Anacho Puddvo...! [Chikka Panglla]

Utranchi ras‌ch kovita korun somajik zallizageamni jigg zateleamni hi kovita vachizai ani xikazoi kovita koxi udeta mholl'llem. Hangasor ekeka vollimni kovitechim ekek thikam vachtana oxem bhogota ki, kitengi kallozak apottota, motichea poddodeacher sobhit kanni khonchota.

Somsarant eka monoxeachem yennem zaunko auy-bapui dogamychi dennogi asota punn jinn‌bhor auy movallayechi murt zatana zoddun haddcho bapui sodanch dusmanachem mukhottem nhesun jiemvchi onivaryota. Kuttmachi xist sambhallunk zaitepauttim tachim monim dukam dolleamninch sukotat. Man, protixtta, gourou sorv hostechea dantamporim; dhakounko ek punn chabunk onyek. Hangasor puddvem ek sanketik imaz punn kovitechea vevegollyo imajink itle opurbhayen sozoilam.. Vha! kitem opurbhai hea sadea kovitechi.

[Kovita] Anacho Puddvo...! [Chikka Panglla]

Anacho Puddvo...!

Hamv bhum-i poddlea vella

nitoll lugtta vostrak

borgal aslea kalla

loz kaxtter lipon

anan aplea puddvean

mhaka guttlayil'lo mhonnon

sodamnit puspustali mam-i...!

ek xher‌ tandvak

ghorant bara vantte

bhuke malter

disak ekuch‌ pauttim

hajri galchi doi...

Mamychea palva kuchche ganttir

chil'lor anneancho femrgo tor

anachea mundda burakank

thoim thoim suvi sutan

vhollul'li manachi vom-i...!

genni bhikek labul'lea

naddvara kuddko bhumyt

sokallim taza porzolli

anacho dhovo puddvo

sanjer tambso sodam-i...

Korkottea vota ujeant

sukidhadd poddlelea xetak

anachea ghamachi xekai...!

vhoddlem fest va utsovo

bhuto kolo tombilo

gamvant borem falem

unnem natlem kaim...

Ghorchea komlba pottant

buskott zaite tori

ruka pallam onek

mull ek mholl'lleborim

dhovo puddvo nheson

bhair sortalo an rai...!

Vellan kallachim panam

hallu vollu portitana

kolva pakem vochon

nollea saullechi mell'lli sosai...

Mam-i anachea ghontterant

panch cheddvam suknnim vaddon

dadlea guddank ublim tor

panch torne komble amim

teganim dhorli gadeam deg

anyekleak bomboichi dig

nimannea ped'dak mhaka

golfa dhogi dovant bhijchi pisai...!

kagda panar axar paxar

besamvam, dukham toxem novem

khontixtt bhoinn, bhavachem rinn

mam-i anachea runnak

kuskutt golfa duddu

kitlo laboit purti thonddai...

Mamychea kopolacheo mirio

anache oskot borio

kallachea kantteank bauli

malghoddea manddeanchi pirai...!

faleannea eka‌ sokallim

vaurar zhojchea golfa thollim

ovchit xeuttali khobar kanank

an ani‌ na mholl'llench

dolleank manddlo kallok

dukamnim bhijli‌ remv...

Utta uttim dhaunni bhognnanchi

lamb rund disli vatt gamvchi

uddann ubtana ucharli xinn

anak tujea lagim apoyil'lo

kitlo kotthor tum devo...!

kampkure pai angnnak tenkle

kuttma kinkratti kanank tople

mamyk mogan bhuzaitana

bhavo bhoinnini bollan arailem

bore monis devak lagxile vhoi

usvas dil'lea jinnye datarak

morna pettent pollemvchem

mhaka kalliz konkcho ghai...

Fulam jheleam sumrgar bhoddveak

ana songim dhullik mellchem bhag

puddveak

purxamv xermamv somplo

vaddea gurkaran gunngunntana

adeusa utra man

jivitant poile pauttim

bhavartha orth koddu dislo

"zolmol'lea horyekleak ek dis

moronk zai". !

- Chikka Panglla [Janer 2019]

Chikka Panglla: Likhnne namvar kovita boromvcho ’Hormon Rain Menddonsa’, ailevar konknni sahitant bhorvoso uttoyil'leant hakai hamv lekhtam. Edoll‌chch aplea kovitechea protibhedhvarim konknni kovitaxetant oplench sthan thir kel'lo ’chikko’. Konknnentlo bhollvont kovi zamvchi khunnam hachethoim mhaka dixttik poddtana mhozo axavad itlochch - toxench zamv.