ಕವಿತಾकविताPoem

Angddi...! (- Chikka Panglla)

[kovita] Angddi...! (- Chikka Panglla)

Hea somsarant adimagam thaun az pason hi rivaz chalter asa. Ves bodol'leat rup bodol'lam rit bodol'lea punn hi dolldir nit tich dekun ozun pason kovichim utram somajent jieteleak jirounko tras zatat. He vorg-bhed, he devanche donde choloitele ozun monxaponnacho bhongostoll korun asat ani monis ozun hem yemkondd‌ch jivit mholl'lleporim korun dis sarun asat.

Chikko ponglla ek somvedonatmok chintpacho kovi. Tachi kaveall nodor gunddayechi zal'lean tachea kovitemni imajerupar tannem uttomvche vichar khorech zaun somajik orso dhortat mhonncheak hi kovita govai dit. Bakichem voraunko/neraunko tukach soddtam.

[kovita] Angddi...! (- Chikka Panglla)

Angddi...!

mojea gamvant

mojea monant

xikpi mhonncho hamv

bhair sorlom

kuddi ani otmea bhukek

okat dimvchea angddim sodner...

Vechea vatter...

Disle sobar angddi

nana "devam" tokle namvache...

Poilo dan man

tankanch diveam mhonnon...

Unch ninch takche

takddea angddi riglom...

Gol'lear boslole

devachim mukddim nheson

boro khotto

sorg yemkondd

somsarinch mapchem polleun

ott'tte takddenk

patt ghumvddaun ailom...!

bonnam rongancho

istihar dimvche

bautteam angddi gelom...

Angddi bhitor rongin

rosteak demvtach

tambdde zamvche polleun

suttke bautteak matr

molak gheun ailom..!

oddvarlam mhonnon ombemvche

masa angddi paulom...

Pap vasrak

angddi mukar bandun

gairak pattlea daran

mosan vikchem polleun

ek bhatti xenn

araun haddn ailom...!

zannvai vanttche

bukanche angddi riglom ...

Xikpi vachpeank

hallu dholoun

angddi salantuch

nidauchem polleun

mojea pileank

tunturu, balomongollo

usnneak gheun ailom...!

***

angdde bhomvddi sompoun

gomtti vankddi korun

ghora pattim ailom...

Deva tujea namvar

vepar korchea angddink

bohixkar ghaln ailam...!

mojea gamvant...

Mettam mettanim

zatim katinchi khatodd...

Somoddtechi guspodd...

Bhavarthachi usmodd ....

Giraki pixe...

Dekun deva

tuka aslear khuxi...

Tujea namvar hamvem

hea mojea kallzant

'ek angodd' ugaddlear koxi..?!

- Chikka Panglla. [Dec, 2019]

Chikka Panglla: likhnne namvar kovita boromvcho ’hormon rain menddonsa’, ailevar konknni sahitant bhorvoso uttoyil'leant hakai hamv lekhtam. Edoll‌chch aplea kovitechea protibhedhvarim konknni kovitaxetant oplench sthan thir kel'lo ’chikko’. Konknnentlo bhollvont kovi zamvchi khunnam hachethoim mhaka dixttik poddtana mhozo axavad itlochch - toxench zamv.