आयी म्हजी जाणटी जाल्या (- एडवीन फेर्नांडीस)

तिच्या हातांत बडी

चल्ता धरून वणटियो

यादी तिचियो घुस्पल्यात

एकलीच रावता घरांत

तेल घालून पेटयत पणटियो

आयी तुंवें वेंगेंत खेळयलें

ऊब दीवन वाडयलें शिकयलें मगान

भरयलें करून शिताचियो उणडियो

शाळेंत कलेजिंत वेतालीं तेन्नां

त्रासांनी करून दिताली म्हाका

गड-गड लाडवांचियो गुळियो

सुखांत दुखांत सदांच म्हज्या

सांगातान रावली आयी म्हजी

आयज उगडास येतात तियो सुरबूस यादी

लग्न करुंक म्हाका तुंवें

आशिल्लें तितलेंय विकलें

आनी घर आंचें केलें खाली

आयी ह्या वेळार तुका गरज म्हजी

पूण म्हाका पडल्या घवाची चावी

चिंतून कपलाक पडटात मीऱ्यो

कसलें काय नशीब म्हजें

कणाचच आधार तिका नां

देवा तुंच पेटय तिचियो, उज्वाडाचियो पणटियो

देवा ! आयी म्हजी जाणटी जाल्या

-  एडवीन फेर्नांडीस. [जुलाय, २०२०]

एडवीन फेर्नांडीस: कोंकणी साहितीक अभिरूच आसच्या हाचीं कविता गोंयच्या नेमाळ्यांनी पर्गट जाल्यांत. ’नवी दिशा’, आनी ’गोंयची भुंय’ म्हळ्ळीं दोन कवितेचीं पुसतकां प्रकाशीत जाल्यांत.