तवो

मनीस म्हळ्ळो अपल्या स्वार्थाक लागून कशें परिगतेचो उपेग कर्ता, जशें अमीबान अपणाभंवतोणी आसच्या गात्राक सरी जावन अपलो गात्र बदलिता तशें वेळाकाळाक सरी जावन अपले विचार, तत्वां, नयतीक मौल्यां तशेंच वेक्तित्व सयत बदलिता. आनी अपलें बोळकें भर्च्याक हेरांचो उपेग कर्ताना, हाताक मेळ‌ल्लें पाजता आनी मतीक आयिल्लें ताचता. तांकां ताप‌ल्ली कायल/तवो गर्जेचो आसता पूण त्या तव्याची फिकीर जांव, तव्यापंदल्या उज्याची काळजी जांव असल्यांक आसाना - फिकीर आसता फकत्त अपणान शेकून खावंक आसच्या भाक्रेची - जी फाल्यां गू जावन वेचेतसली.

बाब परेश नरेंद्र कामत गोंयचो नामणेचो कवी, चित्र‌कार तशेंच विमर्शक. हांगासर असलिच्च चिंत्पाची कविता घेवन आयला. थोड्याच उत्रांनी विणलली ही कविता फकत काणी आटाप्ता मात्र न्हय, जेमेल्ल्या दोळ्यांचेर विचारांचें थेंबे शिंपडायता. बाकिचें मापुंक तुजेर सोडतां.

तवो

कांय जाणांक तापिल्लो तवो जाय आसता.

ते हेवटेन भोंवतात

ते तेवटेन भोंवतात

तवो सोदतात

तांणीं कागदान गुठलावन पीठ हाडिल्लें आसता कालोवन

बोल्सांत दवरिल्लें आसता

आपली भाकरी भाजपाक

ते तापिल्ल्या तव्यार अचळय अपली घेतात भाजून

तांकां तव्याचें पडून गेल्लें नासता

ना तव्या पोंदा पेटिल्ल्या उज्याचें

ते आलमपेड्डयार कशे

गांवार हेडत आसतात

भाकरी चाबडायत

रूचीन..

- तांकां तापिल्लो तवो जाय आसता

सरणा भाशेन चरचरीत!

- परेश नरेंद्र कामत [फेबरेर २०१८]

परेश नरेंद्र कामत: 'अलंग', 'गर्भाखोळ', 'शुभांकर' आनी 'चित्रलिपी' म्हळ्ळे च्यार कविताजमे पर्गट जाल्यात. वेगिंच पांचवो कविताजमो ’रंगबोली’ पर्गटच्यार आसा. कोंकणी भाशा मंडळ पुरसकार, बी.बी.बोर्कर स्मारक पुरसकार, कला अकाडेमी साहित्य पुरसकार, जनगंगा साहित्य पुरसकार, गोवा कोंकणी अकाडेमी साहित्य पुरसकार आनी गोयां सर्कारा थावन यूव सृजन पुरसकार लाभल्यात. हाच्यो कविता हिंदी, गुजराती, सिंधी, मराठी, पंजबी, तेलुगू आनी इगलीश भासेंनी अनुवादीत जाल्यात.