ಆಧುನಿಕ್ ಶಿಸಾಂಚಿಂ ಭೊಗ್ಣಾಂ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

ವಿಚಾರಲೆಲ್ಯಾ ಅಖಂಡ್ಯಾಕ್

ಕಿತ್ಲೆಂ ದೂಕ್ ಭೊಗ್ಲಾಂಸ್ತಲೆಂ ನ್ಹಯ್!

ಫಕತ್ ತೀರ್ ಮಾರಚಿ ಶಾತಿ

ಅಖಂಡ್ಯಾಕ್ ಆಸಾ ತರ್

ಹಾತಾಂತ್ಲ್ಯಾ ದುಸ್ರ್ಯಾ ಬೊಟಾಂಕ್

ನಾ ಕಿತೆಂ ಮೊಲ್?

ಕೇವಲ್ ನಿಶಾನ್ಯೆ ಸಕ್ತೆರ್ ಹೊಂದ್ವೊನ್

ಫುಡಾರ್ ಪಾರ್ಕಿಲ್ಲ್ಯಾ ದ್ರೋಣಾಕ್

ಶಿಸಾಚಿ ಅಭಿವೃದ್ಧಿ ಕೊಡು ಲಾಗ್ಲಿ ನ್ಹಯ್!

ಆಪ್ಲೊ ಆಧಾರ್-ಖಾಂಬೊ ಕಾಪ್ಚೆ ಫುಡೆಂ

ಅರ್ಪುಂಕ್ ಆಶೆಲ್ಲ್ಯಾ ಬೊಟಾಚಿ ತಾನ್ ಭಾಗಂವ್ಕ್

ಪಾಟಿಂ ಸರಲೆಲ್ಯಾ ಆದಿವಾಸಿಕ್

ನಾತ್‌ಲ್ಲೆಂ ಕಿತೆಂ ರಗ್ತಾಚೆಂ ಮೊಲ್?

ತಿರಾಚೆಂ ಪೋಂತ್ ಸಾರ್ಕ್ಯೆ ನಿಶಾನೆಕ್

ವ್ಹರುನ್ ಪಾವಯಿಲ್ಲೊ ಕೊದಂಡ್

ಕಿತ್ಲೊ ಚುರ್ಚುರ್ಲಾಸ್ತಲೊ ನ್ಹಯ್!

ಲಕ್ಷ್ಯೆಕ್ ಪೂರಕ್ ಮ್ಹಣ್ಚ್ಯಾ 'ಆಂಗ್ಟ್ಯಾಕ್'

ನಿರ್ಜೀವ್ಪಣಾಚಿ ಮುದಿ ಶಿಂವ್ತಾನಾ

ತೀರ್‌ಶಾಸ್ತ್ರಾಚೊ ಸಲ್ವಣೆ-ಉದ್ಗಾರ್

ಆಯ್ಕಲ್ಲೊ ತರಿ ಕಿತ್ಲೊ ಹಳು?

ಹ್ಯಾ ಸವಾಲಾಂಕ್ ಜಾಪಿ ದೀಂವ್ಕ್

ದ್ರೋಣ ತಸಲ್ಯಾ ಗುರುಂಚಿ ಗರ್ಜ್

ಆಧುನಿಕ್ ಸಂಸಾರಾಕ್ ಪಡುನಾ!

ಬಗಾರ್ 'ಏಕಲವ್ಯ' ಜಸೊ ಶಿಸ್ ಮ್ಹಣ್ ಲೆಕುನ್

ಅಶಿರ್ ಚಿಂತ್ಪಾಚ್ಯಾ ಗುರುಂಚ್ಯಾ ಗೊಪಿಣೆಕ್

'ಫಾತರ್' ಜಾವ್ನ್ ವ್ಹಾಪಾರಲೆಲ್ಯಾ ಶಿಸಾಂಚಿಂ ಭೊಗ್ಣಾಂ

ಆಯ್ಕತ್ ತರಿ ಕೊಣ್?

ಸಬ್ದಾಂಚೊ ಅರ್ಥ್:

1.ಅಖಂಡೊ, ಆಂಗ್ಟೊ = ಹಾತಾಚೆಂ‌ ಪಯ್ಲೆಂ ಬೋಟ್ (Thumb)

2.ಕೊದಂಡ್ = ತೀರ್ ಮಾರುಂಕ್ ವ್ಹಾಪಾರಚೆಂ ಹಾತೆರ್ (Bow)

3.ಗೋಪಿಣ್ = ಫಾತರ್ ಮಾರುಂಕ್ ಉಪ್ಕಾರಚಿಂ ಸಾಹೆತ್ (Catapult).

- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್. [ಜುಲಾಯ್, 2020]