ನಿತಳ್ ಕರೂಂಕ್ ಘರ್

ಕವಿಚ್ಯಾ ಜಾಯ್ತ್ಯಾ ಸಕ್ತೆಂಪಯ್ಕಿಂತ್ಲಿ ಏಕ್ ಜಾವ್ನಾಸಾ ಉತ್ರಾಂನಿಂಚ್ ಸಂಸಾರ್ ರಚುಂಕ್ ಸಕ್ಚಿ. ಹಿ ತಾಕತ್ ಸಂಯ್ಬಾಂತ್‌ಚ್ ಆಸಾಗಾಯ್?. ಏಕ್ ಮಾಳೊ, ಆನಿ ತೊ ಮಾಳೊ ಚಡೊಂಕ್ ನಿಸಣ್ ಕಾಂಯ್ ಆಮ್ಚ್ಯಾ ಚಡ್ತಾವಾಂಚ್ಯಾ ಯಾದಿಚ್ಯಾ ಕೊನ್ಶಾಂತ್ ಕೆದಿಂಚ್ ಮಾಜ್ವನಾತ್‌ಲ್ಲೆಂ ರುಪ್ಣೆಂ ಜಾವ್ನಾಸ್ತಾ. ಜಾವ್ಯೆತ್ ಆಮ್ಚ್ಯಾ ಘರಾ, ಜಾವ್ಯೆತಾ ಆಮ್ಚ್ಯಾ ಸಯ್ರ್ಯಾಂಚ್ಯಾ ಘರಾ, ಪುಣ್ ಮಾಳ್ಯಾಂತ್ಲೊ ಸಂಸಾರ್ ವೆಗ್ಳೊ. ಪರ್ನಿಂ ದಸ್ತಾವೆಜಾಂ, ಬೂಕ್, ಪತ್ರಾಂ ಆನಿ ಅಪ್ರೂಪಾಯೆಕ್ ಉಪೇಗಾಕ್ ಪಡ್ಚ್ಯೊ ಜಾಯ್ತೊ ವಸ್ತು ಥಂಯ್ ದಾಳ್ಳೆಳ್ಯೊ ನಿಜಾಯ್ಕೀ ಎಕಾ ಅಥ್ವ್ಯಾಚ್ ಸಂಸಾರಾಕ್ ಆಮ್ಕಾಂ ವರುನ್ ವೆತಾ, ಕಿತ್ಯಾಕ್ ಮ್ಹಳ್ಯಾರ್ ತ್ಯೊ ಚಡ್ತಾವ್ ವಸ್ತು ಪುರ್ವಜಾಂನಿ ಅಪ್ಲ್ಯಾ ಮಿನತೆನ್ ಪುಂಜಾಯಿಲ್ಲ್ಯೊ. ಆಯ್ಚ್ಯಾ ತಾಂತ್ರಿಕ್ ಕಾಳಾರ್ ಹಾಂಚೊ ಮಹತ್ವ್ ಆನಿ ಉಪೇಗ್ ಉಣೊ ಜಾಲಾಸ್ತಲೊ ತರ್‌ಯೀ ಎಕಾ ತೆಂಪಾಧಿಂ ತ್ಯೊ ವಸ್ತು ಕಶ್ಯೊ ವಾಪಾರಾಕ್ ಪಡ್ತಾಲ್ಯೊ ಆನಿ ತೊ ವಾಪಾರ್ ಜಾತಾಸ್ತಾನಾ ಉಭ್ಜೊಂವ್ಚೆ ಮನ್ಶಾ ಉಮಾಳೆ ಆನಿ ಮಾಯಾಮೊಗಾಚೊ ಶಿಂವರ್ ಕಿತ್ಲೊ?

ಬಾಯ್ ಉರ್ಜಿತಾ ಭೊಬೆನ್ ಖರೆಂಚ್ ಜಾವ್ನ್ ಹೆ ಸರ್ವ್ ಅಪುರ್ಭಾಯೆಚೆ ಯಾದಿ ಹಾಂಗಾಸರ್ ಅಪ್ಲ್ಯಾ ಕವಿತೆಮುಖಾಂತ್ರ್ ಉಡಾಸ್ ಕರುನ್ ದಿಲ್ಯಾತ್. ಹಿ ಗೊಂಯ್ಚಿ ಕವಯತ್ರಿ ಪುಣ್ ಹಿಣೆಂ ರಚ್‌ಲ್ಲೊ ಸಂಸಾರ್ ಆಮ್ಕಾಂ ಕೊಣಾಯ್ಕ್‌ಯೀ ಲಗ್ತಿ ಜಾಂವ್ಚೆತಸಲೊ ಮ್ಹಳ್ಳೆಂ ಪಾರ್ಕುಂಕ್ ತುಕಾಚ್ ಸೊಡ್ತಾಂ.

ನಿತಳ್ ಕರೂಂಕ್ ಘರ್

ಹಾಂವೆಂ ಲಾಯ್ಲಿ ನೀಸಣ್

ಮಾಳ್ಯಾರ್ ಚಡೂನ್ ವಯ್ರ್

ನಿಯಾಳ್ಳಿ ಸರ್ಭೊವತಣ್

ಶಾಳೆಚ್ಯಾ ಸ್ಪರ್ಧೆಚಿ ಧಾಲ್

ವಯ್ರ್ ಬಶೀಲ್ಲಿ

ಘಂಯ್ರಾವಾಚಿ ವ್ಹಡ್ಲಿ ಝಾಲರ್

ತಾಜೆರ್ ದಶೀಲ್ಲಿ

ಎಕ್ ದಪ್ತರ್ ಪೊನ್ನೆ

ಬುರಾಕಾಂಚೆಂ, ಲ್ಹಾನ್ ವ್ಹಡ್

ಇತಿಹಾಸ್, ಭೂಗೊಲ್ ಭರೂನ್

ಲಾಗ್ತಾಲೆಂ ತೆಂ ಜಡ್

ಎಕ್ ಘಡ್ಗಡೊ ಕಾಂಯ್ ಘೂಲೊ

ಎಕ್ ಸಾಪ್ಶೀಡಯೆ ಪಟ್

ಎಕ್ ಸಂಧ್ಯೆಚೊ ಪಡ್ಗೊ

ಎಕ್ ತಾಂಬ್ಯಾಚೆಂ ಚೀಪಟ್

ಮ್ಹಜೆ ಆವ್ಡೀಚೊ ಪೆಲೊ

ಎಕ್ ಚೆಪಾಂ ಪಡೀಲ್ಲೊ

ತೀಚಾಕಿ ಸಾಯ್ಕಲಿ

ಸೀಟಾರ್ ಚಡಿಲ್ಲೊ

ಎಕ್ ಆಜ್ಯಾಚೆಂ ವ್ಹಲ್ತೆರ್

ಕಾಪಡ್ ನಾಶೀಲ್ಲೆಂ

ಎಕ್ ಜಾತ್ರೆಂತಲೆಂ ಘೀರ್ಘೀರೆಂ

ತಾಜೆ ಕುಶೀನ್ ಬಶೀಲ್ಲೆಂ

ಮಾಣ್ಕೂಲಿ ಚೂಲ್ ಕುಕೂಲೆ ತೊಪ್

ಕಾಂಯ್ ಆಂಶೆ ಬುಡ್ಕುಲ್ಯಾನಿ

ಚ್ಯಾಚೆಂ ಗಾಳ್ಣೆ ಸಾನೂಲೆಂ

ಖೆಳ್ಪಾಕ್ ರಾನ್ಚೆವಾಡಚೆಲ್ಯಾನಿ

ಥಂಯ್ಚ್ ದೀಸ್ಲಿ ಎಕ್ ಬಾವ್ಲಿ

ಮೊಡ್ಕ್ಯಾ ಹಾತಾಂಚಿ

ಪೀಂಗ್ಶಾ ಕೆಸಾಂಚಿ ಘಾಲೂನ್

ಖೊಮ್ಶಿ ಖತಾಂಚಿ

ಕಾಂಯ್ ರೀಕಾಮ್ಯೊ ಕಾಶಿ

ಸೂರ್ಸೂರ್ಯಾಚ್ಯೊ ಆನಿ ಪಾವ್ಸಾಚ್ಯೊ

ಆನಿ ಕಾಂಯ್ ಯಾದಿ ಬಾನೀಲ್ಲ್ಯೊ

ಚವ್ತೀಚ್ಯಾ ದೀಸಾಂಚ್ಯೊ

ಆಕಾಶದಿವ್ಯಾ ಪೊನ್ನೊ

ಸಾಂಗಾಡೊ ಮೊಡೀಲ್ಲೊ

ಪೀನ್ಕ್ಯಾ ಫೊಲೀಂಸಯತ್

ಮಾಕ್ನಾಪೊನಾ ದಡಿಲ್ಲೊ

ಎಕ್ ರೆಡೀಯೊ 'ಫೀಲೀಪ್ಸ್'

ಟ್ರಂಕಾ ಮೂಳಾಕ್ ಪಡೀಲ್ಲೊ

ವಿವಿಧಭಾರತಿ ಖಳಾರ್ ಮಳಾರ್

ಆಯ್ಕೂಂಕ್ ಹಾಡಿಲ್ಲೊ

ಕಿತ್ಲೀಶೀಂಚ್ ಪೊನ್ನಿ ಲಾತಾಂ

ಪೀನ್ಕಿಂ ಕಾಗ್ದಾ ಫೂಲಾಂ

ಫೆಸ್ತಾಚೆ ಧನುಶ್ಯ್ ಬಾಣ್

ಆನಿ ಕಿತ್ಲಿ ಪೀಸ್ತೂಲಾಂ

ಘಂಯ್ರಾವಾನ್ ಧೂಲ್ಲಾನ್ ಭರೀಲ್ಲೊ

ಮಾಳ್ಯಾಚೊ ಕಣಾನ್ ಕಣ್

ಮಾಳ್ಯಾರ್ ಘುಸ್ಪೂನ್ ಪಡೀಲ್ಲೆಂ

ಮ್ಹಜೆಂ ಅಖ್ಖೆಂ ಭೂರ್ಗೆಪಣ್

ಆದೆಸಭರ್ ಮಾಳ್ಯಾರ್ ಹಾಂವ್

ಪೂಣ್ ನಿತಳ್ ಕಾಂಯ್ಚ್ ಕೆಲೆಂ ನಾ

ಗುಟ್ಲಾವನ್ ದವ್ರೀಲ್ಲೆಂ ಭೂರ್ಗೆಪಣ್

ಮ್ಹಜ್ಯಾನ್ ಹಾಲೊಂವ್ಕ್ ಜಾಲೆಂ ನಾ

ಗುಟ್ಲಾವನ್ ದವ್ರೀಲ್ಲೆಂ ಭೂರ್ಗೆಪಣ್

ಮ್ಹಜ್ಯಾನ್ ಹಾಲೊಂವ್ಕ್ ಜಾಲೆಂ ನಾ

-  ಉರ್ಜಿತಾ ಭೊಬೆ: [ಜನೆರ್ 2018]

ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆನಿ ಆಸಕ್ತ್ ಆಸ್ಚಿ ಹಿ ಗೊಂಯ್ಚಿ ಕವಯತ್ರಿ, ತಿಚಿಂ ಸಭಾರ್ ಬರ್ಪಾಂ, ಕವಿತಾ ಗೊಂಯ್ಚ್ಯಾ ಪತ್ರಾಂನಿ ಪರ್ಗಟ್‌ಲ್ಯಾಂತ್. ತಿಚೊ ಪಯ್ಲೊ ಕವಿತಾಜಮೊ ವೆಗಿಂಚ್ ಪರ್ಗಟ್ ಜಾವ್ನ್ ಯೆಂವ್ಚ್ಯಾರ್ ಆಸಾ.