ಆಯಿ ಮ್ಹಜಿ ಜಾಣ್ಟಿ ಜಾಲ್ಯಾ (- ಎಡ್ವಿನ್ ಫೆರ್ನಾಂಡಿಸ್)

ತಿಚ್ಯಾ ಹಾತಾಂತ್ ಬೊಡಿ

ಚಲ್ತಾ ಧರುನ್ ವಣ್ಟಿಯೊ

ಯಾದಿ ತಿಚ್ಯೊ ಘುಸ್ಪಲ್ಯಾತ್

ಎಕ್ಲಿಚ್ ರಾವ್ತಾ ಘರಾಂತ್

ತೆಲ್ ಘಾಲುನ್ ಪೆಟಯ್ತ್ ಪಣ್ಟಿಯೊ

ಆಯಿ ತುಂವೆಂ ವೆಂಗೆಂತ್ ಖೆಳಯ್ಲೆಂ

ಉಬ್ ದೀವ್ನ್ ವಾಡಯ್ಲೆಂ ಶಿಕಯ್ಲೆಂ ಮೊಗಾನ್

ಭರಯ್ಲೆಂ ಕರುನ್ ಶಿತಾಚ್ಯೊ ಉಂಡಿಯೊ

ಶಾಳೆಂತ್ ಕೊಲೆಜಿಂತ್ ವೆತಾಲಿಂ ತೆನ್ನಾಂ

ತ್ರಾಸಾಂನಿ ಕರುನ್ ದಿತಾಲಿ ಮ್ಹಾಕಾ

ಗಡ್-ಗಡ್ ಲಾಡ್ವಾಂಚಿಯೊ ಗುಳಿಯೊ

ಸುಖಾಂತ್ ದುಖಾಂತ್ ಸದಾಂಚ್ ಮ್ಹಜ್ಯಾ

ಸಾಂಗಾತಾನ್ ರಾವ್ಲಿ ಆಯಿ ಮ್ಹಜಿ

ಆಯ್ಜ್ ಉಗ್ಡಾಸ್ ಯೆತಾತ್ ತ್ಯೊ ಸುರ್ಬುಸ್ ಯಾದಿ

ಲಗ್ನ್ ಕರುಂಕ್ ಮ್ಹಾಕಾ ತುಂವೆಂ

ಆಶಿಲ್ಲೆಂ ತಿತ್ಲೆಂಯ್ ವಿಕ್ಲೆಂ

ಆನಿ ಘರ್ ಆಮ್ಚೆಂ ಕೆಲೆಂ ಖಾಲಿ

ಆಯಿ ಹ್ಯಾ ವೆಳಾರ್ ತುಕಾ ಗರಜ್ ಮ್ಹಜಿ

ಪುಣ್ ಮ್ಹಾಕಾ ಪಡ್ಲ್ಯಾ ಘೊವಾಚಿ ಚಾವಿ

ಚಿಂತುನ್ ಕಪ್ಲಾಕ್ ಪಡ್ಟಾತ್ ಮಿರಿಯೊ

ಕಸ್ಲೆಂ ಕಾಯ್ ನಶಿಬ್ ಮ್ಹಜೆಂ

ಕೊಣಾಕಚ್ ಆಧಾರ್ ತಿಕಾ ನಾಂ

ದೆವಾ ತುಂಚ್ ಪೆಟಯ್ ತಿಚ್ಯೊ, ಉಜ್ವಾಡಾಚಿಯೊ ಪಣ್ಟಿಯೊ

ದೆವಾ ! ಆಯಿ ಮ್ಹಜಿ ಜಾಣ್ಟಿ ಜಾಲ್ಯಾ

*ಆಯಿ = ಆವಯ್

- ಎಡ್ವಿನ್ ಫೆರ್ನಾಂಡಿಸ್. [ಜುಲಾಯ್, 2020]

ಎಡ್ವಿನ್ ಫೆರ್ನಾಂಡಿಸ್: ಕೊಂಕಣಿ ಸಾಹಿತಿಕ್ ಅಭಿರುಚ್ ಆಸ್ಚ್ಯಾ ಹಾಚಿಂ ಕವಿತಾ ಗೊಂಯ್ಚ್ಯಾ ನೇಮಾಳ್ಯಾಂನಿ ಪರ್ಗಟ್ ಜಾಲ್ಯಾಂತ್. ’ನವಿ ದಿಶಾ’, ಆನಿ ’ಗೊಂಯ್ಚಿ ಭುಂಯ್’ ಮ್ಹಳ್ಳಿಂ ದೋನ್ ಕವಿತೆಚಿಂ ಪುಸ್ತಕಾಂ ಪ್ರಕಾಶಿತ್ ಜಾಲ್ಯಾಂತ್.