ಕವಿತಾकविताPoem

Dan pett (- Glanish Martis Alangar)

[kovita] Dan pett (- Glanish Martis Alangar)

Bhokt, fitisponn, hokigot hea tinamodhem jiemvchea monoxachim ruponnim hea kovitent sobhit ritin pintrayil'lim distat. Lokachea bhoktecho, fitisponnachi bhirant dakoun, pun-besamvacho obles dakoun korcho dhormik dondo, ani hea dondeant lachar, kongal zamvcho gorib monis jitlo gorib zata titloch girest zata vevegollea imajink dourn dondo korcho. Bhoktecho ddong, fitisponnachem dakoup oplo nonganach kortana hokigot mat konoxar ravon dukachem thembe gollomvchem marmik chintop, hea kovitechi ekek voll vachun gel'leporim monant udeun yeta.

Glanish Martis yuvokovi, hachea kovitemni; zamv bhandaullent, omurt imajenchea pintramvnnent vo kovita thembeant khorench vijmit pamvchem chintop asa, konkonnicho fuddar motint dhorlo tor khonddit tonddar sontosacheo haso udetat. Hea kovitechi tank mapunk tukach soddtam.

[kovita] Dan pett (- Glanish Martis Alangar)

Dan pett

imajek umo divn

kitem‌ punni

pettyent ghalear

mellot 'pun' mholl'llea bhorvoxean

ghal'lo nott -

'ami chep‌l'lo kiteak?' mhonn

uchar‌chi xinn -

imajek dhosta konn'nna.

Pettyechi oxir vatt

chomkolear khozano

big vhodd tori

bhonddara vatt bigat

ddobbo grest punn

ghal'lo‌ch nirgotik zalastam

tannench tantle matxe kaddlear -

somajecho vhoddlo chor konn'nna.

Pottachi donddounn

pettyek‌ch vochaje tor

upasak vollog zal'lea

zotthorachi‌ duk

aplye bhukek mar‌l'li

khott zaun bodlatana

pajral'lim dukam -

pettyek roddoita konn'nna.

Lok‌ddauna vellar

ugtailelea eka pettent

poixamrohit fulak polleun

'bhouxa pettyek poddche

dublleanchea pottak pauleat' mhonn

imajechea mukhomollak polletana

bhuk thambleleancheo‌ haso

imajer porzoll'lleo.

- Glanish Martis Alangar. [Jun, 2020]