ವೆಶಾ (- ಕಾಜಲ್ ಪ್ರಕಾಶ್ ರಾಯ್ಕರ್)

ಕಾರಣ್ ಹಾಂವ್ ದಾದ್ಲ್ಯಾಂಚಿ ಆಶಾ

ಆತಾಂ ಎಕ್ ಜಾಲ್ಯಾರ್ ಮಾಗೀರ್ ಧಾ

ಅಶ್ಯಾ ಸಗ್ಲ್ಯಾಂಕ್ ಕೂಡ್ ಮ್ಹಜಿ ಒಪ್ತಾಂ

ಎಕಾ ವೆಳಾರ್ ವಿಕ್ಲೆ ಮ್ಹಾಕಾ ತಾಣೆಂ

ನಾನಾಕಾರ್ ಘಾತ್ಲೊ ಹಾಂವೆಂ

ತಳಮ್ಳ್ಳೆಂ ಆಂಗ್ ಮ್ಹಜೆಂ

ಮಾತ್ ತ್ಯಾ ದಿಸಾ ಸಾವ್ನ್ ಜಾಲೆಂ ಹಾಂವ್ ಪಿಶೆಂ

ದಾರಾಂ ಮ್ಹಜಿಂ ಉಕ್ತಿಂ ಆಸ್ತಾತ್ ತಾಂಕಾಂ

ರಾವ್ತಾ ಹಾಂವ್ ಧಾ ಪಯ್ಶ್ಯಾಂಕ್ ಸದಾಂ

ಸಗ್ಲ್ಯಾಂಕ್ ಹಾಂವ್ ಹಾಂಸತ್ ರಾವ್ತಾ

ಪೂಣ್ ಕಾಳ್ಜಾಕ್ ಮಾತ್ ಕಾಂಟೊ ತೊಪ್ತಾ

ನಾಂವಾಂ ಮ್ಹಾಕಾ ದಿತಾತ್ ಸಗ್ಲಿಂ

ಕೊಲ್ ಗರ್ಲ್ಸ್, ಮೊಲ್, ಸ್ಟ್ರಮ್ಪೆಟ್, ಧಂಧೊ ಕರ್ಪಿ ಆದಿ...

ಲಜ್ ಹಾಂವೆಂ ವಿಕ್ಲಿ ಮ್ಹಜಿ

ಜೆನ್ನಾ ಆಯ್ಲಿ ಆಂಗಾರ್ ಜೀಬ್ ಲ್ಹೆವಾಳ್ಯಾಚಿ

ಜುವಾನಪಣ್ ದಿಸ್ಲ್ಯಾರ್ ಹಜಾರಾಚೊ ಪಾವ್ಸ್

ಜಾಣ್ಟೆಪಣ್ ದಿಸ್ಲ್ಯಾರ್ ಶಂಬ್ರಾಚೊ ಪಾವ್ಸ್

ಅತ್ತರಾಚೊ ವಾಸ್ ಜಾಲ್ಯಾರ್ ಸೊರೊ ಪಿಲ್ಲ್ಯಾಚೊ ವಾಸ್

ಸೊಸೂನ್ ಘೆವ್ಚೆ ಪಡ್ಟಾ ಸಗ್ಲ್ಯಾ ದೆವ್ಚಾರಾಂಕ್

ಕಿರ್ಣಾಂ ಉಜ್ವಾಡಟಾತ್ ದೊಳ್ಯಾಂತ್ ನವಿಂ-ನವಿಂ

ಪೂಣ್ ಯಾದ್ ಯೆತಾ ವೆಶಾಚೀಚ್ ಜಾತ್ ಮ್ಹಜಿ

ದಿಸ್ತಾ ಕೆನ್ನಾ ವೆಗ್ಳೀಚ್ ಜೀಣ್ ಜಗ್ಪಾಚಿ

ಜೀವ್ ದಿವ್ಪಾಕ್ ಆತ್ಮೊ ಲಾಗ್ತಾ ಫಾಟಿ

ಕಾಂಯ್ ಅಸ್ತುರೆಕ್ ದುಡು ಜೊಡ್ಪಾಚಿ ಆಸ್

ಜಾಲ್ಯಾರ್ ವಾಯ್ಟ್ ನದ್ರೆಚ್ಯಾ ಪುರುಶಾಕ್ ಭೊಗ್ ಘೆವ್ಪಾಚಿ ಆಸ್

ಅಯ್ಯಾಶಿ ಕರ್ತಾತ್ ಪಯ್ಶೆಂ ಜೊಡೂನ್

ಸುಖಿ ಲೆಗೀತ್ ತಿಂ ಜಾತಾತ್ ಕೂಡ್ ವಿಕೂನ್

ಪೊಟ್ ಭರ್ಪಾಕ್ ಪಡ್ಟಾ ಗರಜ್

ಪಯ್ಶಾಂಚೊ ಪಾವ್ಸ್ ಝಡಯ್ತ್ ರಾವ್ತಾ ಪುರುಷ್

ಲ್ಹಾರಾಂ ವಾಂಗ್ಡಾ ವ್ಹಾಂವ್ತಾ ಹಾಂವ್

ಮಾತ್ ದರ್ಯಾ ಸಾಂಬಾಳಟಾ ಸದಾಂಚ್

ಸಮಾಜ್ ವಾಯ್ಟ್ ಮ್ಹಣ್ಟಾ ಮ್ಹಾಕಾ

ನದರ್ ತಾಂಚಿಂ ವಾಕ್ಡಿ ಜಾತಾ

ಜೀಬ್ ತಾಂಚಿಂ ಖಂಯ್ಚ್ಯಾಯ್ ವಟೆನ್ ಘುಂವ್ತಾ

ಪೂಣ್ ಬಂದ್ ಕರ್ಪಾಕ್ ಜಾಯ್ನಾ ತಾಂಚಿಂ ತೊಂಡಾ

ಹಯ್ ಹಾಂವ್ ಎಕ್ ವೆಶಾ..

ಸಮಾಜ್ ಮ್ಹಣ್ಟಾ ಮ್ಹಾಕಾ ವೆಶಾ

ಜಾತೂಯ್ ಮ್ಹಣ್ಟಾ ಮ್ಹಾಕಾ ವೆಶಾ

ಆನಿ ಗರ್ಜೂಯ್ ಮ್ಹಣ್ಟಾ ಮ್ಹಾಕಾ ವೆಶಾ

ಸಮ್ಜೂನ್ ಘೆಯಾತ್ ದುಖ್ಖ್ ಮ್ಹಜೆಂ

ಜಗ್ಪಾಚೆ ಆಸಾ ಎಕ್ ಸಪನ್ ಮ್ಹಜೆಂ

ಎಕ್ ಸಾಮಾನ್ಯ್ ಮನ್ಶಾ ಸಾರ್ಕೆಂ

ತರ್ ವಿಚಿತ್ರ್ ಮ್ಹಣು ನಾಕಾತ್ ಕುಡೀಕ್ ಮ್ಹಜೆ

ಕಾಂಯ್ ಬಾಯ್ಲಾಂಚಿ ಚೂಕ್ ನಾ

ತರಿ ದಿತಾ ಕಾಂಯ್ ಮಾನ್ ತಾಂಕಾಂ?

ಸಾದಾರಣ್ ಮನೀಸ್ ಮ್ಹಣ್ ಪಾರ್ಖಿತಾತ್ ಕಾಂಯ್ ತಾಂಕಾಂ?

ಸಮಾಜಾಂತ್ ಜಾಗೊ ಮೆಳ್ಟಾ ಕಾಂಯ್ ತಾಂಕಾಂ?

ಕಾರಣ್ ಮ್ಹಣ್ಟಾತ್ ನ್ಹಯ್ ವೆಶಾ ತಾಂಕಾಂ?

ಕೆನ್ನಾಚ್ ಮೆಳ್ನಾ ಆಪ್ಲೆಪಣಾಚೊ ಮೊಗ್

ಪೂಣ್ ಮೆಳ್ಟಾ ತೊ ಕೂಡೀಚ್ಯಾ ನಾಂವಾನ್ ಮೊಗ್

ಮೆಳ್ನಾ ಆಪ್ಲೆಂ ಘರ್ ನಾ ದಾರ್

ದಿಲಾಂ ಆಪ್ಲ್ಯಾನಿಂ ಮ್ಹಾಕಾ ಸೊಡೂನ್

ಪುರುಷಾಂನಿ ಸ್ವತಾಚಿ ನದರ್ ಬದ್ಲೂಂಕ್ ಜಾಯ್

ದುಡ್ವಾಂಕ್ ಆಶೆಲ್ಲ್ಯಾ ಬಾಯ್ಲಾಂನಿ ವಿಚಾರ್ ಕರೂಂಕ್ ಜಾಯ್

ಸಮಾಜಾಂತ್ ಬದಲ್ ಘಡೂಂಕ್ ಜಾಯ್

ಜಾಲ್ಯಾರ್ ಬಂದ್ ಜಾತ್ಲೊ ಹೊ ವೆಶಾಚೊ ವಿಚಾರ್.

- ಕಾಜಲ್ ಪ್ರಕಾಶ್ ರಾಯ್ಕರ್. [ಮಾರ್ಚ್, 2020]