ತವೊ

ಮನಿಸ್ ಮ್ಹಳ್ಳೊ ಅಪ್ಲ್ಯಾ ಸ್ವಾರ್ಥಾಕ್ ಲಾಗುನ್ ಕಶೆಂ ಪರಿಗತೆಚೊ ಉಪೇಗ್ ಕರ್ತಾ, ಜಶೆಂ ಅಮೀಬಾನ್ ಅಪ್ಣಾಭಂವ್ತೊಣಿ ಆಸ್ಚ್ಯಾ ಗಾತ್ರಾಕ್ ಸರಿ ಜಾವ್ನ್ ಅಪ್ಲೊ ಗಾತ್ರ್ ಬದ್ಲಿತಾ ತಶೆಂ ವೆಳಾಕಾಳಾಕ್ ಸರಿ ಜಾವ್ನ್ ಅಪ್ಲೆ ವಿಚಾರ್, ತತ್ವಾಂ, ನಯ್ತಿಕ್ ಮೌಲ್ಯಾಂ ತಶೆಂಚ್ ವೆಕ್ತಿತ್ವ್ ಸಯ್ತ್ ಬದ್ಲಿತಾ. ಆನಿ ಅಪ್ಲೆಂ ಬೊಳ್ಕೆಂ ಭರ್ಚ್ಯಾಕ್ ಹೆರಾಂಚೊ ಉಪೇಗ್ ಕರ್ತಾನಾ, ಹಾತಾಕ್ ಮೆಳ್‌ಲ್ಲೆಂ ಪಾಜ್ತಾ ಆನಿ ಮತಿಕ್ ಆಯಿಲ್ಲೆಂ ತಾಚ್ತಾ. ತಾಂಕಾಂ ತಾಪ್‌ಲ್ಲಿ ಕಾಯ್ಲ್/ತವೊ ಗರ್ಜೆಚೊ ಆಸ್ತಾ ಪುಣ್ ತ್ಯಾ ತವ್ಯಾಚಿ ಫಿಕಿರ್ ಜಾಂವ್, ತವ್ಯಾಪಂದ್ಲ್ಯಾ ಉಜ್ಯಾಚಿ ಕಾಳ್ಜಿ ಜಾಂವ್ ಅಸಲ್ಯಾಂಕ್ ಆಸಾನಾ - ಫಿಕಿರ್ ಆಸ್ತಾ ಫಕತ್ತ್ ಅಪ್ಣಾನ್ ಶೆಕುನ್ ಖಾಂವ್ಕ್ ಆಸ್ಚ್ಯಾ ಭಾಕ್ರೆಚಿ - ಜಿ ಫಾಲ್ಯಾಂ ಗೂ ಜಾವ್ನ್ ವೆಚೆತಸಲಿ.

ಬಾಬ್ ಪರೇಶ್ ನರೇಂದ್ರ ಕಾಮತ್ ಗೊಂಯ್ಚೊ ನಾಮ್ಣೆಚೊ ಕವಿ, ಚಿತ್ರ್‌ಕಾರ್ ತಶೆಂಚ್ ವಿಮರ್ಶಕ್. ಹಾಂಗಾಸರ್ ಅಸಲಿಚ್ಚ್ ಚಿಂತ್ಪಾಚಿ ಕವಿತಾ ಘೆವ್ನ್ ಆಯ್ಲಾ. ಥೊಡ್ಯಾಚ್ ಉತ್ರಾಂನಿ ವಿಣ್ಲಲಿ ಹಿ ಕವಿತಾ ಫಕತ್ ಕಾಣಿ ಆಟಾಪ್ತಾ ಮಾತ್ರ್ ನ್ಹಯ್, ಜೆಮೆಲ್ಲ್ಯಾ ದೊಳ್ಯಾಂಚೆರ್ ವಿಚಾರಾಂಚೆಂ ಥೆಂಬೆ ಶಿಂಪ್ಡಾಯ್ತಾ. ಬಾಕಿಚೆಂ ಮಾಪುಂಕ್ ತುಜೆರ್ ಸೊಡ್ತಾಂ.

ತವೊ

ಕಾಂಯ್ ಜಣಾಂಕ್ ತಾಪಿಲ್ಲೊ ತವೊ ಜಾಯ್ ಆಸ್ತಾ.

ತೆ ಹೆ ವಾಟೆನ್ ಭೊಂವ್ತಾತ್

ತೆ ತೆ ವಾಟೆನ್ ಭೊಂವ್ತಾತ್

ತವೊ ಸೊದ್ತಾತ್

ತಾಂಣಿಂ ಕಾಗದಾನ್ ಗುಠ್ಲಾವನ್ ಪೀಠ್ ಹಾಡಿಲ್ಲೆಂ ಆಸ್ತಾ ಕಾಲೊವ್ನ್

ಬೊಲ್ಸಾಂತ್ ದವ್ರಿಲ್ಲೆಂ ಆಸ್ತಾ

ಆಪಲೀ ಭಾಕ್ರಿ ಭಾಜ್ಪಾಕ್

ತೆ ತಾಪಿಲ್ಲ್ಯಾ ತವ್ಯಾರ್ ಅಚ್ಳಯ್ ಅಪ್ಲಿ ಘೆತಾತ್ ಭಾಜೂನ್

ತಾಂಕಾಂ ತವ್ಯಾಚೆಂ ಪಡೂನ್ ಗೆಲ್ಲೆಂ ನಾಸ್ತಾ

ನಾ ತವ್ಯಾ ಪೊಂದಾ ಪೆಟಿಲ್ಲ್ಯಾ ಉಜ್ಯಾಚೆಂ

ತೆ ಆಲಮಪೆಡ್ಡಯಾರ್ ಕಶೆ

ಗಾಂವಾರ್ ಹೆಡತ್ ಆಸ್ತಾತ್

ಭಾಕ್ರಿ ಚಾಬ್ಡಾಯತ್

ರೂಚೀನ್..

- ತಾಂಕಾಂ ತಾಪಿಲ್ಲೊ ತವೊ ಜಾಯ್ ಆಸ್ತಾ

ಸರ್ಣಾ ಭಾಶೆನ್ ಚರ್ಚರೀತ್!

- ಪರೇಶ್ ನರೇಂದ್ರ ಕಾಮತ್ [ಫೆಬ್ರೆರ್ 2018]

ಪರೇಶ್ ನರೇಂದ್ರ ಕಾಮತ್:  'ಅಲಂಗ್', 'ಗರ್ಭಾಖೊಳ್', 'ಶುಭಾಂಕರ್' ಆನಿ 'ಚಿತ್ರಲಿಪಿ' ಮ್ಹಳ್ಳೆ ಚ್ಯಾರ್ ಕವಿತಾಜಮೆ ಪರ್ಗಟ್ ಜಾಲ್ಯಾತ್. ವೆಗಿಂಚ್ ಪಾಂಚ್ವೊ ಕವಿತಾಜಮೊ ’ರಂಗಬೊಲಿ’ ಪರ್ಗಟ್ಚ್ಯಾರ್ ಆಸಾ. ಕೊಂಕ್ಣಿ ಭಾಶಾ ಮಂಡಳ್ ಪುರಸ್ಕಾರ್, ಬಿ.ಬಿ.ಬೋರ್ಕರ್ ಸ್ಮಾರಕ್ ಪುರಸ್ಕಾರ್, ಕಲಾ ಅಕಾಡೆಮಿ ಸಾಹಿತ್ಯ ಪುರಸ್ಕಾರ್, ಜನಗಂಗಾ ಸಾಹಿತ್ಯ ಪುರಸ್ಕಾರ್, ಗೋವಾ ಕೊಂಕಣಿ ಅಕಾಡೆಮಿ ಸಾಹಿತ್ಯ ಪುರಸ್ಕಾರ್ ಆನಿ ಗೊಯಾಂ ಸರ್ಕಾರಾ ಥಾವ್ನ್ ಯುವ ಸೃಜನ್ ಪುರಸ್ಕಾರ್ ಲಾಭ್ಲ್ಯಾತ್. ಹಾಚ್ಯೊ ಕವಿತಾ ಹಿಂದಿ, ಗುಜರಾತಿ, ಸಿಂಧಿ, ಮರಾಠಿ, ಪಂಜಬಿ, ತೆಲುಗು ಆನಿ ಇಗ್ಲಿಶ್ ಭಾಸೆಂನಿ ಅನುವಾದಿತ್ ಜಾಲ್ಯಾತ್.