ಕವಿತಾकविताPoem
ಎಕ್ವೆರಿಯಮ್ (- ಉರ್ಜಿತಾ ಭೊಬೆ)
[ಕವಿತಾ] ಎಕ್ವೆರಿಯಮ್ (- ಉರ್ಜಿತಾ ಭೊಬೆ)
ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಸವಾಲ್ ಜೆದನಾಂ ಎಕಾ ಕವಿಕ್ ತರ್ ಕೆಲೆಂ, ತರ್ ತೆದನಾಂ ಮೆಳ್ಚಿ ಜವಾಬ್ ಖರಿಚ್ ಜಾವ್ನ್ ವಿಜ್ಮಿತ್ ಕರತಾ. ಜಿವಿತ್ ಮ್ಹಳ್ಯಾರ್ ಚ್ಯಾರ್ ವಣದಿಂಚೆಂ ಏಕ್ ಆಕ್ವೇರಿಯಮ್ ಭಾಶೆನ್ ದಿಸತಾ ಮ್ಹಣಚಿ ಹಿ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಕಾಂಯ್ ಅಪಣಾಚೊಚ್ ಖರೊ ಅಣ್ಬವ್ ಕಾಂಯ್ ವ್ಹಾಳ್ಳಾಕಾಯ್ ಕಿತೆಂ ಮ್ಹಳ್ಳೊ ದುಭಾವ್ ಯೆತಾ. ಹಾಂಗಾಸರ್ ಆಮಿ ಹ್ಯಾ ಸಂಸಾರಾಂತ್ ಮಾಸಳ್ಯೊ ತರ್, ತ್ಯೊ ವಣದ್ಯೊ ಪಳೆಯಾತ್; ಜಾವ್ಯೆತಾ ಆಮ್ಚ್ಯಾ ಧರ್ಮಾಚ್ಯೊ, ಜಾವ್ಯೆತಾ ಭಾಸೆಚ್ಯೊ, ಜಾವ್ಯೆತಾ ಆಧ್ಯಾತ್ಮಿಕತೆಚ್ಯೊ, ಜಾವ್ಯೆತಾ ವಯ್ಚಾರಿಕತೆಚ್ಯೊ ವಾ ಹೆರ್ ಕಸಲ್ಯೊಯ್ ಪುಣ್ ಹ್ಯಾ ಚ್ಯಾರ್ ವಣದಿಂ ಭಿತರ್ ಬಂದ್ ಜಾಲ್ಲೊ ಕವಿಚೊ ಅಣ್ಬವ್ ಅಪುರ್ಭಯೆಚೊ ಮ್ಹಣಚ್ಯಾಂತ್ ದೋನ್ ಉತರಾಂ ನಾಂತ್.
ಥೊಡ್ಯಾಚ್ ವರಸಾಧಿಂ ಕವಿತಾ ಬರಂವ್ಕ್ ಲಾಗ್ಲ್ಲ್ಯಾ ಬಯ್ ಉರ್ಜಿತಾಚ್ಯಾಚಿ ಕಾವ್ಯಾಳ್ ವಾಡಾವಳ್ ಕೊಂಕಣಿ ಕವಿತೆಚ್ಯಾ ನದ್ರೆನ್ ಭೋವ್ ಸಂತೊಸಾಚೆಂ. ಹೆಂ ಚಿಂತಪ್ ತುಜೆಂಯ್ ಕರುಂಕ್ ಆತಾಂ ತುಜೆರ್ ಸೊಡತಾಂ.
[ಕವಿತಾ] ಎಕ್ವೆರಿಯಮ್ (- ಉರ್ಜಿತಾ ಭೊಬೆ)
ಎಕ್ವೆರಿಯಮ್
ಸಕಾಳಿಂ ಉಠತ್ ಸಾಕೂನ್ ಕಾಲ್ ರಾತಿಂ
ಸಪ್ನಾತ್ ಪಳಯ್ಲ್ಲೊ ಎಕ್ವೆರಿಯಮ್ ದೊಳ್ಯಾಮುಖಾರ್
ನಾಚ್ತಾಲೊ ಸಕಾಳ್ಚ್ಯಾನ್ ಜಸೊ ಫಾಟೀಕ್ ಲಾಗಿಲ್ಲೊ ದುದ್ ತಾಪಯ್ತನಾ ಚ್ಯಾಕ್ ಆದನ್ ದವ್ರತನಾ ಝಾಡಾಂಕ್
ಉದಕ್ ಘಾಲ್ತನಾ ಪೆಪರ್ ಭೀತರ್ ಘೆತ್ನಾ...... ತೊ
ನಾಚ್ತಾಲೊ ದೊಳ್ಯಾಮುಖಾರ್ ಕಿದ್ಯಾಕ್? ಕಳ್ಳೆಂ
ನಾ. ಮಾಗೀರ್ ಮ್ಹಾಕಾ ದಿಸ್ಲೆಂ ತೊ ಮ್ಹಾಕಾ
ಕಸ್ಲಿ ಯಾದ್ ಕರೂನ್ ದಿತಾ... ವಣ್ಟೀಂಚಿ.... ಹಾಂವೆಂ ಬಾಂದಿಲ್ಲೆ ವಣ್ಟೀಂಚಿ ಕಾಚೆಂಚ್ಯಾ ವಣ್ಟೀಂಚಿ
ಯಾದ್ ಹಾಂವೆಂ ಮ್ಹಜೆ ಭೊವ್ತಣಿ ಕಾಂಚೆಚ್ಯೊ
ವಣ್ಟಿ ಬಾಂದ್ಲ್ಯಾತ್ ತಾಂತ್ಲ್ಯಾನ್ ಮ್ಹಾಕಾ ಲೊಕ್
ದಿಸ್ತಾತ್ ತಾಂಕಾಯ್ ಹಾಂವ್ ದಿಸ್ತಾಂ ಪೂಣ್....... ಪೂಣ್ ಮ್ಹಜೊ ಆವಾಜ್ ತಾಂಚೆಮೆರೆನ್ ಪಾವ್ನಾ. ಮ್ಹಾಕಾ ಉಲೊವ್ಚೆಂ ಆಸ್ತಾ, ತೊಂಡ್ ಉಗಡ್ಲ್ಯಾರ್ ಉತರ್
ಫುಟ್ನಾ, ಉತರ್ ಫುಟ್ಲ್ಯಾರ್ ಆವಾಜ್ ಭಾಯ್ರ್
ಸರ್ನಾ, ಆನಿ ಭಾಯ್ರ್ ಸರ್ತಾ ತೊ ಆವಾಜ್ ಕಾಚೆಚ್ಯಾ
ವಣ್ಟೀಂಕ್ ಆದ್ಳುನ್ ಪರ್ತುನ್ ಯೆತಾ......... ಮ್ಹಣ್ ಹಾಲೀಸರಾಕ್ ಹಾಂವ್ ಒಗೀಚ್ ಆಸ್ತಾಂ. ಕಾಳ್ಜಾಂತ್ ಉತ್ರಾಂ ಖತ್ಖತತ್ ವತಾತ್ ಚಿಂತ್ನಾಂಕ್
ಉಕ್ಳಿ ಯೆತಾ ಒತೊ ಲೆಗೀತ್ ಯೆತಾ ಪೂಣ್..... ಕಾಚೆಕ್ ಆದ್ಳಪಾಚೆ ಭಯಾನ್ ತಿಂ ಭೀತ್ರಚ್ ತುಂಬ್ತಾತ್ ಆನಿ ಹಾಂವ್ ಪೆಂವ್ತಾಂ ತೆ ಕಾಂಚೆಚ್ಯಾ ವಣ್ಟೀಂನಿ ಎಕ್ವೆರಿಯಮಾನ್ ಪೆಂವ್ಪಿ ನುಸ್ತ್ಯಾವರಿಂ. ಸದಾಂಚ್
ರೀತೆಂ ಕರೂನ್ ಲೆಗೀತ್ ತೆಂ ಭರತ್ ವತಾ. ಖಾರೆ
ಉದ್ಕಾನ್ ದರ್ಯಾವರಿ ಖಾರೆ ಮ್ಹಜೆಚ್ ದುಕಾಂನಿ ಪೂಣ್ ಆತಾಂ...... ಆತಾಂ ಥಾರಾಯ್ಲಾಂ. ಕೆನ್ನಾತರಿ
ಎಕ್ ದೀಸ್ ಹಿ ವಣತ್ ಫೊಡ್ಟಲೆಂ. ಕಂವ್ಚ್ಯೊ
ಕಂವ್ಚ್ಯೊ ಜಾತ್ಲ್ಯೊ ಚಕ್ಚಕೀತ್ ಕಂವ್ಚ್ಯೊ ಉಜ್ವಾಡಾಂತ್ ಲಖ್ಲಖಪಿ. ಆನಿ..... ಹ್ಯಾ
ಕಂವ್ಚ್ಯಾಂತಲ್ಯಾನ್ ಮ್ಹಜೆ ಕಾಳ್ಜಾಂತಲಿಂ ಉತ್ರಾಂ ತುಂಬಿಲ್ಲಿ ಚಿಂತ್ನಾ ಆಡ್ಡೂನ್ ಆಡ್ಡೂನ್ ಸಾಂಗ್ತಲೆಂ ಆನಿ ತಾಜೊ ಗಾಜ್ ಪಾವ್ತಲೊ ದಿಗಂತರಾ..........
-
ಉರ್ಜಿತಾ ಭೊಬೆ.
[ಜನೆರ್, 2020]
© 2020 ಉರ್ಜಿತಾ ಭೊಬೆ · ಆಶಾವಾದಿ ಪ್ರಕಾಶನ್ ಸರ್ವ್ ಹಕ್ಕಾಂ ರಾಕೊನ್ ದವರ್ಲ್ಯಾಂತ್.
ವಿಡಿಯೊविडियोVideo 4 Nov 2026
Poetry of the month #9. Urjita Bhobe
ಕವಿತಾकविताPoem Feb 2020
ಆವಯ್ ಕಿತ್ಯಾಕ್ ಮ್ಹಣಟಾ? (- ಉರ್ಜಿತಾ ಭೊಬೆ)
ಕವಿತಾकविताPoem Dec 2019
ಆಮಿ ಶಿಕೀಲ್ಲಿಂ (- ಉರ್ಜಿತಾ ಭೊಬೆ)
More in Poinnari
ಕವಿತಾकविताPoem Feb 2025
ಧಾಳ್ಯೊ [ಡೊ. ಝೀಟಾ ಲೋಬೊ]
ಕವಿತಾकविताPoem Oct 2020
ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
ಕವಿತಾकविताPoem Nov 2016
ಎಕಾ ಫೊಂಡಾಚಿ ಕಥಾ
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.
Comments
No comments yet. Be the first to say what you thought of it.
Leave a comment