Konkani Beyond Scripts

ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ (ಲಿಪಿಭಾಯ್ಲಿ ಕೊಂಕಣಿ)

ವೆಳಾಚಿಂ ರೊದಾಂ ಫುಡೆಂ ಗೆಲ್ಲೆಪರಿಂ ಆಮಿಂ ಸಯ್ತ್ ಆಮ್ಚಿಂ ಪಾವ್ಲಾಂ ಪಾಟಿಂ ವ್ಹರ್ಚಿಂ ನ್ಹಯ್ ಬಗಾರ್ ಮುಕಾರ್ ವರ್ಚಿ ಗರ್ಜ್ ಆಸಾ. ಕೊಂಕಣಿ ಸಾಹಿತ್ಯಾಚೊ ದರ್ಜೊ ಹೆರ್ ಸಮಕಾಳೀನ್ ಭಾಸಾಂ ಸಮೊರ್ ಖಂಚ್ಯಾ ಪಾಂವ್ಡಾರ್ ಆಸಾ ತೆಂ ಅಧುರೆಂ ಸವಾಲ್. ಪುಣ್ ಕೊಂಕಣಿಂತ್ ಆಸ್ಚೆಂ ಸಾಹಿತ್ಯ್ ಸರ್ವ್ ಖಚ್ರೊ ನ್ಹಯ್ ಮ್ಹಳ್ಳೆಂ ಹಾಂವ್ ಮಾಂದುನ್ ಘೆತಾಂ. ಆಜ್ ಆಮಿ ಡಿಜಿಟಲ್ ಕಾಳಾರ್ ಜಿಯೆವ್ನ್ ಆಸಾಂವ್. ಅಜೀಕ್ ಶೆಂಭೊರ್ ವರ್ಸಾಂ-ಧಿಂ ಚಡ್ತಾವ್ ಘರಾಂನಿ ಕರೆಂಟ್ ಸಯ್ತ್ ನಾತ್ಲೆಂ. ಪುಣ್ ತ್ಯಾ ಪರಿಸ್ಥಿತೆಂತ್ ಸಯ್ತ್ ಕೊಂಕಣಿ ಸಾಹಿತ್ಯ್ ರಚನ್ ಜಾಲಾಂ. 1889 ಇಸ್ವೆಂತ್ ’ಪುಣೆಂತ್’ ರೋಮಿ ಲಿಪಿಚ್ಯಾ ಕೊಂಕಣಿಂತ್ ಪತ್ರಕಾರಿತೆಚಿ ಸುರ್ವಾತ್ ಜಾಲ್ಲಿ (ಉದೆಂತಿಚೆಂ ಸಾಳಕ್). 1912 ಇಸ್ವೆಂತ್ ಕನ್ನಡ ಲಿಪಿಚ್ಯಾ ಕೊಂಕಣಿಂತ್ ಪತ್ರಕಾರತಾ ಸುರ್ವಾತ್ಲಿ (ಕೊಂಕಣ್ ದಿರ್ವೆಂ). 1934 ಇಸ್ವೆಂತ್ ದೇವ್‌ನಾಗರಿ ಲಿಪಿಚ್ಯಾ ಕೊಂಕಣಿಂತ್ ಪತ್ರಕಾರತಾ ಸುರ್ವಾತ್ಲಿ (ನೊವೆಂ ಗೊಂಯೆಂ). ಹ್ಯೇ ಉಪ್ರಾಂತ್ ಕೊಂಕಣಿ ಸಾಹಿತ್ಯಿಕ್ ಶೆತಾಂತ್ ಖೂಬ್ ರಿತಿಚೆಂ ಸಾಹಿತ್ಯ್ ಉಭ್ಜಲಾಂ; ಧಾರ್ಮಿಕ್ ಸಾಹಿತ್ಯ್, ಗದ್ಯ್-ಸಾಹಿತ್ಯ್; ಕಥಾ, ಕಾದಂಬರಿ, ಲೇಖನಾಂ, ಒಳೊಕ್... ಆನಿ ಪದ್ಯ್-ಸಾಹಿತ್ಯ್; ಕವಿತಾ, ಕಾಂತಾರಾಂ/ಪದಾಂ... 

ಕೊಂಕಣಿ ಸಾಹಿತ್ಯ್ ಉಭ್ಜಾಯಿಲ್ಲೆ ಚಡ್ತಾವ್ ಆಸುಂ ವಾ ತೆಂ ಸಾಹಿತ್ಯ್ ಛಾಪ್ಲಲೆ ಆಸುಂ, ಚಡ್ತಾವ್ ಕೊಣ್‌ಯೀ ಇಸ್ಕೊಲಾಂನಿ ಕೊಂಕಣಿ ಭಾಸ್ ಶಿಕೊನ್, ಬರಂವ್ಕ್ ಶಿಕ್ಲಲೆ ನ್ಹಯ್. ಪುಣ್ ವೆಳಾಕಾಳಾನುಸಾರ್ ಪ್ರಾಂತೀಯ್ ಬರ್ಪಾಚಿ ರೀತ್ (Orthography) ಪಾಳುನ್ ಆಯಿಲ್ಲೆ. ಪ್ರಾಂತೀಯ್ ಪ್ರಭಾವಾಕ್ ಲಾಗೊನ್ ಗೊಂಯಾಂತ್ ಮರಾಠಿ, ಕರ್ನಾಟಕಾಂತ್ ಕನ್ನಡ, ಕೆರಳಾಂತ್ ಮಲಯಾಳಮ್, ತಶೆಂಚ್ ಮಹಾರಾಷ್ಟ್ರಂತ್ ಹಿಂದಿ/ಮರಾಠಿ ಭಾಸೆಚಿಂ ಉತ್ರಾಂ ಸಯ್ತ್ ಸಹಜ್ ರಿತಿನ್ ಕೊಂಕಣಿಂತ್ ರಿಗ್ಲಿಂ. ತೆಚ್‌ಪರಿಂ ಬರ್ಪಾಚಿ ರೀತ್ ಸಯ್ತ್ ವೆಗ್ಳಿ ಜಾಲಿ. ಎಕಾ ವಿಸ್ತಾರಿತ್ ಭಾಸೆಂತ್ ಹೆಂ ಸಾಮಾನ್ಯ್. ಪುಣ್ ಆಜ್ ಗೊಂಯಾಂತ್ ತಶೆಂ ಮಂಗ್ಳುರಾಂತ್ ಕೊಂಕಣಿ ಬರ್ಪಾರೀತ್ ಶಿಕಯ್ತಾತ್ ಆನಿ ಶಿಕ್ಚಿಂ ಜಾಯ್ತಿಂ ವಿಧ್ಯಾರ್ಥಿಂ ಆಸಾತ್. ಪುಣ್ ಪಾಟ್ಲ್ಯಾ ಧಾ-ಭಾರಾ ದಶಕಾಂನಿ ಆಸ್ಲೊ ಏಕ್ ಊಣ್ ಜಾವ್ನಾಸ್ಲೊ ’ಅಧ್ಯಯನ್’. ಹ್ಯಾ ವಿಶಯಾಚೆರ್ ಥೊಡೊ ನಿಯಾಳ್ ಕರುಯಾಂ:

ಹಾಂವ್ ಆತಾಂ ಏಕ್ ವಿಧ್ಯಾರ್ಥಿ ಜಾವ್ನ್ ಸಮಗ್ರ್ ಕೊಂಕಣಿಂತ್ಲೆಂ ಸಾಹಿತ್ಯ್ ಅಧ್ಯಯನ್ ಕರುಂಕ್ ಆಶೆತಾಂ ದೆಕುನ್ ಮ್ಹಾಕಾ ಸಮಗ್ರ್ ಕೊಂಕಣಿಂತ್ (ಫಕತ್ ಎಕಾ ಲಿಪಿಕ್/ಎಕಾ ಪ್ರಾಂತ್ಯಾಕ್ ಸೀಮಿತ್ ಜಾಯ್ನಾಸ್ಚಿಂ) ಆಸ್ಚಿಂ ಪುಸ್ತಕಾಂ ಕಿತ್ಲಿಂ? 
2006 ಇಸ್ವೆಂತ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ’20ವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕಥಾ’, ತಶೆಂಚ್ 2008 ಇಸ್ವೆಂತ್ ’ಸುರ್ಯೊ ಉದೆತಾ’ ಪುಸ್ತಕಾಂನಿ ಗೊಂಯ್, ಕರ್ನಾಟಕ್, ಮಹಾರಾಷ್ಟ್ರ್, ಕೇರಳಾ ತಶೆಂಚ್ ಪರ್ಗಾಂವಾಂತ್ಲ್ಯಾ ಕಥಾಕಾರಾಂಚ್ಯೊ ಕಥಾ ವಾಚುಂಕ್ ಮೆಳ್ತಾತ್; ತ್ಯೊ ಕನ್ನಡ, ದೇವ್‌ನಾಗರಿ, ರೊಮಿ ಲಿಪಿಂತ್ ಬರಯಿಲ್ಲ್ಯೊ. ಅಶೆಂ ಕೆಲ್ಲೆವರ್ವಿಂ ಸಮಗ್ರ್ ಕೊಂಕಣಿ ಸಾಹಿತ್ಯಾಚೆಂ ತ್ರಾಣ್ ಸಮ್ಜುಂಕ್ ಸಲೀಸ್ ಜಾತಾ. ಕವಿತೆಚಿಂ ಕಾಂಯ್ ಥೊಡಿಂ ಪುಸ್ತಕಾಂ ಆಸ್ಲಿಂ ಮ್ಹಳ್ಳೊ ಆಡ್ವಾದ್ ಹಾಂಗಾಸರ್ ಘೆವ್ಯೆತಾ. ಆಮ್ಚೆಲಾಗಿಂ ಅಕಾಡೆಮಿ ಆಸಾತ್ ಪುಣ್ ಖಂಚ್ಯಾಯ್ ಅಕಾಡೆಮಿಕ್ ಹೆಂ ಕಾಮ್ ಗರ್ಜೆಚೆಂ ಮ್ಹಣ್ ಭಗಾನಾಸ್ಚೆಂ ಮ್ಹಾಕಾಚ್ ವಿಜ್ಮಿತ್ ಕರ್ತಾ. ಏಕ್ ಥಂಯ್ ಹಾಂಗಾ ಅಪ್ರೂಪಾಯೆನ್ ಏಕ್-ದೋನ್ ಸಾಹಿತ್ಯಿಕ್ ಅಧ್ಯಯನಾಚಿಂ ಪುಸ್ತಕಾಂ ಕೊಂಕಣಿಚ್ಯಾ ಶೆಂಬೊರ್ ವರ್ಸಾಂಚ್ಯಾ ಇತಿಹಾಸಾಂತ್ ಆಮ್ಕಾಂ ಪಳೆಂವ್ಕ್ ಮೆಳ್ತಾತ್. ಆತಾಂ ಆಮ್ಚೆಲಾಗಿಂ ತಾಂತ್ರಿಕತಾ ಆಸಾ ತರ್‌ಯೀ ಆಮ್ಚ್ಯಾ ದೊಳ್ಯಾಂನಿ ಕಿತ್ಯಾಕ್ ಕ್ಯಾಟರಕ್ಟ್? ಹೆಂ ಸವಾಲ್ ಮ್ಹಾಕಾ ಕಾಂಯ್ ತೆಂಪಾಥಾವ್ನ್ ಧೊಸುನ್ ಆಸ್ಲೆಂ. ಸಾಮಾಜಿಕ್ ಪರಿಸ್ಥಿತಿ ಅಶಿ ಆಸಾ ಮ್ಹಳ್ಯಾರ್ ಆಮಿ ಆತಾಂ ಪೊಸ್ಟ್ ಟ್ರುಥ್ (Post-Truth) ಕಾಳಾಂತ್ ಜಿಯೆವ್ನ್ ಆಸಾಂವ್. ಹಾಂಗಾಸರ್ ಪ್ರೊಪಾಗೆಂಡಾಚ್ ರಾಜ್ವಟ್ಕಿ ಚಲಯ್ತಾ. ಸಮಾಜಿಕ್ ಮಾಧ್ಯಮಾಂನಿ ಜಿಂ ಕೊಣ್ ಜಿತ್ಲ್ಯಾ ಮಾಪಾನ್ ಪ್ರೊಪಾಗೆಂಡಾ ಚಲಂವ್ಕ್ ಸಕ್ತಾ, ತೆಂಚ್ ಸತ್ ಜಾಲಾಂ. ತಾಕಾ ಪಾಟಿಂಬೊ ದಿಂವ್ಚಿಂ ವಾಟ್ಸಾಪ್ ಮಹಾವಿಧ್ಯಾಲಯಾಂ. ಪುಣ್ ಸಾಹಿತ್ಯ್ ಮ್ಹಳ್ಯಾರ್ ವೆಗ್ಳೆಂಚ್. ಹ್ಯಾ ಪ್ರೊಪಾಗೆಂಡಾಂನಿ ಸಾಹಿತ್ಯಾಕ್ ಸಯ್ತ್ ಕದ್ವಳ್ ಕರುಂಕ್ ಪಾಟಿಂ ಸರಾನಾಸ್ಚಿಂ ಉಗ್ತ್ಯಾನ್ ಮಿರಂವ್ಚೊ ಕಾಳ್ ಹೊ. 

ಹ್ಯಾ ಖಂಚ್ಯಾಯ್ ಅಡ್ಕಳೆಂನಿ ಆಮಿ ಆಮ್ಚೊ ದಿಶ್ಟಾವೊ ಸಾಂಬಾಳುಂಕ್ ಆಸಾ. ಆಮಿ ಹ್ಯಾ ಕಾಳಾಕ್ ಪ್ರತಿನಿಧಿತ್ವ್ ಕರುನ್ ಆಸಾಂವ್ ಮ್ಹಣ್ತಚ್ ಆಮ್ಚಿ ಜವಾಭ್ದಾರಿ ಜಾವ್ನಾಸಾ ಆಮ್ಚ್ಯಾ ತಾಂಕಿಚೊ ವಾವ್ರ್ ಆಮಿ ಕರ್ಚೊ. ಹ್ಯಾ ದಿಶೆನ್ ಮ್ಹಾಕಾ ದಿಸ್ಚೆಂ ಭೊವ್ ಗರ್ಜೆಚೆಂ ತಶೆಂಚ್ ಭೊವ್ ತ್ರಾಸಾಚೆಂ ಕಾಮ್ ’ಸಮಗ್ರ್ ಕೊಂಕಣಿ ಸಾಹಿತ್ಯಾಚೆಂ ಲಿಪ್ಯಂತರಣ್ ಆನಿ ಡಿಜಿಟಲೀಕರಣ್’. ಹ್ಯಾ ಚಿಂತ್ಪಾಂತ್ ಉದೆಲ್ಲೆಂ ಮಿಸಾಂವ್ ಜಾವ್ನಾಸಾ ’ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ (ಲಿಪಿಭಾಯ್ಲಿ ಕೊಂಕಣಿ)’.

ದಿಶ್ಟಾವೊ: 
ಕೊಂಕಣಿ ಸಾಹಿತ್ಯಾ ಖಾತೀರ್ ಎಕ್ ಎಕಾತ್ರಿತ್ ಆನೀ ಸಗ್ಳ್ಯಾಂಕ್ ಸಹಜ್ ಉಪಲಬ್ಧ್ ಜಾಂವ್ಚೆಂ ಡಿಜಿಟಲ್ ಪರಿಸಂಸ್ಥಾ ಉಭಾರ್ಚೆಂ, ಭಾಶೆಚ್ಯಾ ಆನಿ ಲಿಪಿಚ್ಯಾ ಅಡ್ಕಾಳ್ಯಾಂಕ್ ನಿವ್ರಾಂವ್ಚೆ ಸಾಂಕವ್ ಭಾಂದ್ಚೆಂ, ತಶೆಂಚ್ ಫುಡ್ಲ್ಯಾ ಜನಾಂಗಾಕ್ ಉಪ್ಕಾರಾಕ್ ಪಡ್ಚೆಂ ಸಾಹಿತ್ಯ್ ಜೊಗಾಸಾಣೆನ್ ಸಾಂಬಾಳುನ್ ದವರ್ಚೆಂ.

ಮಿಸಾಂವ್:
ರೊಮಿ, ಕನ್ನಡ ಆನಿ ನಾಗರೀ ಹ್ಯಾ ಲಿಪಿಂಚೊ ಸಮಾವೆಶ್ ಕರೂನ್, ವೆಗ್‌ವೆಗಳ್ಯಾ ಲಿಪಿಂತಲೆಂ ಕೊಂಕಣಿ ಸಾಹಿತ್ಯ್ ಡಿಜಿಟಲೀಕರಣ್ ಕರುನ್ ತಾಚಿ ಜತನ್ ಕರ್ಚೆಂ.
ಲಿಪಿಂಚ್ಯೊ ಗಡಿ ಉತ್ರೊಂಕ್ ಸಲೀಸ್ ಕರುನ್ ಸಲೀಸಾಯೆರ್ ಹೆರ್ ಲಿಪಿಂತ್ಲ್ಯಾ ಕೊಂಕಣಿ ಸಾಹಿತ್ಯಾಚಿ ಉಪಲಬ್ಧ್ ಕರ್ಚಿಂ ವ್ಯಾಸ್‍ಪೀಠಾಂ ತಯಾರ್ ಕರ್ಚೆಂ.
ಸಾಹಿತ್ಯಾ ಮುಖಾಂತ್ರ್ ವೆವೆಗ್ಳ್ಯಾ ಕೊಂಕಣಿ ಬೊಲಿ-ಸಮುದಾಯಾಂಕ್ ಮೆತೆರ್ ಕರ್ಚಿಂ ಸಮಾವೆಶಾಂ ಆಸಾ ಕರ್ಚೆಂ.
ಬಹುಲಿಪಿ ಕೊಂಕಣಿ ಅಭ್ಯಾಸಾಂತ್ ಸಂಶೊಧನ್, ಲಿಪ್ಯಂತರಣ್ ಆನಿ ಶೈಕ್ಷಣಿಕ್ ಸಹಭಾಗಾಕ್ ಪ್ರೊತ್ಸಾಹನ್ ದಿಂವ್ಚೆಂ.
ಡಿಜಿಟಲ್ ಸಾಧನಾಂ ವರ್ವಿಂ ನವ್ಯಾ ಪಿಳ್ಗೆಕ್ ಕೊಂಕಣಿ ಭಾಶೆಚೊ ಆನಿ ಸಂಸ್ಕೃತೀಚೊ ಅಭ್ಯಾಸ್, ಸಂವರ್ಧನ್ ಆನಿ ಸಾತತ್ಯ್ ರಾಕಂವ್ಚಾಕ್ ಸಕ್ಷಮ್ ಕರ್ಚೆಂ.

ಆಮಿ ಕೊಣ್?

ಆಶಾವಾದಿ ಪ್ರಕಾಶನ್ ಪಾಟ್ಲ್ಯಾ ಥೊಡ್ಯಾ ತೆಂಪಾಥಾವ್ನ್ ಹ್ಯಾ ದಿಶೆನ್ ಕಾಮ್ ಕರ್ನ್ ಆಸಾ. ಆತಾಂ ಆಶಾವಾದಿ ಪ್ರಕಾಶನಾಸವೆಂ ಸಮ್ಜಿಕಾಯೆಚೊ ಖರಾರ್ MOU (Memorandum of Understanding) ಕರುನ್ ಜೊಡ್ ಭಾಗಿದಾರ್ ಜಾವ್ನಾಸ್ಚಿಂ ಮಹಾವಿಧ್ಯಾಲಯಾಂ; 
1. ಸೈಂಟ್ ಝೇವಿಯರ್ಸ್ ಮಹಾವಿಧ್ಯಾಲಯ್ - ಮಾಪ್ಸಾ, ಗೊಂಯ್.
2. ಡಿ.ಸಿ.ಟಿ-ಚೆಂ ಧೆಂಪೆ ಮಹಾವಿಧ್ಯಾಲಯ್ (ಪರಿಗಣಿತ್) - ಮಿರಾಮಾರ್, ಗೊಂಯ್
ಸಹಭಾಗಿತ್ವ್ ಕರ್ತಾತ್;
1. ಗೊಂಯ್ ಕೊಂಕಣಿ ಅಕಾಡೆಮಿ
2. ದಲ್ಗಾದೊ ಕೊಂಕಣಿ ಅಕಾಡೆಮಿ
3. ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿ

ಅಗೊಸ್ತ್ 2026 ಥಾವ್ ಅಗೊಸ್ತ್ 2029 ಪರ್ಯಾಂತ್ ಹೆಂ ಮಿಸಾಂವ್ ಹಿಂ ಸರ್ವ್ ಕಾಮಾಂ ಕರ್ಚಿ ಯೆವ್ಜಣ್ ಘಾಲ್ಯಾ;
1. ನಿಯಮಿತ್ ಅಧ್ಯಯನ್ ಕಾಮಾಸಾಳಾಂ (ವೆವೆಗ್ಳೆ ವಿಶಯ್, ಲಿಪ್ಯಂತರಣ್ ಹಾಂತುಂ ಆಟಾಪ್ತಾತ್)
2. ಪುಸ್ತಕ್ ಲಿಪ್ಯಂತರಣ್ (ಎಕಾ ಲಿಪಿಥಾವ್ನ್ ಅನ್ಯೆಕಾ ಲಿಪಿಂತ್ ಲಿಪ್ಯಂತರ್ ಕರ್ಚೆಂ)
3. ಇ-ಪುಸ್ತಕಾಂ, ಆ-ಪುಸ್ತಕಾಂ, ವಿ-ಪುಸ್ತಕಾಂ. 
4. ಪುಸ್ತಕ್ ಪರ್ಗಟ್ಣಿ (ಕನ್ನಡ, ನಾಗರಿ ಆನಿ ರೊಮಿ ಲಿಪಿಂನಿ)
5. ಸಮಾವೆಶಾಂ (ಭಾಸ್, ಲಿಪಿ ಆನಿ ಸಾಹಿತ್ಯಾಕ್ ಲಗ್ತಿ ಜಾಲ್ಲಿಂ)

ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ (ಕೆ.ಬಿ.ಎಸ್.) ಪಂಗಡ್ (ಸಲ್ಹಾ-ಸಮಿತಿಂತ್)
1. ಬಾಪ್. ದೊ. ಲುವಿಸ್ ಗೊಮ್ಸ್ (ಸೈಂಟ್ ಝೇವಿಯರ್ಸ್ ಮಹಾವಿಧ್ಯಾಲಯ್, ಮಾಪ್ಸಾ - ಗೊಂಯ್)
2. ಬಾಯ್. ಅಂಜು ಸಾಖರ್‌ದಾಂಡೆ (ಧೆಂಪೆ ಮಹಾವಿಧ್ಯಾಲಯ್, ಮಿರಾಮಾರ್ - ಗೊಂಯ್)
3. ದೊ. ಚಂದ್ರಲೇಖ ಡಿಸೊಜ್ (ಕೊಂಕಣಿ ವಿಭಾಗಾಚಿ ನಿವೃತ್ ಮುಖೆಸ್ತ್ - ಗೊಂಯ್ ಮಹಾವಿಧ್ಯಾಲಯ್)
4. ಆಂಡ್ರ್ಯೂ ಎಲ್. ಡಿಕುನ್ಹಾ (ನಾಮ್ನೆಚೊ ಸಾಹಿತ್ಯಿಕ್ ಸಮೀಕ್ಷಕ್, ಕವಿ - ಮಂಗ್ಳುರ್)
5. ವಿಲ್ಲಿ ಗೊಯೆಸ್ (ನಿವೃತ್ ಪ್ರಿನ್ಸಿಪಾಲ್, ನಾಮ್ನೆಚೊ ಸಾಹಿತ್ಯಿಕ್ - ಗೊಂಯ್)
6. ಶೈಲೆಂದ್ರ ಮೆಹ್ತಾ (ಸಂಪಾದಕ್, ವರ್ಣಮುದ್ರ)

ಕೆ.ಬಿ.ಎಸ್. ಮುಖೆಸ್ತ್: ವಲ್ಲಿ ಕ್ವಾಡ್ರಸ್ (ಪ್ರಾಧಾನ್ ಸಂಪಾದಕ್: ಆಶಾವಾದಿ ಪ್ರಕಾಶನ್)

ತಾಂತ್ರಿಕ್ ಮಜತ್: ಗ್ಲ್ಯಾಡ್‌ಸನ್ ಗ್ರೆನೋಲ್ಡ್ ಡಿಸೋಜ್, ಯುಕೆ.

ಕೆ.ಬಿ.ಎಸ್. ಮಿಸಾಂವಾಖಾಲ್ ಲೊಕಾರ್ಪಣ್ ಜಾಲ್ಲಿಂ ಪುಸ್ತಕಾಂ

ಕೆ.ಬಿ.ಎಸ್. ಮಿಸಾಂವಾಖಾಲ್ ಲೊಕಾರ್ಪಣ್ ಜಾಲ್ಲಿಂ ಇ-ಪುಸ್ತಕಾಂ
1. ಕಥನ್ (ಕಥಾಪಾಠ್ ಶಿಂಕಳ್ VII ಪ್ರಪತ್ರಾಂ, ನಾಗರಿ): 25 ಜುಲಾಯ್ 2026

ಕೆ.ಬಿ.ಎಸ್. ಮಿಸಾಂವಾಖಾಲ್ ಲೊಕಾರ್ಪಣ್ ಜಾಲ್ಲಿಂ ಆ-ಪುಸ್ತಕಾಂ
1. ಎಡ್ವಿನ್ ಜೆ. ಎಫ್. ಡಿಸೋಜಾಚ್ಯೊ ಕಥಾ (ಆಶಾವಾದಿ ಪ್ರಕಾಶನಾಚೆಂ 14 ವೆಂ ಆ-ಪುಸ್ತಕ್ 
2. ಕ್ಯಾಥರಿನ್ ರೊಡ್ರಿಗಸಾಚ್ಯೊ ಕಥಾ (ಆಶಾವಾದಿ ಪ್ರಕಾಶನಾಚೆಂ 15 ವೆಂ ಆ-ಪುಸ್ತಕ್

ಕೆ.ಬಿ.ಎಸ್. ಮಿಸಾಂವಾಖಾಲ್ ಲೊಕಾರ್ಪಣ್ ಜಾಲ್ಲಿಂ ಪ್ರಿಂಟ್ ಪುಸ್ತಕಾಂ
1. ನವಿ ದಿಶಾ (ಮೊನಿಕಾ ಡೆಸಾ ಮಥಾಯಸ್, ನಾಗರಿ): 25 ಜುಲಾಯ್ 2026 
2. ಕಥನ್ (ಕಥಾಪಾಠ್ ಶಿಂಕಳ್ VII ಪ್ರಪತ್ರಾಂ, ಕನ್ನಡ): 25 ಜುಲಾಯ್ 2026 
3. ಕಥನ್ (ಕಥಾಪಾಠ್ ಶಿಂಕಳ್ VII ಪ್ರಪತ್ರಾಂ, ನಾಗರಿ): 25 ಜುಲಾಯ್ 2026
4. ಕ್ಯಾಥರಿನ್ ರೊಡ್ರಿಗಸಾಚ್ಯೊ ಕಥಾ (ಕ್ಯಾಥರಿನ್ ರೊಡ್ರಿಗಸ್ ಕಟಪಾಡಿ, ನಾಗರಿ): 6 ಸೆಪ್ಟೆಂಬರ್ 2026