Konkani Beyond Scripts

Konknni Beyond Script (Lipibhaili Konknni)

Vellachim rodam fuddem gel'leporim amim soit amchim paulam pattim vhorchim nhoi bogar mukar vorchi gorz asa. Konknni sahiteacho dorzo her somkallin bhasam somor khonchea pamvddar asa tem odhurem soval. Punn konknnint aschem sahity sorv khochro nhoi mholl'llem hamv mandun ghetam. Az ami ddijittol kallar jieun asamv. Ojik xembhor vorsam-dhim choddtavo ghoramni korentt soit natlem. Punn tea poristhitent soit konknni sahity rochon zalam. 1889 isvent ’punnent’ romi lipichea konknnint potrokaritechi survat zal'li (udentichem sallok). 1912 isvent kon'nodd lipichea konknnint potrokarota survatoli (konkonn dirvem). 1934 isvent devo‌nagri lipichea konknnint potrokarota survatoli (novem gõyem). Hye uprant konknni sahityik xetant khub ritichem sahity ubhzolam; dharmik sahity, gody-sahity; kotha, kadombori, lekhnam, ollok... Ani pody-sahity; kovita, kantaram/podam... 

Konknni sahity ubhzayil'le choddtavo asum va tem sahity chhaplole asum, choddtavo konn‌yi iskolamni konknni bhas xikon, borvonk xiklole nhoi. Punn vellakallanusar pranti-i borpachi rit (Orthography) pallun ayil'le. Pranti-i probhavak lagon gõyant moratthi, kornattokant kon'nodd, kerllant moleallom', toxench moharaxttront hindi/moratthi bhasechim utram soit sohoz ritin konknnint riglim. Tech‌porim borpachi rit soit veglli zali. Eka vistarit bhasent hem samany. Punn az gõyant toxem mongllurant konknni borparit xikoitat ani xikchim zaitim vidhearthim asat. Punn pattlea dha-bhara doxkamni aslo ek unn zaunasolo ’odhyoin’. Hea vixeacher thoddo niall koruyam:
hamv atam ek vidhearthi zaun somgr konknnintolem sahity odhyoin korunk axetam dekun mhaka somgr konknnint (fokot eka lipik/eka pranteak simit zainasochim) aschim pustokam kitlim? 

2006 isvent kornattok konknni sahity okaddemin ’20vea xekddeacheo konknni kotha’, toxench 2018 isvent ’sureo udeta’ pustokamni Gõy, Karnatak, Maharastra, Kerala  toxench porgamvantlea kothakarancheo kotha vachunk melltat; teo kon'nodd, devo‌nagri, romi lipint boryil'leo. Oxem kel'leurvim somgr konknni sahiteachem trann somzunk solis zata. Kovitechim kaim thoddim pustokam aslim mholl'llo addvad hangasor gheuyeta. Amchelagim okaddemi asat punn khonchyai okaddemik hem kam' gorjechem mhonn bhoganasochem mhakach vijmit korta. Ek thoim hanga oprupayen ek-don sahityik odhyoinachim pustokam konknnichea xembor vorsanchea itihasant amkam polleunk melltat. Atam amchelagim tantrikota asa tor‍yi amchea dolleamni kiteak keattrokott? hem soval mhaka kaim tempathaun dhosun aslem. Samajik poristhiti oxi asa mhollear ami atam posott ttruth (Post-Truth) kallant jieun asamv. Hangasor propagenddach rajvottoki choloita. Somajik madhyomamni jim konn jitlea mapan propagendda cholvonk sokta, tench sot zalam. Taka pattimbo dimvchim vattsap mohavidhealoyam. Punn sahity mhollear vegllench. Hea propagenddamni sahiteak soit kodvoll korunk pattim soranasochim ugtean miromvcho kall ho. 

Hea khonchyai oddkollemni ami amcho dixttavo samballunk asa. Ami hea kallak protinidhitv korun asamv mhonntoch amchi zovabhodari zaunasa amchea tankicho vaur ami korcho. Hea dixen mhaka dischem bhovo gorjechem toxench bhovo trasachem kam' ’somgr konknni sahiteachem lipyontoronn ani ddijittolikoronn’. Hea chintpant udel'lem misamv zaunasa ’konknni biondd skripott (lipibhaili konknni)’.

Dixttavo: 
Konknni sahitea khatir ek ekatrit ani soglleank sohoz upolbdh zamvchem ddijittol porisomstha ubharchem, bhaxechea ani lipichea oddkalleank nivramvoche sankou bhandchem, toxench fuddlea zonangak upkarak poddchem sahity zogasannen samballun dourchem.

Misamv:
Romi, Kannada ani Nagari hea lipincho somavex korun, veg‌vegllea lipintolem konknni sahity digitise korun tachi zoton korchem.
Lipincheo goddi utronk solis korun solisayer her lipintlea konknni sahiteachi upolbdh korchim veas‍pittham toyar korchem.
Sahitea mukhantr vevegllea konknni boli-somudayank meter korchim somavexam asa korchem.
Bohulipi konknni obheasant sonxodhon, lipyontoronn ani xoikxonnik sohbhagak protsahon dimvchem.
Digital sadhnam vorvim novea pillgek konknni bhaxecho ani somsokriticho obheas, somvrdhon ani sat'ty rakomvchak sokxom' korchem.

Ami Konn?

Ashawadi Prakashan pattlea thoddea tempathaun hea dixen kam' korn asa. Atam Ashawadi Prokaxonasovem somjikayecho khorar MOU (Memorandum of Understanding) korun zodd bhagidar zaunasochim mohavidhealoyam; 
1. St.Xaviers Mohavidhealoi - Mapsa, Gõy.
2. D.C.T-chem Dhempe Mohavidhealoi (Porigonnit) - Miramar, Gõy
Sohbhagitv Kortat;
1. Gõy Konknni Okaddemi
2. Dalgado Konknni Okaddemi
3. Karnataka Konkani Sahity Akademi 

August 2026 thavn August 2029 poreant hem misamv him sorv kamam korchi yeuzonn ghalea;
1. Niymit Odhyoin Kamasallam (vevegolle vixoi, lipyontoronn hantum attaptat)
2. Pustok Lipyontoronn (Eka lipithaun onyeka lipint lipyontor korchem)
3. E-pustokam, A-pustokam, V-pustokam. 
4. Pustok Porgottonni (kon'nodd, nagri ani romi lipimni)
5. Somavexam (bhas, lipi ani sahiteak logti zal'lim)

Konkani Beyond Script (K.B.S.) Pongodd (Solha-Somitint)
1. Bap. Do. Luis Gomes (Saint Zaviers Mohavidhealoi, Mapsa - Gõy)
2. Bai. Anju Sakhardande (Dhempe Mohavidhealoi, Miramar - Gõy)
3. Dr. Chandralekha Dsouza (Konknni Vibhagachi Nivrit Mukhesot - Gõy Mohavidhealoi)
4. Andrew L Dcunha (Namnecho Sahityik Somikxok, Kovi - Mongllur)
5. Willy Goes (Nivrit Prinsipal, Namnecho Sahityik - Gõy)
6. Shailendra Mehta (Sompadok, Varnamudra)

K.B.S. Mukhesot: Valley Quadros (Prodhan Sompadok: Ashawadi Prakashan)

Tantrik Mozot: Gladson Greynold Dsouza, UK.

K.B.S. Misamvakhal Lokarponn Zal'lim Pustokam

K.B.S. Misamvakhal Lokarponn Zal'lim e-Pustokam
1. Kothan (Kothapatth Xinkoll VII  Propotram, Nagari): 25 July 2026

K.B.S. Misamvakhal Lokarponn Zal'lim a-Pustokam
1. Edwin J. F. Dsoza-cheo Kotha (Ashawadi Prakashan-achem 14 vem a-Pustok 
2. Catherine Rodrigues-cheo Kotha (Ashawadi Prakashan-achem 15 vem a-Pustok

K.B.S. Misamvakhal Lokarponn Zal'lim Print Pustokam
1. Novi Disha (Monica Dsa Mathias, Nagari): 25 July 2026
2. Kothan (Kothapatth Xinkoll VII Propotram, kon'noddo): 25 July 2026
3. Kothan (Kothapatth Xinkoll VII Propotram, Nagari): 25 July 2026
4. Catherine Rodrigues-cheo Kotha (Nagari): 6 September 2026