ತ್ರಿಕೊಣ್ (- ಕಾಜಲ್ ಪ್ರಕಾಶ್ ರಾಯ್ಕರ್)

[ಕವಿತಾ] ತ್ರಿಕೊಣ್ (- ಕಾಜಲ್ ಪ್ರಕಾಶ್ ರಾಯ್ಕರ್)

ಚ್ಯಾರ್ ವಣತಿಂಚೆರ್ ಉಭಾರ್‌ಲ್ಲೆಂ ಘರ್ ಆನಿ ತ್ಯಾ ಘರಾಂತ್ ಜಿಯೆಂವ್ಚೆಂ ಕುಟಮ್, ವೆಗ್-ವೆಗಳಿಂ ನಾತಿಂ ಸುಕಾ-ದುಕಾಕ್ ವಾಂಟುನ್ ಘೆವ್ನ್, ಸುಕ್-ಸೊಂತೊಸಾನ್ ಕಾಡ್ಚೆ ದೀಸ್ ಎಕಾ ತೆಂಪಾದಿಂ ಸರ್ವಾಂಚೆ ಜಾವ್ನಾಸ್ಲೆ ಪುಣ್ ಆಜ್ ತ್ಯ್ ವಣತಿ ತಶ್ಯೊಚ್ ಆಸಾತ್ ಪುಣ್ ಮನಿಸ್, ನಾತಿಂ ಆನಿ ಭಾಂದ್ ಕಸೊ ಬದಲ್ಲಾಕಾಯ್? ಪುಣ್ ಚೌಕೋಣ್ ಆಸ್ಲೆ ಬದ್ಲುನ್ ತ್ರಿಕೋಣ್ ಜಾತಾನಾ ಗಳೊನ್ ಗೆಲ್ಲೆಂ ತರ್‌ಯೀ ಕಿತೆಂ? ಮನಶಾಪಣ್ ಮ್ಹಳ್ಳೆಂ ಚಿಂತಪ್ ಉಟಂವ್ಚಿ ಕವಿತಾ.

[ಕವಿತಾ] ತ್ರಿಕೊಣ್ (- ಕಾಜಲ್ ಪ್ರಕಾಶ್ ರಾಯ್ಕರ್)

ತ್ರಿಕೊಣ್

ಪುರಾಯ್ ಘರಾಣ್ಯಾಚೊ ಎಕವ್ಟ್ ದಿಸ್ತಾಲೊ

ಜಾಣ್ಟಿಂ ನೆಣ್ಟಿಂ ಪೊರಾಂಟ್ಯಾಚೊ

ಹಾಂಸೂನ್ ಖೆಳೂನ್ ದಿಸ್ ವತಾಲೊ

ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಸಣ್ ಪರ್ಬೊ ಉಮೆದೀನ್ ಮನಯ್ತಾಲಿಂ

ಜಾಯ್ ಜಾಯ್ ತ್ಯಾ ವೆಳಾರ್ ಸಗ್ಲಿಂ ಪಾವ್ತಾಲಿಂ

ಆಂಗ್ಣಾಂತ್ ಬಸೂನ್ ಗಜಾಲ್ಯೊ ಕರ್ತಾಲಿಂ

ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಮಾಯ್ ಮಾವಾಚ್ಯಾ ಕಡಕ್ ಉತ್ರಾಂನಿ ಆಸ್ತಾಲೊ ಮೊಗ್

ಭಾವ್ಜ್ ದೆರ್ ಆನಿ ನಂಡೆ ಮದಿಂ ಆಸ್ತಾಲಿ ಇಶ್ಟಾಗತ್

ಪಾಂಚೂಯ್ ಜಾವೊ ಭಯ್ಣಿ ಸಾರ್ಕಿಂ ಖೂಶ್

ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಭುರ್ಗಿಂ ಸಗ್ಲಿಂ ಮೆಳೂನ್ ಖೆಳ್ಟಾಲಿಂ

ಆಪ್ಲ್ಯಾ ಸಾರ್ಕೊ ಆನಿ ಎಕ್ ಘರಾಬೊ ಕರ್ತಾಲಿಂ

ಆಜೊ ಆಜೀಯ್ ಜಾತಾಲಿಂ ನಾತ್ರಾಂ ವಾಂಗ್ಡಾ ಭುರ್ಗಿಂ

ಆಯ್ಜ್ ಖಂಯ್ ರೆ ಆಸಾತ್ ತೆ ದೀಸ್?

ಎಕವ್ಟ್ ಪಳೊವ್ಪಾಕ್ ಮೆಳ್ಟಾಲೊ

ತೊ ಕಾಳಾ ಪ್ರಮಾಣ್ ಬದ್ಲತ್ ಗೆಲೊ

ತಿಂ ನಾತಿಂ ಬದ್ಲ್ಲಿಂ, ತೊ ವೆಳ್ ಗೆಲೊ

ಆನಿ...ಆನಿ ಘರಾಬೊಯ್ ಬದ್ಲ್ಲೊ

ಚೌಖಣ್ ಫಾಂಫ್ಡೂನ್ ತ್ರಿಕೊಣ್ ಆಪ್ಣಾಯಲೆ

ತೆ ದೀಸ್ ಸಗ್ಲೆ ವ್ಹಾಂವತ್ ಗೆಲೆ

ಮನೀಸಪಣೂಯ್ ಝಡೂಂಕ್ ಲಾಗ್ಲೆಂ

ಆನಿ ಎಕ್ಮುಳೆಪಣಾನ್ ಜಗೂಂಕ್ ಲಾಗ್ಲೆ.

ಗೆಲೆ ತೆ ರಂಗೀತ್ ದೀಸ್

ವಣ್ಟಿ ಮಾತ್ ಉರ್ಲಿಂ ತೀಂಚ್

ಪೂಣ್ ಜಾಲೆ ಮಾತ್

ಸುವಾರ್ಥಿ ಸಗ್ಲೆ ಮನೀಸ್...

- ಕಾಜಲ್ ಪ್ರಕಾಶ್ ರಾಯ್ಕರ್. [ಜ್ಯೂನ್, 2020]