ಕವಿತಾकविताPoem

[ಪ್ರಗತಿಪರ್ ಪಾವ್ಲಾಂನಿ ಮುಖ್ಲೆಂ ಮೇಟ್]

This poem is available in its original Kannada only.

ಪ್ರಗತಿಪರ್ ಪಾವ್ಲಾಂನಿ ಮುಖ್ಲೆಂ ಮೇಟ್ ಕಾಡ್ಚ್ಯಾ ಹ್ಯಾ ಸಂಸಾರಾಂತ್ ಅಜೂನ್ ದರಬಸ್ತ್ ಲೋಕ್ ಆಸಾ, ಜೊ ’ದೇವ್-ಧರ್ಮ್’ ಮ್ಹಳ್ಳ್ಯಾ ನಾಂವಾಂನಿ ’ಮಾಟ್-ಮಂತ್ರಾಂ’ ಪಾಟ್ಲ್ಯಾನ್ ಧಾಂವ್ತಾನಾ, ಹಾಂಗಾಸರ್ ಏಕ್ ಕುರು ಕುರು ಮಾಮ ಆಸಾ, ಜೊ ಸರ್ವಸ್ವ್ ಜಾಣಾರಿ, ಆನಿ ಆಪ್ಲ್ಯಾ ದೊಳ್ಯಾಂನಿ ಮೊತಿಯಾಂ ಗಳವ್ನ್ ಪೆಲ್ಯಾಂಚ್ಯಾ ದೊಳ್ಯಾಂತ್ಲಿಂ ದುಃಖಾಂ ಪುಸುನ್ ಕಾಂಯ್ ಮೂಟ್‌ಭರ್ ಭಾತಾಂ ಮಾಗೊನ್ ವರ್ತಲೊ ಹೊ ಕುರು ಕುರು ಮಾಮಾ ಆನಿ ತಾಣೆ ಉಚಾರ್ಚ್ಯಾ ಎಕೆಕಾ ಉತ್ರಾಂನಿ ಕಾಂಯ್ ಕಾಣ್ಯೊಂಚ್ ಲಿಪಯ್ಲ್ಯಾತ್ ಕವಿನ್.

’ಚಿಕ್ಕ ಪಾಂಗ್ಳಾ’ ಲಿಖ್ಣೆನಾಂವಾನ್ ಕೊಂಕ್ಣಿ ಕವಿತಾಶೆತಾಂತ್ ಭರ್ವಶ್ಯಾಚೊ ಕೊಂಬ್ರೊ ಜಾವ್ನ್ ಉದೆಲ್ಲೊ ಹರ್ಮನ್, ಅಪ್ಲ್ಯಾ ಕವಿತಾ ಪ್ರತಿಭೆಕ್ ಲಾಗೊನ್ ಸರ್ವಾಂಕ್ ವ್ಹಳ್ಕಿಚೊ ಜಾಲಾ. ಆಪ್ಲಿಚ್ಚ್ ಮ್ಹಳ್ಳಿ ಶೈಲಿ ಆಸುನ್, ಎಕಾ ನಿರ್ದಿಶ್ಟ್ ಚಿಂತ್ಪಾಕ್ ವೆಂಗುನ್, ವಿಚಾರ್‌ವಂತ್ ಚಿಂತ್ಪಾಚೆ ಚಿಮ್ಟೆ ಕಾಡುನ್, ಜೆಮೆಂವ್ಚ್ಯಾ ಸಮಾಜೆಕ್ ಜಾಗಂವ್ಚಿಂ ಪ್ರೇತನಾಂ ಕರ್ಚ್ಯಾಂತ್ಲೊ ಎಕ್ಲೊ.

ಕವಿತೆಂನಿ ವಿಚಾರ್‌ವಾದಿ ಚಿಂತ್ಪಾಕ್ ವ್ಹಾಳಂವ್ಚಿ ಶ್ಯಾಥಿ ಕೊಂಕ್ಣೆಂತ್ ತರ್‌ಯೀ ಆಸ್ಚಿ ಭೋವ್ ಥೊಡ್ಯಾಂಕ್, ಪುಣ್ ಹ್ಯಾ ಭೋವ್ ಥೊಡ್ಯಾಂ ಪಯ್ಕಿಂತ್ ಹಾಂವ್ ’ಚಿಕ್ಕ ಪಾಂಗ್ಳಾ’ ಕ್ ಲೆಖ್ತಾಂ, ಆನಿ ಚಡ್ತಿಕ್ ವಿವರ್ ದೀನಾಸ್ತಾಂ, ಹ್ಯಾ ಕಾವ್ಯಾ ವ್ಹಾಳ್ಯಾಂತ್ ಉಪ್ಯೆವ್ನ್, ಹ್ಯಾ ವ್ಹಾಳ್ಯಾಚಿ ಗುಂಡಾಯ್ ತಶೆಂಚ್ ತ್ರಾಣ್ ಮೆಜುಂಕ್ ತುಮ್ಕಾಂಚ್ ಸೊಡ್ತಾಂ.

ಕುರು ಕುರು ಮಾಮ..

ಕುರು ಕುರು ಮಾಮ

ಭುರ್ಗ್ಯಾಂ ತುಜ್ಯಾ ಉಭೊ

ಮಾರ್ತಾ ಸತಾಚ್ಯೊ ಬೋಬೊ..

ಫಟ್ ಹಾಂವ್ ಉಲಯ್ನಾ

ಪೊಟಾಕ್ ಹಾಂವ್ ಮಾರಿನಾ

ಮಾಟ್ ಮಂತ್ರ್ ಸುಟಯ್ತಾಂ

ಮೂಟ್ ಭಾತ್ ಕಮಾಯ್ತಾಂ..

ಕುರು ಕುರು ಮಾಮ

ಕುರು ಕುರು ಗಾನ

ನೆಗಾರ್ ಮ್ಹಾಕಾ ಕರ್ಶಿಯ್

ಜೊಡ್ಶಿಯ್ ಪಂಗನಾಮ!

***

ಕುರು ಕುರು ಮಾಮ

ಪರ್ನೆಂ ವರಸ್ ಗೆಲೆಂ

ನವೆಂ ವರಸ್ ಆಯ್ಲೆಂ..

ಪರ್ನ್ಯಾಕ್ ಉಜೊ ಲಾವ್ನ್ ಲಾಸ್

ತರ್ಸ್ಯಾಕ್ ಉದಾಕ್ ಘಾಲ್ನ್ ಪೋಸ್

ಸಗ್ಳೆಂ ಸಾರ್ಕೆಂ ಜಾತೆಲೆಂ ಮಾ!

***

ಕುರು ಕುರು ಮಾಮ

ಕಿರಿಕಿರಿ ಸಂಸಾರ್

ಮನ್ಶಾಕ್ ಮನಿಸ್ ಪಾವ್ತಾನಾ

ಮೊಸೊರ್ ಪಾವ್ತಾ ದೆಂವ್ಚಾರ್..

ವಾಯ್ಟಾಕ್ ಕರುನ್ ಪಾಟ್

ಬರ್‍ಯಾಕ್ ಕರುನ್ ಮೂಖ್

ಚಡ್ಲ್ಯಾರ್ ತುವೆಂ ಖಾಟ್

ಗೊಡ್ಶಿಂಚ್ ಸ್ವಪ್ಣಾಂ ದೆಖ್ತಲೆಂಯ್ ಮಾ!

***

ಕುರು ಕುರು ಮಾಮ

ಪಿರಿ ಪಿರಿ ಪಾವ್ಸ್

ದೋನ್ ದೊಳ್ಯಾಂನಿ ಹಜಾರ್ ದುಃಖಾಂ

ಖಾರ್ ಜಾಲ್ಲಿ ಭೆಟವ್ಣೆ ಕಾಲ್ಸ್..

ಚಾಂದ್ನೆಂಯೀ ಭಿಂಯೆತಾ ಆಮಾಸೆ ರಾತಿಕ್

ಆಂಧ್ಕಾರ್ ಆನ್ವಾರ್ ಪಯ್ಸ್ ಜಾತೆಲೆ

ಉಜ್ವಲ್ ಫಾಂತ್ಯಾರ್

ತುಂ ಧಯ್ರ್ ಸಾಂಡಿನಾಕಾ ಮಾ!

***

ಕುರು ಕುರು ಮಾಮ

ಕುರು ಕುರು ಸಮಾಜ್

ಧರ್ಮಾಚೆ ನಾಂವಿಂ

ಪೊಟ್ ಭರ್ಚ್ಯಾ

ದೊಂತಾಂಚೊ ಆವಾಜ್..

ದೀವ್ಳ್ ಇಗರ್ಜ್ ಮಸ್ಜಿದ್

ದೆವಾಕ್ ಘರಾಂ ಸಭಾರ್

ಗೊರ್ವಾಂಕ್ ಮಾರಿನಾಕಾ

ದುಕೊರ್ ಖಾಯ್ನಾಕಾ

ಮಣ್ಯಾರ್‍ಯಾಂಕ್ ಆಡ್ ರಾವಾನಾಕಾ ಮಾ

ಧರ್ಮ್ ವಿರೋಧಿ ಕರ್ತಿತ್ ಹುಶಾರ್!

***

ಕುರು ಕುರು ಮಾಮ

ಕಟು ಕಟು ಕಿಡೆ

ನಾಂವ್ ನಾಸ್ಲ್ಯಾ ಪಿಡೆ ಶಿಡೆಕ್

ವ್ಹಕಾತ್ ನಾ ವಯ್ಜಾಕಡೆ..

ನಿತಿವಂತಾಂಕ್ ಮಾತ್ರ್ ಖುರಿಸ್

ಸಂಸಾರಿ ಖೆಟಿಂತ್ ಜಾಯ್ತೆ ಬಾರಾಬ್ಬಾಸ್

ಪಾತ್ಕಾಂಚಿ ಘಾತ್ಕ್ಯಾಂಚ್ಯಾ ಹಾತಿಂ

ಖುನಿ ಜಾಯ್ತ್

ಮ್ಹೆಳಿ ಕೂಡ್ ಕಿಡ್ಯಾ ಘಾಸಾಕ್

ಬಲಿ ಜಾಯ್ತ್

ಚತ್ರಾಯ್ ಘೆ ಮಾ!

***

ಕುರು ಕುರು ಮಾಮ

ಕುರು ಕುರು ಗಾನ

ಸಕಾಳ್ ವಚೊನ್ ದನ್ಪಾರ್ ಆಯ್ಲೊ

ಪಾಟಿರ್ ಆಸ್ಲೊ ಸುರ್ಯೊ

ತಳ್ವೆರ್ ನಾಚ್ಲೊ

ವೇಳ್ ಕೊಣಾಕೀ ರಾಕಾನಾ

ಮುಕ್ಲ್ಯಾ ಘರ್ಚಿ ವಾಟ್ ಗುಡ್ಡಾಯ್ಜೆ ಮಾ..

ಪೆಲ್ಯಾಚಿಂ ದುಃಖಾಂ ಪುಸ್ಚಿ

ಮ್ಹಜಿ ಸವಯ್

ಮ್ಹಜ್ಯಾ ಪೊಲ್ಯಾರ್ ದೆಂವ್ಚಿಂ

ಮೊತ್ಯಾಂ ಸವಾಯ್

ಗಾಂವಾನ್ ಗಾಂವ್ ತಾಳೊ ಪಿಂಜುನ್

ಪೋಟ್ ಭರ್ತೆಲ್ಯಾ ಮ್ಹಾಕಾ

ದೆವಾಚೊ ಮಾತ್ರ್ ಆಧಾರ್ ಮಾ!

- ಚಿಕ್ಕ ಪಾಂಗ್ಳಾ [ಜನೆರ್, 2016]

ಚಿಕ್ಕ ಪಾಂಗ್ಳಾ: ಲಿಖ್ಣೆ ನಾಂವಾರ್ ಕವಿತಾ ಬರಂವ್ಚೊ ’ಹರ್ಮನ್ ರಾಯನ್ ಮೆಂಡೊನ್ಸಾ’, ಆಯ್ಲೆವಾರ್ ಕೊಂಕ್ಣಿ ಸಾಹಿತಾಂತ್ ಭರ್ವಸೊ ಉಟಯಿಲ್ಲ್ಯಾಂತ್ ಹಾಕಾಯ್ ಹಾಂವ್ ಲೆಖ್ತಾಂ. ಎದೊಳ್‌ಚ್ಚ್ ಆಪ್ಲ್ಯಾ ಕವಿತೆಚ್ಯಾ ಪ್ರತಿಭೆಧ್ವಾರಿಂ ಕೊಂಕ್ಣಿ ಕವಿತಾಶೆತಾಂತ್ ಅಪ್ಲೆಂಚ್ ಸ್ಥಾನ್ ಥಿರ್ ಕೆಲ್ಲೊ ’ಚಿಕ್ಕ’ ಸದ್ದ್ಯಾಕ್ ಕುವೇಯ್ಟಾಂತ್ ವಾವ್ರ್ ಕರುನ್ ಆಸಾ. ಕೊಂಕ್ಣೆಂತ್ಲೊ ಭಳ್ವಂತ್ ಕವಿ ಜಾಂವ್ಚಿ ಖುಣಾಂ ಹಾಚೆಥಂಯ್ ಮ್ಹಾಕಾ ದಿಶ್ಟಿಕ್ ಪಡ್ತಾನಾ ಮ್ಹಜೊ ಆಶಾವಾದ್ ಇತ್ಲೊಚ್ಚ್ - ತಶೆಂಚ್ ಜಾಂವ್.