ಆನಾಚೊ ಪುಡ್ವೊ...! [ಚಿಕ್ಕ ಪಾಂಗ್ಳಾ]

ಉತ್ರಾಂಚಿ ರಾಸ್‌ಚ್ ಕವಿತಾ ಕರುನ್ ಸಮಾಜಿಕ್ ಜಾಳಿಜಾಗ್ಯಾಂನಿ ಜಿಗ್ಗ್ ಜಾತೆಲ್ಯಾಂನಿ ಹಿ ಕವಿತಾ ವಾಚಿಜಾಯ್ ಆನಿ ಶಿಕಾಜಯ್ ಕವಿತಾ ಕಶಿ ಉದೆತಾ ಮ್ಹಳ್ಳೆಂ. ಹಾಂಗಾಸರ್ ಎಕೆಕಾ ವಳಿಂನಿ ಕವಿತೆಚಿಂ ಎಕೆಕ್ ಥಿಕಾಂ ವಾಚ್ತಾನಾ ಅಶೆಂ ಭಗತಾ ಕಿ, ಕಿತೆಂಗಿ ಕಾಳಜಾಕ್ ಆಪಟತಾ, ಮತಿಚ್ಯಾ ಪಡದ್ಯಾಚೆರ್ ಸೊಭಿತ್ ಕಾಣಿ ಖಂಚತಾ.

ಸಂಸಾರಾಂತ್ ಎಕಾ ಮನಶ್ಯಾಚೆಂ ಯೆಣೆಂ ಜಾಂವ್ಕ್ ಆವಯ್-ಬಾಪುಯ್ ದೊಗಾಂಯ್ಚಿ ದೇಣಗಿ ಆಸತಾ ಪುಣ್ ಜೀಣ್‌ಭರ್ ಆವಯ್ ಮೊವಾಳಾಯೆಚಿ ಮೂರ್ತ್ ಜಾತಾನಾ ಜೊಡುನ್ ಹಾಡ್ಚೊ ಬಾಪುಯ್ ಸದಾಂಚ್ ದುಸ್ಮಾನಾಚೆಂ ಮುಖೊಟೆಂ ನ್ಹೆಸುನ್ ಜಿಯೆಂವ್ಚಿ ಅನಿವಾರ್ಯತಾ. ಕುಟ್ಮಾಚಿ ಶಿಸ್ತ್ ಸಾಂಭಾಳುಂಕ್ ಜಾಯ್ತೆಪಾವ್ಟಿಂ ತಾಚಿಂ ಮೊನಿಂ ದುಕಾಂ ದೊಳ್ಯಾಂನಿಂಚ್ ಸುಕತಾತ್. ಮಾನ್, ಪ್ರತಿಶ್ಟಾ, ಗವ್ರವ್ ಸರ್ವ್ ಹಸ್ತೆಚ್ಯಾ ದಾಂತಾಂಪರಿಂ; ಧಾಕಂವ್ಕ್ ಏಕ್ ಪುಣ್ ಚಾಬುಂಕ್ ಅನ್ಯೇಕ್. ಹಾಂಗಾಸರ್ ಪುಡ್ವೆಂ ಏಕ್ ಸಾಂಕೇತಿಕ್ ಇಮಾಜ್ ಪುಣ್ ಕವಿತೆಚ್ಯಾ ವೆವೆಗಳ್ಯ ಇಮಾಜಿಂಕ್ ಇತ್ಲೆ ಅಪುರ್ಭಾಯೆನ್ ಸಜಯ್ಲಾಂ.. ವ್ಹಾ! ಕಿತೆಂ ಅಪುರ್ಭಾಯ್ ಹ್ಯಾ ಸಾದ್ಯಾ ಕವಿತೆಚಿ.

[ಕವಿತಾ] ಆನಾಚೊ ಪುಡ್ವೊ...! [ಚಿಕ್ಕ ಪಾಂಗ್ಳಾ]

ಆನಾಚೊ ಪುಡ್ವೊ...!

ಹಾಂವ್ ಭುಂಯ್ ಪಡ್ಲ್ಯಾ ವೆಳಾ

ನಿತಳ್ ಲುಗ್ಟಾ ವಸ್ತ್ರಾಕ್

ಬರ್ಗಾಲ್ ಆಸ್ಲ್ಯಾ ಕಾಳಾ

ಲಜ್ ಕಾಶ್ಟೆರ್ ಲಿಪೊನ್

ಆನಾನ್ ಆಪ್ಲ್ಯಾ ಪುಡ್ವ್ಯಾನ್

ಮ್ಹಾಕಾ ಗುಟ್ಲಾಯಿಲ್ಲೊ ಮ್ಹಣೊನ್

ಸದಾಂನಿತ್ ಪುಸ್ಪುಸ್ತಾಲಿ ಮಾಂಯ್...!

ಏಕ್ ಶ್ಹೆರ್‌ ತಾಂದ್ವಾಕ್

ಘರಾಂತ್ ಬಾರಾ ವಾಂಟೆ

ಭುಕೆ ಮಾಲ್ತೆರ್

ದಿಸಾಕ್ ಎಕುಚ್‌ ಪಾವ್ಟಿಂ

ಹಾಜ್ರಿ ಗಾಲ್ಚಿ ದೋಯ್...

ಮಾಂಯ್ಚ್ಯಾ ಪಾಲ್ವಾ ಕುಚ್ಚೆ ಗಾಂಟಿರ್

ಚಿಲ್ಲರ್ ಆಣ್ಯಾಂಚೊ ಫೆಂರ್ಗೊ ತರ್

ಆನಾಚ್ಯಾ ಮುಂಡಾ ಬುರಾಕಾಂಕ್

ಥಂಯ್ ಥಂಯ್ ಸುವಿ ಸುತಾನ್

ವ್ಹೊಳುಲ್ಲಿ ಮಾನಾಚಿ ವೋಂಯ್...!

ಗೆಣಿ ಭಿಕೆಕ್ ಲಾಬುಲ್ಲ್ಯಾ

ನಾಡ್ವಾರಾ ಕುಡ್ಕೊ ಭುಂಯ್ತ್

ಸಕಾಳಿಂ ತಾಜಾ ಪರ್ಜಳಿ

ಆನಾಚೊ ಧವೊ ಪುಡ್ವೊ

ಸಾಂಜೆರ್ ತಾಂಬ್ಸೊ ಸದಾಂಯ್...

ಕರ್ಕಟ್ಯಾ ವೊತಾ ಉಜ್ಯಾಂತ್

ಸುಕಿಧಾಡ್ ಪಡ್ಲೆಲ್ಯಾ ಶೆತಾಕ್

ಆನಾಚ್ಯಾ ಘಾಮಾಚಿ ಶೆಕಾಯ್...!

ವ್ಹಡ್ಲೆಂ ಫೆಸ್ತ್ ವಾ ಉತ್ಸವ

ಭೂತ ಕೋಲ ತಂಬಿಲ

ಗಾಂವಾಂತ್ ಬೊರೆಂ ಫಾಲೆಂ

ಉಣೆಂ ನಾತ್ಲೆಂ ಕಾಂಯ್...

ಘರ್ಚ್ಯಾ ಕೊಂಲ್ಬಾ ಪೊಟಾಂತ್

ಬುಸ್ಕೊಟ್ ಜಾಯ್ತೆ ತರೀ

ರೂಕಾ ಪಾಳಾಂ ಅನೇಕ್

ಮೂಳ್ ಏಕ್ ಮ್ಹಳ್ಳೆಬರಿಂ

ಧವೊ ಪುಡ್ವೊ ನ್ಹೆಸೊನ್

ಭಾಯ್ರ್ ಸರ್ತಾಲೊ ಆನ್ ರಾಯ್...!

ವೆಳಾನ್ ಕಾಳಾಚಿಂ ಪಾನಾಂ

ಹಾಳೂ ವೊಳೂ ಪರ್ತಿತಾನಾ

ಕೊಲ್ವಾ ಪಾಕೆಂ ವಚೊನ್

ನಳ್ಯಾ ಸಾವ್ಳೆಚಿ ಮೆಳ್ಳಿ ಸಸಾಯ್...

ಮಾಂಯ್ ಆನಾಚ್ಯಾ ಘೊಂಟೆರಾಂತ್

ಪಾಂಚ್ ಚೆಡ್ವಾಂ ಸುಕ್ಣಿಂ ವಾಡೊನ್

ದಾದ್ಲ್ಯಾ ಗುಡಾಂಕ್ ಉಬ್ಲಿಂ ತರ್

ಪಾಂಚ್ ತರ್ನೆ ಕೊಂಬ್ಲೆ ಆಮಿಂ

ತೇಗಾನಿಂ ಧರ್ಲಿ ಗಾದ್ಯಾಂ ದೇಗ್

ಆನ್ಯೆಕ್ಲ್ಯಾಕ್ ಬೊಂಬೊಯ್ಚಿ ದೀಗ್

ನಿಮಾಣ್ಯಾ ಪೆದ್ದಾಕ್ ಮ್ಹಾಕಾ

ಗಲ್ಫಾ ಧಗಿ ದೊವಾಂತ್ ಭಿಜ್ಚಿ ಪಿಸಾಯ್...!

ಕಾಗ್ದಾ ಪಾನಾರ್ ಆಶಾರ್ ಪಾಶಾರ್

ಬೆಸಾಂವಾಂ, ದುಖಾಂ ತಶೆಂ ನವೆಂ

ಖಂತೀಶ್ಟ್ ಭಯ್ಣ್, ಭಾವಾಚೆಂ ರೀಣ್

ಮಾಂಯ್ ಆನಾಚ್ಯಾ ರೂಣಾಕ್

ಕುಸ್ಕುಟ್ ಗಲ್ಫಾ ದುಡು

ಕಿತ್ಲೊ ಲಾಬಯ್ತ್ ಪುರ್ತಿ ಥಂಡಾಯ್...

ಮಾಂಯ್ಚ್ಯಾ ಕಪಲಾಚ್ಯೊ ಮಿರಿಯೊ

ಆನಾಚೆ ಅಸ್ಕತ್ ಬೊರಿಯೊ

ಕಾಳಾಚ್ಯಾ ಕಾಂಟ್ಯಾಂಕ್ ಬಾವ್ಲಿ

ಮಾಲ್ಘಡ್ಯಾ ಮಾಂಡ್ಯಾಂಚಿ ಪಿರಾಯ್...!

ಫಾಲ್ಯಾಣ್ಯಾ ಎಕಾ‌ ಸಕಾಳಿಂ

ವಾವ್ರಾರ್ ಝಜ್ಚ್ಯಾ ಗಲ್ಫಾ ಥಳಿಂ

ಅವ್ಚಿತ್ ಶೆವ್ಟಾಲಿ ಖಬಾರ್ ಕಾನಾಂಕ್

ಆನ್ ಆನಿ‌ ನಾ ಮ್ಹಳ್ಳೆಂಚ್

ದೊಳ್ಯಾಂಕ್ ಮಾಂಡ್ಲೊ ಕಾಳೊಕ್

ದುಕಾಂನಿಂ ಭಿಜ್ಲಿ‌ ರೇಂವ್...

ಉಟಾ ಉಟಿಂ ಧಾವ್ಣಿ ಭೊಗ್ಣಾಂಚಿ

ಲಾಂಬ್ ರೂಂದ್ ದಿಸ್ಲಿ ವಾಟ್ ಗಾಂವ್ಚಿ

ಉಡಾಣ್ ಉಬ್ತಾನಾ ಉಚಾರ್ಲಿ ಶಿಣ್

ಆನಾಕ್ ತುಜ್ಯಾ ಲಾಗಿಂ ಆಪಯಿಲ್ಲೊ

ಕಿತ್ಲೊ ಕಠೋರ್ ತುಂ ದೇವ್...!

ಕಾಂಪ್ಕುರೆ ಪಾಯ್ ಆಂಗ್ಣಾಕ್ ತೆಂಕ್ಲೆ

ಕುಟ್ಮಾ ಕಿಂಕ್ರಾಟಿ ಕಾನಾಂಕ್ ತೊಪ್ಲೆ

ಮಾಂಯ್ಕ್ ಮೋಗಾನ್ ಭುಜಾಯ್ತಾನಾ

ಭಾವ್ ಭಯ್ಣಿನಿ ಬಳಾನ್ ಆರಾಯ್ಲೆಂ

ಬೊರೆ ಮನಿಸ್ ದೆವಾಕ್ ಲಾಗ್ಶಿಲೆ ವ್ಹಯ್

ಉಸ್ವಾಸ್ ದಿಲ್ಲ್ಯಾ ಜಿಣ್ಯೆ ದಾತಾರಾಕ್

ಮೊರ್ನಾ ಪೆಟೆಂತ್ ಪಳೆಂವ್ಚೆಂ

ಮ್ಹಾಕಾ ಕಾಳಿಜ್ ಕೊಂಕ್ಚೊ ಘಾಯ್...

ಫುಲಾಂ ಝೆಲ್ಯಾಂ ಸುಂರ್ಗಾರ್ ಭಡ್ವ್ಯಾಕ್

ಆನಾ ಸಂಗಿಂ ಧುಳಿಕ್ ಮೆಳ್ಚೆಂ ಭಾಗ್

ಪುಡ್ವ್ಯಾಕ್

ಪುರ್ಶಾಂವ್ ಶೆರ್ಮಾಂವ್ ಸಂಪ್ಲೊ

ವಾಡ್ಯಾ ಗುರ್ಕಾರಾನ್ ಗುಣ್ಗುಣ್ತಾನಾ

ಆದೆವ್ಸಾ ಉತ್ರಾ ಮಾನ್

ಜಿವಿತಾಂತ್ ಪಯ್ಲೆ ಪಾವ್ಟಿಂ

ಭಾವಾರ್ಥಾ ಅರ್ಥ್ ಕೊಡು ದಿಸ್ಲೊ

"ಜಲ್ಮಲ್ಲ್ಯಾ ಹರ್ಯೆಕ್ಲ್ಯಾಕ್ ಏಕ್ ದೀಸ್

ಮೊರೊಂಕ್ ಜಾಯ್". !

- ಚಿಕ್ಕ ಪಾಂಗ್ಳಾ [ಜನೆರ್, 2019]