ಜಿಣೆಚಿ ಸಾಂಜ್ (- ಸುನೇತ್ರಾ ಜೋಗ್)

ದಾರ್ ಉಗ್ಡೂನ್ ಪಳಯ್ ಜಾಲ್ಯಾರ್ ದಾರಾತ್ ಯಮ್ ಉಬೊ

ಮ್ಹಣೂಂಕ್ ಲಾಗ್ಲೊ, ಚಲ್ ತುಕಾ ವ್ಹರ್ಪಾಕ್ ಆಯ್ಲಾಂ

ಮ್ಹಾಕಾ ಕಲ್ಲ್ ಜಾಲೆಂ..

ಆತಾಂಚ್ ರೆ, ದೆವಾ? ಹಾಂವೆಂ ಮ್ಹಣ್ಲೆಂ..

ಭುರ್ಗಿಂ ಮ್ಹಜಿಂ ಆಸಾತ್ ಲ್ಹಾನ್, ಮಾತ್ಶಿಂ ತರಿಂ ವ್ಹಡ್ ಜಾವಂ

ತಾಂಕಾಂ ಸೊಡೂನ್ ಕಶೆಂ ಯೆವಂ?

ತಾಕಾ ಮ್ಹಜಿ ಕಾಕೂಟ್ ಆಯ್ಲಿ ಘಡ್ಯೆ,

ಬರೆಂ ತರ್, ಮಾಗೀರ್ ಯೆತಾಂ, ಅಶೆಂ ಮ್ಹಣೂನ್ ತೊ ಗೆಲೊ..

ಜೀವಾಕ್ ಮ್ಹಜ್ಯಾ ಸು ಜಾಲೆಂ..

ಕಾಂಯ್ ವರ್ಸಾಂನಿ ತಿನ್ಸಾಂಜಚೆಂ, ಪರತ್ ಎಕ್ದಾಂ ವಾಜ್ಲೆಂ ದಾರ್

ಉಗ್ಡೂನ್ ಭಾಯ್ರ್ ಪಳಯ್ ಜಾಲ್ಯಾರ್, ಪರತ್ ಯಮ್ ಉಬೊ ದಾರಾರ್

ಯೆತಾ ನ್ಹಿ ಆಯ್ಜ್ ತುಂ? ಪ್ರಸ್ನ್ ತಾಣೆಂ ಕೆಲೊ

ಆರೆ ದೆವಾ, ಕಿತೆಂ ಸಾಂಗುಂ? ಆವ್ರೊ ಮ್ಹಜೊ ಉಡ್ಲೊ..

ಹೆ ಫಾವ್ಟೂಯ್ ಸೊಡ್ ಮ್ಹಾಕಾ, ಭುರ್ಗ್ಯಾಂಕ್ ಮ್ಹಜಿ ಗರಜ್ ಆಸಾ

ಮಾತ್ಶಿಂ ಮಾರ್ಗಾಕ್ ಲಾಗುಂ ತಿಂ, ಮಾಗೀರ್ ಕೆನ್ನಾಯ್ ವ್ಹರ್ ಮ್ಹಾಕಾ..

ಬರೆಂ ತರ್, ಮಾಗೀರ್ ಯೆತಾಂ, ಮಾನೂನ್ ಘೆತಾಂ ತುಜೆಂ ಉತರ್

ಪರತ್ ವಚ್ಪಾಕ್ ಗೆಲೊ ಯಮ್, ಮ್ಹಾಕಾ ವಾಂಗ್ಡಾ ಘೆತ್ಲೆ ಬಗರ್

ಅಶೀಂಚ್ ಕಾಂಯ್ ವರ್ಸಾಂ ಗೆಲಿಂ...

ಭುರ್ಗಿಂ ಮ್ಹಜಿಂ ಜಾಲಿಂ ವ್ಹಡ್, ರಮ್ಲಿಂ ಆಪ್ಲ್ಯಾ ಸಂವ್ಸಾರಾ

ಗೆಲಿಂ ಪಯ್ಸ್ ದಿಗಂತರಾ..

ಭುರ್ಗ್ಯಾ ಬಾಳಾಂನಿಂ ತಾಂಚೆಂ, ಘರ್ ಗೆಲೆಂ ಭರೂನ್

ಹಾಂವ್ ಮಾತ್ ಕಾಡ್ಟಾಂ ದೀಸ್, ಯಾದಿ ತಾಂಚ್ಯೊ ಕಾಢೂನ್..

ಜಿಣೆಚ್ಯಾ ಸಾಂಜ್ವೆಳಾರ್, ರಾವ್ಲಾಂ ಆತಾಂ ಪಳಯ್ತ್ ವಾಟ್

ಯಮ್ ಕೆನ್ನಾ ಯೆತ್ಲೊ?

ವ್ಹರ್ಪಾಕ್ ತುಕಾಂ ಆಯ್ಲಾಂ, ಚಲ್, ಯೊ ಮ್ಹಣ್ಟಲೊ..

ವಾಟ್ ತಾಚಿ ಪಳಯ್ತ್ ರಾವ್ಲಾಂ, ದಾರಾರ್ ಲಾವ್ನ್ ನದರ್

ಕೆನ್ನಾಯ್ ಆಯ್ಲೊ ವ್ಹರೂಂಕ್ ತರಿ, ಕಸ್ಲೀಚ್ ನಾ ಆಡ್ಖಳ್

ಮನಾಕ್ ಮ್ಹಜ್ಯಾ ಜಾತಾತ್ ಭಾಸ್, ಯಮ್ ದಾರಾರ್ ಆಯ್ಲಾ

ಪೂಣ್ ಭುರ್ಗ್ಯಾಂ ವರೀಚ್ ಘಡ್ಯೆ ಮ್ಹಾಕಾ, ತೊ ಲೆಗೀತ್ ವಿಸ್ರಲಾ..

ತೊ ಲೆಗೀತ್ ವಿಸ್ರಲಾ...

- ಸುನೇತ್ರಾ ಜೋಗ್. [ಜನೆರ್, 2020]