ಆಂಗ್ಡಿ...! [- ಚಿಕ್ಕ ಪಾಂಗ್ಳಾ]

[ಕವಿತಾ]  ಆಂಗ್ಡಿ...! [- ಚಿಕ್ಕ ಪಾಂಗ್ಳಾ]

ಹ್ಯಾ ಸಂಸಾರಾಂತ್ ಆದಿಮಾಗಾಂ ಥಾವ್ನ್ ಆಜ್ ಪಾಸೊನ್ ಹಿ ರಿವಾಜ್ ಚಾಲ್ತೆರ್ ಆಸಾ. ವೇಸ್ ಬದಲ್ಲ್ಯಾತ್ ರೂಪ್ ಬದಲ್ಲಾಂ ರೀತ್ ಬದಲ್ಲ್ಯಾ ಪುಣ್ ಹಿ ದಳ್ದಿರ್ ನೀತ್ ತಿಚ್ ದೆಕುನ್ ಅಜೂನ್ ಪಾಸೊನ್ ಕವಿಚಿಂ ಉತ್ರಾಂ ಸಮಾಜೆಂತ್ ಜಿಯೆತೆಲ್ಯಾಕ್ ಜಿರಂವ್ಕ್ ತ್ರಾಸ್ ಜಾತಾತ್. ಹೆ ವರ್ಗ್-ಭೇದ್, ಹೆ ದೆವಾಂಚೆ ದಂದೆ ಚಲಯ್ತೆಲೆ ಅಜೂನ್ ಮನ್ಶಾಪಣಾಚೊ ಭೊಂಗೊಸ್ತೊಳ್ ಕರುನ್ ಆಸಾತ್ ಆನಿ ಮನಿಸ್ ಅಜೂನ್ ಹೆಂ ಯೆಮ್ಕೊಂಡ್‌ಚ್ ಜಿವಿತ್ ಮ್ಹಳ್ಳೆಪರಿಂ ಕರುನ್ ದೀಸ್ ಸಾರುನ್ ಆಸಾತ್.

ಚಿಕ್ಕ ಪಂಗ್ಳಾ ಏಕ್ ಸಂವೇದನಾತ್ಮಕ್ ಚಿಂತ್ಪಾಚೊ ಕವಿ. ತಾಚಿ ಕಾವ್ಯಾಳ್ ನದರ್ ಗುಂಡಾಯೆಚಿ ಜಾಲ್ಲ್ಯಾನ್ ತಾಚ್ಯಾ ಕವಿತೆಂನಿ ಇಮಾಜೆರುಪಾರ್ ತಾಣೆಂ ಉಟಂವ್ಚೆ ವಿಚಾರ್ ಖರೆಚ್ ಜಾವ್ನ್ ಸಮಾಜಿಕ್ ಅರ್ಸೊ ಧರ್ತಾತ್ ಮ್ಹಣ್ಚ್ಯಾಕ್ ಹಿ ಕವಿತಾ ಗವಾಯ್ ದೀತ್. ಬಾಕಿಚೆಂ ವೊರಾಂವ್ಕ್/ನೆರಾಂವ್ಕ್ ತುಕಾಚ್ ಸೊಡ್ತಾಂ.

[ಕವಿತಾ] ಆಂಗ್ಡಿ...! [- ಚಿಕ್ಕ ಪಾಂಗ್ಳಾ]

ಆಂಗ್ಡಿ...!

ಮೊಜ್ಯಾ ಗಾಂವಾಂತ್

ಮೊಜ್ಯಾ ಮೊನಾಂತ್

ಶಿಕ್ಪಿ ಮ್ಹಣ್ಚೊ ಹಾಂವ್

ಭಾಯ್ರ್ ಸರ್ಲೊಂ

ಕುಡಿ ಆನಿ ಅತ್ಮ್ಯಾ ಭುಕೆಕ್

ಒಕಾತ್ ದಿಂವ್ಚ್ಯಾ ಆಂಗ್ಡಿಂ ಸೊದ್ನೆರ್...

ವೆಚ್ಯಾ ವಾಟೆರ್...

ದಿಸ್ಲೆ ಸಬಾರ್ ಆಂಗ್ಡಿ

ನಾನಾ "ದೆವಾಂ" ತಕ್ಲೆ ನಾಂವಾಚೆ...

ಪಯ್ಲೊ ದಾನ್ ಮಾನ್

ತಾಂಕಾಂಚ್ ದಿವ್ಯಾಂ ಮ್ಹಣೊನ್...

ಊಂಚ್ ನಿಂಚ್ ತಾಕ್ಚೆ

ತಾಕ್ಡ್ಯಾ ಆಂಗ್ಡಿ ರಿಗ್ಲೊಂ...

ಗಲ್ಲ್ಯಾರ್ ಬಸ್ಲಲೆ

ದೆವಾಚಿಂ ಮುಕ್ಡಿಂ ನ್ಹೆಸೊನ್

ಬೊರೊ ಖೊಟೊ

ಸರ್ಗ್ ಯೆಮ್ಕೊಂಡ್

ಸಂಸಾರಿಂಚ್ ಮಾಪ್ಚೆಂ ಪಳೆವ್ನ್

ಒಟ್ಟೆ ತಾಕ್ಡೆಂಕ್

ಪಾಟ್ ಘುಂವ್ಡಾವ್ನ್ ಆಯ್ಲೊಂ...!

ಬಣಾಂ ರಂಗಾಂಚೊ

ಇಸ್ತಿಹಾರ್ ದಿಂವ್ಚೆ

ಬಾವ್ಟ್ಯಾಂ ಆಂಗ್ಡಿ ಗೆಲೊಂ...

ಆಂಗ್ಡಿ ಭಿತರ್ ರಂಗೀನ್

ರಸ್ತ್ಯಾಕ್ ದೆಂವ್ತಾಚ್

ತಾಂಬ್ಡೆ ಜಾಂವ್ಚೆ ಪಳೆವ್ನ್

ಸುಟ್ಕೆ ಬಾವ್ಟ್ಯಾಕ್ ಮಾತ್ರ್

ಮೊಲಾಕ್ ಘೆವ್ನ್ ಆಯ್ಲೊಂ..!

ಅಡ್ವಾರ್ಲಾಂ ಮ್ಹಣೊನ್ ಅಂಬೆಂವ್ಚೆ

ಮಾಸಾ ಆಂಗ್ಡಿ ಪಾವ್ಲೊಂ...

ಪಾಪ್ ವಾಸ್ರಾಕ್

ಆಂಗ್ಡಿ ಮುಕಾರ್ ಬಾಂದುನ್

ಗಾಯ್ರಾಕ್ ಪಾಟ್ಲ್ಯಾ ದಾರಾನ್

ಮೊಸಾನ್ ವಿಕ್ಚೆಂ ಪಳೆವ್ನ್

ಏಕ್ ಭಾಟಿ ಶೆಣ್

ಆರಾವ್ನ್ ಹಾಡ್ನ್ ಆಯ್ಲೊಂ...!

ಜಾಣ್ವಾಯ್ ವಾಂಟ್ಚೆ

ಬುಕಾಂಚೆ ಆಂಗ್ಡಿ ರಿಗ್ಲೊಂ ...

ಶಿಕ್ಪಿ ವಾಚ್ಪ್ಯಾಂಕ್

ಹಾಳೂ ಧಲವ್ನ್

ಆಂಗ್ಡಿ ಸಾಲಾಂತುಚ್

ನಿದಾವ್ಚೆಂ ಪಳೆವ್ನ್

ಮೊಜ್ಯಾ ಪಿಲ್ಯಾಂಕ್

ತುಂತುರು, ಬಾಲಮಂಗಳ

ಉಸ್ಣ್ಯಾಕ್ ಘೆವ್ನ್ ಆಯ್ಲೊಂ...!

***

ಆಂಗ್ಡೆ ಭೊಂವ್ಡಿ ಸಂಪವ್ನ್

ಗೊಮ್ಟಿ ವಾಂಕ್ಡಿ ಕರುನ್

ಘರಾ ಪಾಟಿಂ ಆಯ್ಲೊಂ...

ದೆವಾ ತುಜ್ಯಾ ನಾಂವಾರ್

ವೆಪಾರ್ ಕರ್ಚ್ಯಾ ಆಂಗ್ಡಿಂಕ್

ಬಹಿಷ್ಕಾರ್ ಘಾಲ್ನ್ ಆಯ್ಲಾಂ...!

ಮೊಜ್ಯಾ ಗಾಂವಾಂತ್...

ಮೆಟಾಂ ಮೆಟಾನಿಂ

ಜಾತಿಂ ಕಾತಿಂಚಿ ಖಾತೊಡ್...

ಸಮಡ್ತೆಚಿ ಗುಸ್ಪೊಡ್...

ಭಾವಾರ್ಥಾಚಿ ಉಸ್ಮೊಡ್ ....

ಗಿರಾಕಿ ಪಿಶೆ...

ದೆಕುನ್ ದೆವಾ

ತುಕಾ ಆಸ್ಲ್ಯಾರ್ ಖುಶಿ...

ತುಜ್ಯಾ ನಾಂವಾರ್ ಹಾಂವೆಂ

ಹ್ಯಾ ಮೊಜ್ಯಾ ಕಾಳ್ಜಾಂತ್

'ಏಕ್ ಆಂಗಡ್' ಉಗಾಡ್ಲ್ಯಾರ್ ಕಶಿ..?!

- ಚಿಕ್ಕ ಪಾಂಗ್ಳಾ. [ದಸೆಂಬ್ರ್, 2019]