ಕವಿತಾ (- ಕಾಜಲ್ ಪ್ರಕಾಶ್ ರಾಯ್ಕರ್)

[ಕವಿತಾ] ಕವಿತಾ (- ಕಾಜಲ್ ಪ್ರಕಾಶ್ ರಾಯ್ಕರ್)

ದೆವಾನ್ ಮನಶಾಕ್ ರಚತಾನಾ ಫಕತ್ ದೋನ್ ಪ್ರಕಾರ್ ಕೆಲ್ಲೆ; ಏಕ್ ಅಸ್ತುರಿ, ದುಸರೊ ದಾದಲೊ. ಪುಣ್ ಮನಶಾನ್ ಹಾಂತುಂ ಜಾಯ್ತೆಂ ಪ್ರಕಾರ್ ರಚಲೆ; ಆಪಲ್ಯಾ ಸ್ವಾರ್ಥಾಕ್ ಲಾಗುನ್, ಅಪಲ್ಯಾ ಫಯದ್ಯಾಕ್ ಲಾಗುನ್. ಆನಿ ಹಿ ಪರಂಪರಾ ಆಜ್ ಪಾಸುನ್ ಚಾಲು ಆಸಾ. ಅಸಲ್ಯಾ ಸಮಾಜಿನ್ ಅನಿಶ್ಟ್ ಪರಂಪರೆಚ್ಯಾ ವಿರೋದ್ ಜೆದನಾಂಯ್ ಆವಾಜ್ ಉಟಯ್ತಾ ಜಾವನಾಸಾ ಕವಿ. ಪುಣ್ ಹಾಂಗಾಸರ್ ಸಯ್ತ್ ಜಾಯ್ತೆ ಪ್ರಕಾರ್ ಆಸಾತ್ ನ್ಹಯ್? ಕೊಣ್ ಕವಿತಾ ಘಡತಾತ್, ಕೊಣ್ ಕವಿತಾ ರಚತಾತ್ ತರ್ ಕೊಣ್ ಅಪಲ್ಯಾ ಜಿಣಿಯೆಚ್ಯಾ ಕರ್ತುವಾಂನಿ ಕವಿತಾ ಉಭ್ಜತಾತ್. ಆನಿ ಅಸಲ್ಯಾ ಕರ್ತುಬಾಂನಿ ಕವಿತಾ ಉದೆಶೆಂ ಕರ್ಚಿ ಶ್ಯಾಥಿ ಆಸಚೆ ಕವಿ. ಕಿತ್ಯಾಕ್ ಮ್ಹಳ್ಯಾರ್ ಹೆ ಕವಿ ಹವೇಸಿ ಕವಿ ನ್ಹಯ್.

[ಕವಿತಾ] ಕವಿತಾ (- ಕಾಜಲ್ ಪ್ರಕಾಶ್ ರಾಯ್ಕರ್)

ಆವಯ್ಸ್... ಪಾಪ್ ರೆ ತಾಚೆಂ

ಅಶೆಂ ಮನಾಂತ್ ಜಾಲೆಂ

ಬಾರೀಕ್ ನದ್ರೆನ್ ತಾಕಾ ಪಳಯ್ನಾ ಫುಡೆಂ

ಆಂಗ್ ಅಚ್ಕೀತ್ ಚುರ್ಚರಲೆ

ನಟಿಲ್ಲೆಂ ತೆಂ ಗುಲಾಬಿ ವ್ಹಿಸ್ತುದಾನ್

ನಾಸ್ಲಿಂ ಮಾತ್ ಜೊತಿಂ ಪಾಂಯಾಂಕ್

ಬಸೂನ್ ತೆಂ ಎಕಾ ಕೊನ್ಶಾಕ್

ಪಳಯ್ತ್ ಆಶಿಲ್ಲೆಂ ಯೆತಾ ವಯ್ತ್ಲ್ಯಾಂಕ್

ದೃಷ್ಟಿ ತಾಚಿ ಮ್ಹಜೆರ್ ಭೊಂವ್ಲಿ

ಖಿಣಾಕ್ ಆಮಿ ಪಳಯ್ತಚ್ ಉರ್ಲಿಂ

ಮೊನ್ಯಾಂನೀಚ್ ಪಯ್ಲಿಂ ದೊಗಾಂಯ್ ಉಲಯ್ಲಿಂ

ಆನಿ ಕಾಳ್ಕೂಟ್ ತಾಚಿ ಮ್ಹಜ್ಯಾ ಕಾಳ್ಜಾಕ್ ತೊಪ್ಲಿ

ಮ್ಹರ್ಯಾಂತ್ ವಚೂನ್ ಬಾಯ್ ಮ್ಹಣ್ಟಕಚ್ ಹಾಂಸ್ಲೆಂ ತೆಂ

ಕಿತೆಂ ತರಿ ಸಾಂಗೂಂಕ್ ಸೊದ್ತಾಲೆಂ

ಪೂಣ್ ಆಸ್ಲೆಂ ಘಡ್ಯೆ ಎಕ್ ವರ್ಸಾಂಚೆಂ

ಮ್ಹಣೂನ್ ಬಾಬ್ಡೆಂ ದೊಳ್ಯಾನೀಂಚ್ ಬಡ್ಬಡಲೆಂ

ತಾಚ್ಯಾಂತ್ ಆಸ್ಲಿ ಎಕ್ ಆಸ್

ಆಪ್ಣಾಕ್ ಲೊಕಾಂನಿಂ ಪಾರ್ಖುಪಾಕ್

ಆಪ್ಲಿ ಅಪುರ್ಬಾಯ್ ಕರ್ಪಾಕ್

ಆಪ್ಣೆಂ ಸುಖ್ಖಾಂತ್ ಜೀಣ್ ಜಗ್ಪಾಕ್

ಲಾಗ್ಲೆಂ ಧಾಂವ್ಪಾಕ್ ತೆಂ ದಿಮ್ಕುರ್ಯಾನಿಂ

ಮ್ಹಜೀಯ್ ಚಾಲ್ ಚಲ್ಪಾಕ್ ಲಾಗ್ಲಿ

ಸಟ್ಟ್ ಕರೂನ್ ಯೆವಂಕ್ ಲಾಗ್ಲೆಂ ತೆಂ ಫಾಟಿ

“ಆಪ್ಲ್ಯಾಕ್ ಧರ್”

ಹ್ಯಾ ಭಾವ್ನೆಂತ್ಲ್ಯಾನ್ ದುಖ್ಖಾಂ ತಾಚಿಂ ಗಳ್ಳಿಂ

ಭಯ್ಣಿ ಸಾಂಗಾತಾ ಆಸ್ಲೆಂ ಎಕ್ಲೆಂಚ್

ರಡೂಂಕ್ ಲಾಗ್ಲೆಂ ತೆಂ ಪೊಟಾ ಭುಕೆನ್

ಚಿತ್ಲೆಂ ಖಾವಂಕ್ ಹಾಡೂಂಕ್

ಪೂಣ್ ತ್ಯಾ ವೆಳಾರ್ ನಾಸ್ಲೊ ಎಕ್ ರುಪ್ಯಾ ಮ್ಹಜೆ ಕಡೆನ್

ಮ್ಹಜೆಚ್ ಕಡೆನ್ ಹಾಂವ್ ಉಲೊವಂಕ್ ಲಾಗ್ಲೆಂ

ತಾಚ್ಯಾ ಜಾಗ್ಯಾರ್ ಹಾಂವ್ ಜರಿ ಆಸ್ಲೆಂ

ಜಾಲ್ಯಾರ್ ಲೊಕ್ ಮ್ಹಾಕಾ ತರಿ ಸಮ್ಜತಾಶಿಲ್ಲೆ ?

ಮ್ಹಜೆಂ ನಾಂವ್ ಲೊಕಾಂಕ್ ಖಬರ್ ಆಸ್ತಾಶಿಲ್ಲೆ?

ನಾ... ಮ್ಹಜೆ ಜಗಪ್ ವೆಗ್ಳೆ ಆಸಾ

ಮ್ಹಜೆ ಕಡೆನ್ ಘರ್ ದಾರ್ ಸಗ್ಲೆಂ ಆಸಾ

ಮ್ಹಜೆಂ ನಾಂವಾಂ ಸಯ್ತ್ ಅಸ್ತೀತ್ವ್ ಆಸಾ

ಪೂಣ್ ತ್ಯಾ ಮಾಣ್ಕುಲ್ಯಾ ಪೊರಾಚೆ ನಾ

ಸಮಾಜಾಂತ್ ಹಿ ಸ್ಥಿತಿ ಆಸಾಚ್

ದರ್ ದಿಸಾ ಆಸ್ತಾಚ್ ತಶಿಂ ಕಿತ್ಲಿಂ ರಸ್ತ್ಯಾರ್

ಜೆವ್ಣ್ ಖಾಣ್ ನಾ ಜಾಲ್ಯಾರ್

ಸೊದ್ತಾತ್ ಎಕ್ ಬಿ ಕೊಯ್ರಾಚ್ಯಾ ಡಬ್ಯಾಂತ್

ತಾಂಕಾಂ ಆಪ್ಲೆಪಣ್ ದಾಖಯ್ತಾತ್ ಥೊಡಿಂ

ಜಾಲ್ಯಾರ್ ಥೊಡಿಂ ಮ್ಹಣ್ಟಾತ್ ಹಳ್ಶೀಕ್ ತಿಂ

ದಿಸ್ನಾತ್ ತಿಂ ವ್ಹಡ್ಲಿಂ ಪಾಕ್ಲಿ

ಪೂಣ್ ಆಮ್ಚ್ಯಾ ಸಾರ್ಕೀಚ್ ಮನ್ಶಾಂ ತಿಂ

ಶಿರ್ಶಿರತಾ ಕಾತ್ ಪಳೊವ್ನ್ ಹಾಲ್ ತಾಂಚೆ

ಆಸುಂ ಆಮ್ಚೆ ಗಿರೆಸ್ತ್ ಜಾಂವ್ ಗರೀಬ್ ಘರಾಬೆ

ದುರ್ಲಕ್ಷ್ ಕೆನ್ನಾಚ್ ನ್ಹಯ್ ತಾಂಕಾಂ ಕರ್ಚೆಂ

ಕಾರಣ್ ಕೆನ್ನಾ ನಾ ಕೆನ್ನಾ ದಿಸ್ ಯೆತಾಚ್ ತೆ ದರ್ ಎಕ್ಲ್ಯಾಚೆ...

- ಕಾಜಲ್ ಪ್ರಕಾಶ್ ರಾಯ್ಕರ್. [ಮಾಯ್, 2020]