ದಾನ್ ಪೇಟ್ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

[ಕವಿತಾ] ದಾನ್ ಪೇಟ್ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

ಭಕ್ತ್, ಫಿತಿಸ್ಪಣ್, ಹಕೀಗತ್ ಹ್ಯಾ ತಿನಾಮಧೆಂ ಜಿಯೆಂವ್ಚ್ಯಾ ಮನಶಾಚಿಂ ರುಪಣಿಂ ಹ್ಯಾ ಕವಿತೆಂತ್ ಸೊಭಿತ್ ರಿತಿನ್ ಪಿಂತ್ರಾಯಿಲ್ಲಿಂ ದಿಸ್ತಾತ್. ಲೊಕಾಚ್ಯಾ ಭಕ್ತೆಚೊ, ಫಿತಿಸ್ಪಣಾಚಿ ಭಿರಾಂತ್ ದಾಕವ್ನ್, ಪೂನ್-ಬೆಸಾಂವಾಚೊ ಅಬ್ಲೇಸ್ ದಾಕವ್ನ್ ಕರ್ಚೊ ಧರ್ಮಿಕ್ ದಂದೊ, ಆನಿ ಹ್ಯಾ ದಂದ್ಯಾಂತ್ ಲಾಚಾರ್, ಕಂಗಾಲ್ ಜಾಂವ್ಚೊ ಗರೀಬ್ ಮನೀಸ್ ಜಿತ್ಲೊ ಗರೀಬ್ ಜಾತಾ ತಿತ್ಲೊಚ್ ಗಿರೇಸ್ತ್ ಜಾತಾ ವೆವೆಗಳ್ಯಾ ಇಮಾಜಿಂಕ್ ದವರ್ನ್ ದಂದೊ ಕರ್ಚೊ. ಭಕ್ತೆಚೊ ಡೊಂಗ್, ಫಿತಿಸ್ಪಣಾಚೆಂ ದಾಕವ್ಪ್ ಅಪ್ಲೊ ನಂಗಾನಾಚ್ ಕರ್ತಾನಾ ಹಕೀಗತ್ ಮಾತ್ ಕೊನಶಾರ್ ರಾವೊನ್ ದುಕಾಚೆಂ ಥೆಂಬೆ ಗಳಂವ್ಚೆಂ ಮಾರ್ಮಿಕ್ ಚಿಂತಪ್, ಹ್ಯಾ ಕವಿತೆಚಿ ಎಕೇಕ್ ವಳ್ ವಾಚುನ್ ಗೆಲ್ಲೆಪರಿಂ ಮನಾಂತ್ ಉದೆವ್ನ್ ಯೆತಾ.

ಗ್ಲಾನಿಶ್ ಮಾರ್ಟಿಸ್ ಯುವಕವಿ, ಹಾಚ್ಯಾ ಕವಿತೆಂನಿ; ಜಾಂವ್ ಭಾಂದಾವಳೆಂತ್, ಅಮೂರ್ತ್ ಇಮಾಜೆಂಚ್ಯಾ ಪಿಂತ್ರಾಂವ್ಣೆಂತ್ ವ ಕವಿತಾ ಥೆಂಬ್ಯಾಂತ್ ಖರೆಂಚ್ ವಿಜ್ಮಿತ್ ಪಾಂವ್ಚೆಂ ಚಿಂತಪ್ ಆಸಾ, ಕೊಂಕಣಿಚೊ ಫುಡಾರ್ ಮತಿಂತ್ ಧರ್ಲೊ ತರ್ ಖಂಡಿತ್ ತೊಂಡಾರ್ ಸಂತೊಸಾಚ್ಯೊ ಹಾಸೊ ಉದೆತಾತ್. ಹ್ಯಾ ಕವಿತೆಚಿ ತಾಂಕ್ ಮಾಪುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ದಾನ್ ಪೇಟ್ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

ದಾನ್ ಪೇಟ್

ಇಮಾಜೆಕ್ ಉಮೊ ದಿವ್ನ್

ಕಿತೆಂ‌ ಪುಣಿ

ಪೆಟ್ಯೆಂತ್ ಘಾಲ್ಯಾರ್

ಮೆಳತ್ 'ಪೂನ್' ಮ್ಹಳ್ಳ್ಯಾ ಭರ್ವಶ್ಯಾನ್

ಘಾಲ್ಲೊ ನೋಟ್ -

'ಆಮಿ ಚೆಪ್‌ಲ್ಲೊ ಕಿತ್ಯಾಕ್?' ಮ್ಹಣ್

ಉಚಾರ್ಚಿ ಶಿಣ್ -

ಇಮಾಜೆಕ್ ಧೊಸ್ತಾ ಕೊಣ್ಣಾ.

ಪೆಟ್ಯೆಚಿ ಅಶೀರ್ ವಾಟ್

ಚಮ್ಕಲ್ಯಾರ್ ಖಜಾನೊ

ಬೀಗ್ ವ್ಹಡ್ ತರಿ

ಭಂಡಾರಾ ವಾಟ್ ಬಿಗಾತ್

ಡಬ್ಬೊ ಗ್ರೇಸ್ತ್ ಪೂಣ್

ಘಾಲ್ಲೊ‌ಚ್ ನಿರ್ಗತಿಕ್ ಜಾಲಾಸ್ತಾಂ

ತಾಣೆಂಚ್ ತಾಂತ್ಲೆ ಮಾತ್ಶೆ ಕಾಡ್ಲ್ಯಾರ್ -

ಸಮಾಜೆಚೊ ವ್ಹಡ್ಲೊ ಚೋರ್ ಕೊಣ್ಣಾ.

ಪೊಟಾಚಿ ದಂಡೊವ್ಣ್

ಪೆಟ್ಯೆಕ್‌ಚ್ ವಚಾಜೆ ತರ್

ಉಪಾಸಾಕ್ ವಳಗ್ ಜಾಲ್ಲ್ಯಾ

ಜಠರಾಚಿ‌ ದೂಕ್

ಆಪ್ಲ್ಯೆ ಭುಕೆಕ್ ಮಾರ್‌ಲ್ಲಿ

ಖೊಟ್ ಜಾವ್ನ್ ಬದ್ಲಾತಾನಾ

ಪಾಜ್ರಾಲ್ಲಿಂ ದುಕಾಂ -

ಪೆಟ್ಯೆಕ್ ರಡಯ್ತಾ ಕೊಣ್ಣಾ.

ಲೊಕ್‌ಡಾವ್ನಾ ವೆಳಾರ್

ಉಗ್ತಾಯ್ಲೆಲ್ಯಾ ಎಕಾ ಪೆಟೆಂತ್

ಪಯ್ಶಾಂರಹಿತ್ ಫುಲಾಕ್ ಪಳೆವ್ನ್

'ಭೊವ್ಶಾ ಪೆಟ್ಯೆಕ್ ಪಡ್ಚೆ

ದುಬ್ಳ್ಯಾಂಚ್ಯಾ ಪೊಟಾಕ್ ಪಾವ್ಲ್ಯಾತ್' ಮ್ಹಣ್

ಇಮಾಜೆಚ್ಯಾ ಮುಖಮಳಾಕ್ ಪಳೆತಾನಾ

ಭುಕ್ ಥಾಂಬ್ಲೆಲ್ಯಾಂಚ್ಯೊ‌ ಹಾಸೊ

ಇಮಾಜೆರ್ ಪರ್ಜಳ್ಳ್ಯೊ.

- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್. [ಜ್ಯೂನ್, 2020]

ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್: ಬಿ.ಎಸ್ಸಿ ಪದ್ವೆಚೆಂ ಶಿಕಪ್ ಜೊಡುನ್ ಆಸ್ಚೊ ಅಲಂಗಾರ್ ಗಾಂವ್ಚೊ ಗ್ಲಾನಿಶ್ ಮಾರ್ಟಿಸ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಪತ್ರಾಂನಿ ತಶೆಂಚ್ ಜಾಳಿಜಾಗ್ಯಾಂನಿ ಕವಿತಾ, ಕಾಣಿಯೊ ತಶೆಂಚ್ ಲೇಖನಾಂ ಬರಯ್ತಾ. ಕೊಂಕಣಿ ಕವಿತೆಕ್ ಫುಲಂವ್ಚ್ಯಾ ದಿಶೆನ್ ಕವಿತಾ ಬರಯ್ತೆಲ್ಯಾ ಯುವಕವಿಂ ಪಯ್ಕಿಂತ್ಲೊ ಹೊ ಎಕ್ಲೊ ಮ್ಹಣುನ್ ಹಾಚ್ಯೊ ಕವಿತಾ ಗವಾಯ್ ದಿತಾತ್.