ಕವಿತಾकविताPoem

ಕೇಕ್ ಆನಿ ಖುನಿ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

[ಕವಿತಾ] ಕೇಕ್ ಆನಿ ಖುನಿ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

ಹಿ ಕವಿತಾ ಥೊಡ್ಯೊ ವಯ್ಚಾರಿಕ್ ಗುಳಿಯೊ ಘೆವ್ನ್ ಆಯ್ಲ್ಯಾತ್ ದೆಕುನ್ ವಾಚ್ಪ್ಯಾಕ್ ಪರತ್ ವಾಚುಂಕ್ ಕರತಾತ್. ಹ್ಯಾ ಕವಿತೆಚ್ಯೊ ಪ್ರಮುಕ್ ಇಮಾಜ್ಯೊ ಪಳೆಯಾತ್; ವಾತ್, ಮನಿಸ್, ತಾಂತಿಯಾಂ. ವಾತ್ ಜಾಯ್ತ್ಯಾ ರಿತಿನ್ ಘೆವ್ಯೆತಾ ಪುಣ್ ಹ್ಯಾ ಕವಿತೆಂತ್ ಮನ್ಶಾನ್ ಆಧಾರ್ಚ್ಯಾ, ಸಮ್ಜುಂಚ್ಯಾ ತಶೆಂಚ್ ಆಚರಣ್ ಕರ್ಚ್ಯಾ ರಿತಿ-ರಿವಾಜಿಂಚೆರ್ ಎಕಾ ರಿತಿಚೊ ಅರ್ಸೊ ಕಸೊ ಧರತಾ. ಮನಿಸ್ ಜಾವ್ನ್ ಜಲ್ಮತಾನಾ ಜಾಂವ್ ವಾ ಜಲ್ಮಾದೀಸ್ ಸಂಭ್ರಮ್ ಕರತಾನಾ ಜಾಂವ್; ಸೊಭಿತ್ ಕೆಕಿಚೆರ್ ಪೆಟಯಿಲ್ಲಿ ವಾತ್ ಪಾಲ್ವತಚ್ ಸಂತೊಸ್ ಪಾವ್ತಾಂವ್. ತೆಂಚ್ ತೊ ಮನಿಸ್ ಜೀವ್ ಸಾಂಡುನ್ ಫೊಂಡಾಕ್ ವೆತಚ್ ತಾಚೊ ತೊ ಫೊಂಡ್ ಪುರುನ್ ತ್ಯಾ ಫೊಂಡಾಚೆರ್ ವಾತಿ ಪೆಟಯ್ತಾಂವ್. ಮ್ಹಳ್ಯಾರ್ ಸುರವಿಲ್ಲ್ಯಾ ಪಂಗ್ತೆಂತ್ ವಾತಿಚಿ ಖುನ್ ಕರುನ್ ಸಂತೊಸ್ ಭಗ್ಚಿಂ ಆತಾಂ ಮನ್ಶಾಚೆಂ ಅಂತ್ಯ್ ಜಾತಾನಾ ತಿ ಪೆಟವ್ನ್ ವೆತಾಂವ್. ಕವಿತೆಂಚ್ ವಿಚಾರ್ ಉಗ್ತ್ಯಾ ಸಂಪ್ಣೆಚೆ ಶಿವಾಯ್ ಧಾಂಪ್ಲೆಲೆ ನ್ಹಯ್ ಆಸ್ತಾಂ ಹ್ಯಾ ಕವಿತೆಚೆ ವಿಚಾರ್ ತ್ಯಾ ತ್ಯಾ ವೆಕ್ತಿನ್ ಸಮ್ಜುಂಚ್ಯಾ ಸಕ್ತೆಚೆರ್ ಸೊಡತಾಂ.

[ಕವಿತಾ] ಕೇಕ್ ಆನಿ ಖುನಿ (- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್)

ಕೇಕ್ ಆನಿ ಖುನಿ

ತಾಂತ್ಯಾಂ ಕರ್ಲಾಂಕ್ ಮಾರುನ್

ಮುಂಡಳ್ಯಾಂಚೆಂ ಮಿಶ್ರಣ್ ಕರ್‍ತಾ

ಸೊಬಿತ್ ಸುಂದರ್ ಕೇಕ್

ಜಾಚೆರ್ ಸಾಕ್ರಿ ಮೇಲ್ ಸುಂರ್ಗಾರುನ್

ತೊಪ್ತಾತ್ ವಾತಿ ಲಾಂವ್ಕ್ ಉಜೊ

ಉಪ್ರಾಂತ್ ಪಾಲ್ವವ್ನ್ ಪಾಚಾರ್‍ತಾ ಕಾಳೊಕ್

ಸೊಬಿತ್ ಮನ್ಶಾ ರೂಪ್ ಘೆವುನ್

ಸಂಸಾರಿ ಆಯಿಲ್ಲ್ಯಾಕ್ ಕಾತ್ರುಂಕ್ ಕರ್‍ತಾ

ರಂಗ್ ರಂಗಾಳ್ ಕೇಕ್

ಸುರಿಯೆ ಧಾರಿಚೊ ಪಯ್ಲೊ ಮಾರ್

ಚಡಯ್ತಾ ಸಂತೊಸ್ ದೊಡ್ತೊ

ಉಪ್ರಾಂತ್ ಪೆಟ್ತಾತ್ ಸಂಭ್ರಮಾ ತಾಳಿಯೊ

ಮನ್ಶಾ ಕುಡಿಂತ್ಲ್ಯಾ ರಗ್ತಾಕ್ ಚಾಕುನ್

ಮಾಸಾಂತ್ ಪುರ್‍ಚ್ಯೆ ಗುಳಿಯೆಕ್ ಕರ್‍ತಾ

ಕೆಕಿ ವಯ್ಲಿ ತಾಂಬ್ಡಿ ಚೆರ್ರಿ

ಜಾಕಾ ಪಳೆವ್ನ್ ಜೀಬ್ ದೆಂವಯ್ತಾ ಉದಕ್

ಗುಳಿಯೆಚಿ ದೂಖ್ ಸೊಸ್ಲೆಲಿ ವಾತ್

ಗಳಯ್ತಾ ರಡ್ಣೆಂ ತಿಚೆ ವಯ್ರ್ ಹುನ್ ಮೇಣ್

ಭೆಸಾಂ ಕರುನ್, ಮುಸ್ಕಾರಾಕ್ ಥಾಪ್ಡುನ್

ಸಮಾಜೆ ಭಾಯ್ರ್ ಲೊಟುಂಕ್ ಕರ್‍ತಾ

ಕೆಕಿಚಿ ಹಿಂಸಾಳ್ ಖುನಿ

ದಿವೆ ಪಾಲ್ವಯಿಲ್ಲೊ ಖುಶೆ-ಅಂದ್ಕಾರ್

ಕ್ರೂರ್‌ಪಣಾಕ್ ದೆಂವಯ್ತಾ ಫೊಂಡಾಂತ್

ತವಳ್ ಫಾಂಕ್ತಾ ಉಜ್ವಾಡ್, ಪೆಟ್ತಾತ್ ವಾತಿ

- ಗ್ಲ್ಯಾನಿಶ್ ಮಾರ್ಟಿಸ್ ಅಲಂಗಾರ್. [ಅಗೊಸ್ತ್, 2020]