಹಣ್ಯೆತಾ.

ಎಕಾ ಫೊಂಡಾಚಿ ಕಥಾ

ರಸ್ತ್ಯಾ ಮದೆಗಾತ್ ನಿದ್ಲಾ ತೊ ಫೊಂಡ್

ಪಾವ್ಸಾಕ್ ಭಿಜೊನ್, ವೊತಾಕ್ ಕರ್ಪೊನ್

ದೀಸ್ ವೆತಾಂ ವೆತಾಂ ವಾಡೊನ್‍ಚ್ ಯೆತಾ!

ಗ್ರೇಸ್ತಾಂಚಿ ಮರ್ಸಿಡಿಸ್ ಕಾರಾಂ,

ದುಬ್ಳ್ಯಾಂಚಿ ಪರ್ಕಟ್ ಸ್ಕೂಟಾರಾಂ

ಅಂಟಿಚೆಂ ಟ್ರಿಬಲ್ ರೈಡ್ ಕೈನೆಟಿಕ್

ತರ್ನ್ಯಾ ಜೊಡ್ಯಾಂಚೆ ನವೆಂಚ್ ಬೈಕ್

ಹರ್ಯೆಕ್ಲ್ಯಾನ್ ಹ್ಯಾ ಪೊಂಡಾಚಿ ಗುಂಡಾಯ್ ಮೆಜ್ಲ್ಯಾ!

ಪಾವ್ಸ್ ಪಡ್‍ಲ್ಲೆಂಚ್ ತೊ ಭರ್ಲೊ ಆಸೊ

ಉಪ್ರಾಂತ್‍ಚ್ ಸುರು ಸರ್ವ್ ತಮಾಸೊ!

ಕೊಣ್ ಹಾಂತುನ್ ಕೆಂಳ್ಬೊ ಲಾಯ್ತಾ,

ಕೊಣ್ ಎಕ್ಲೊ ಮಾಸ್ಳಿ ಧರ್ತಾ!

ಪರ್ನ್ಯಾ ಪೊಂಡಾಚೆ ನಾಂವ್ ಗಾವಾಂರ್ ಗಾಜ್ತಾ!

ದುಸ್ರ್ಯಾಚ್ ದಿಸಾ ಫೊಂಡಾಂತ್ ಫಾತೊರ್ ಭರ್ಲೆ

ಕೊರ್ಪೊರೇಟಾರಾನ್ ಮುಕಾರ್ ರಾವೊನ್ "ಸೆಲ್ಫಿ" ಮಾರ್ಲೆ!

ಮುಕ್ಲ್ಯಾ ಪಾವ್ಸಾಕ್‌ಚ್ ಸರ್ವ್ ಫಾತರ್ ಖಿರ್‍ಲೆ ಅನಿ ಜಿರ್‍ಲೆ!

ಫೊಂಡಾಂತ್ ಪರ್ತ್ಯಾನ್ ಉದಾಕ್ ಭರ್ಲೆಂ.

ಸನಿಗೆಲ್ಲ್ಯಾಕ್ ಕೊರ್ಪೊರೇಟಾರಾಚೆಂ ಕಾರ್‌ಚ್ ಥೈಂ ರೊಂಬ್ಲೆಂ!!

- ವಾಲ್ಟರ್ ದಾಂತಿಸ್ [ನವೆಂಬರ್, 2016]

ವಾಲ್ಟರ್ ದಾಂತಿಸ್: ಏಕ್ ಕಾಣ್ಯೆಗಾರ್, ಅಪ್ರೂಪ್ ಕವಿ, ಲೇಖಕ್, ಚಿಂತ್ಪಿ, ವಾವ್ರಾಡಿ ಆನಿ ಸರ್ವಾಂಚ್ಯಾಕೀ ಚಡ್ ಜಾವ್ನ್ ಕೊಂಕ್ಣಿ ವಾವ್ರ್ ಕರ್ತೆಲ್ಯಾಂಕ್ ಪಾಟಿಂಬೊ ದಿಂವ್ಚ್ಯಾ ಹಾಚೊ ಕವಿತಾಜಮೊ ’ನಿದೊನ್ ಪಡ್‌ಲ್ಲೊ ಗಾಂವ್’ ಬೂಕ್ ಪರ್ಗಟ್ಲಾ. ಸದ್ದ್ಯಾಕ್ ಬಾಹ್ರೇಯ್ನಾಂತ್ ವಸ್ತಿ ಕರ್ಚೊ ಹೊ ’ಕೊಂಕ್ಣಿ ಕುಟಾಮ್’ ಚೊ ಸಕ್ರಿಯ್ ಸಾಂದೊ ಜಾವ್ನಾಸಾ.