ಸೊರೊಪ್ [ಪರೇಶ್ ನರೇಂದ್ರ ಕಾಮತ್]

ಜೆದನಾಂ ಮನಶ್ಯಾಚ್ಯಾ ಮನಾಂತ್ ಅಂಧಕಾರ್ ಭರೊನ್ ಆಸತಾ, ತೆದನಾಂ ತಾಚ್ಯಾನ್ ದೊಳ್ಯಾಂನಿ ಪಳಂವಚ್ಯಾ ವಾ ಕಾನಾಂನಿ ಆಯಕುಂಚ್ಯಾಂತ್ ಫರಕ್ ದಿಸಾನಾ. ಸರ್ವ್ ಏಕ್ ದಿಸತಾ. ಸರ್ವ್ ಏಕ್ ಸಮಜತಾ. ಆನಿ ಹೆಚ್ಚ್ ಉಣೆ ಸಮಜಣೆಂತ್ ಮನಿಸ್ ಫಯ್ಸಲ್ ಕರತಾ. ಹೆರಾಂಕ್ ಮಾಪುಂಕ್ ವೆತಾ. ಹೊ ಅಗ್ಯಾನ್, ಹಿ ನಾ-ಸಮಜಣಿ ವಾ ಮತಿಂತಲೊ ಅಂಧಕಾರ್ ಎಕಾಥರಾಚೊ ಪರದೊ ದೊಳ್ಯಾಂಚೆರ್ ಘಾಲತಾನಾ ಸಗಳೊ ಸಂಸಾರ್ ತಾಕಾ ಏಕ್ ಸಾರಕೊ ದಿಸತಾ.

ಹಿ ಕವಿತಾ ಥೊಡೆಚ್ ಉತರಾಂನಿ ಹರೇಕ್ ಮನ್ಶಾಚ್ಯಾ ಅಸ್ಕತ್ ಚಿಂತ್ಪಾಚೆರ್ ಅರ್ಸೊ ಧರತಾ. ಬಾಬ್ ಪರೇಶ್ ನರೇಂದ್ರ ಕಾಮತ್ ಆಯ್ಲೆವಾರ್ ಸಾಹಿಕ್ ಅಕಾಡೆಮಿ ಪುರಸ್ಕಾರ್ ಜೊಡ್ಪಿ ಯುವಕವಿ. ಕೊಂಕಣಿ ಕವಿತೆಂಕ್ ದೇಶಾಚ್ಯಾ ಹೆರ್ ಪ್ರಾಂತೀಯ್ ಭಾಸೆಂನಿ ವ್ಹರ್ಚಿ ಶ್ಯಾಥಿ ಹಾಚ್ಯಾ ಕವಿತೆಂನಿ ಆಸಾ. ಆನಿ ಹಿ ಕವಿತಾ ತಾಚಿ ಅಪುರ್ಭಾಯೆಚಿ ಗವಾಯ್ ದಿತಾ.

[ಕವಿತಾ] ಸೊರೊಪ್ [ಪರೇಶ್ ನರೇಂದ್ರ ಕಾಮತ್]

ಸೊರೊಪ್

ಸಳ್ಸಳಟಾ ವೊತ್ ತಣಾಂತ್ ಸೊರ್ಪಾ ಸಾರ್ಕೆಂ

ಸಳ್ಸಳಟಾ ತಣ್ ವೊತಾಂತ್ ಸೊರೊಪಾ ಸಾರ್ಕೆಂ

ಸಳ್ಸಳಟಾ ಸೊರೊಪ್ ತಣಾಂತ್ ವೊತಾ ಸಾರ್ಕೊ

ಹಳ್ಡುವೊ

ಅಧ್ಭೂತ್ ಹೆಂ ಹಳ್ಡುವೆಂಚಾರ್

ತಣಾಂತಲೆಂ

ಭರ್ ವೊತಾಂತ್

ಸಳ್ಸಳತ್ ರಾವ್ತಾ ಮ್ಹಜ್ಯಾಂತ್

ಸೊರೊಪಾ ವರಿ

ಫಣೊ ಉಬಾರೂನ್

- ಪರೇಶ್ ನರೇಂದ್ರ ಕಾಮತ್ [ಜನೆರ್, 2019]

ಪರೇಶ್ ನರೇಂದ್ರ ಕಾಮತ್:  'ಅಲಂಗ್', 'ಗರ್ಭಾಖೊಳ್', 'ಶುಭಾಂಕರ್', 'ಚಿತ್ರಲಿಪಿ', ಆನಿ ’ರಂಗಬೊಲಿ’ ಮ್ಹಳ್ಳೆ ಪಾಂಚ್ ಕವಿತಾಜಮೆ ಪರ್ಗಟ್ ಜಾಲ್ಯಾತ್. ’ಚಿತ್ರಲಿಪಿ’ ಬುಕಾಕ್ ಸಾಹಿತ್ ಅಕಾಡೆಮಿಚೊ ಪುರಸ್ಕಾರ್, ಕೊಂಕ್ಣಿ ಭಾಶಾ ಮಂಡಳ್ ಪುರಸ್ಕಾರ್, ಬಿ.ಬಿ.ಬೋರ್ಕರ್ ಸ್ಮಾರಕ್ ಪುರಸ್ಕಾರ್, ಕಲಾ ಅಕಾಡೆಮಿ ಸಾಹಿತ್ಯ ಪುರಸ್ಕಾರ್, ಜನಗಂಗಾ ಸಾಹಿತ್ಯ ಪುರಸ್ಕಾರ್, ಗೋವಾ ಕೊಂಕಣಿ ಅಕಾಡೆಮಿ ಸಾಹಿತ್ಯ ಪುರಸ್ಕಾರ್ ಆನಿ ಗೊಯಾಂ ಸರ್ಕಾರಾ ಥಾವ್ನ್ ಯುವ ಸೃಜನ್ ಪುರಸ್ಕಾರ್ ಲಾಭ್ಲ್ಯಾತ್. ಹಾಚ್ಯೊ ಕವಿತಾ ಹಿಂದಿ, ಗುಜರಾತಿ, ಸಿಂಧಿ, ಮರಾಠಿ, ಪಂಜಬಿ, ತೆಲುಗು ಆನಿ ಇಗ್ಲಿಶ್ ಭಾಸೆಂನಿ ಅನುವಾದಿತ್ ಜಾಲ್ಯಾತ್.