ಬಾವ್‌ಟ್ಯಾಚೆಂ ಸ್ವಾತಂತ್ರ್

ಜೆದ್ನಾಂ ಕವಿ ಹೆರಾಂ ಕರ್ನಾಂ ಅಪ್ಲೆ ವಿಚಾರ್ ವೆಕ್ತ್ ಕರ್ತಾ ತೆದ್ನಾಂ ಉದೆಂವ್ಚಿ ಕವಿತಾ ವೆಗ್ಳೆಚ್ ಸುರಾಚಿ ಜಾಂವ್ಕ್ ಪಾವ್ತಾ ಮ್ಹಣ್ಚ್ಯಾಕ್ ಹಿ ಸಾದಿ ಕವಿತಾ ಗೊವಾಯ್. ಹಾಂಗಾಸರ್ ಬಾವ್ಟೊ ಮ್ಹಳ್ಯಾರ್ ಮನ್ಶ್ಯಾಚೊ ಸ್ವತಂತ್ರ್ ಮ್ಹಳ್ಳಿ ಇಮಾಜ್ ಪುಣ್ ಹಾಂಗಾಸರ್ ತೊ ಬಾವ್ಟೊ ಹೆಚ್ಚ್ ಮನ್ಶಾಥಾವ್ನ್ ಕಸೊ, ಕಂಯ್ ಆನಿ ಖಂಯ್ಚ್ಯಾ ರುಪಾರ್ ಆಸಾ ಅನಿ ಹ್ಯಾ ಪಾಟ್ಲೆ ಮಿಸ್ತೆರ್ ಆಮಿ ಸಮ್ಜುಂಕ್ ಸಕ್ಲ್ಯಾರ್ ಆಯ್ಚಿ ಖರಿ ಪರಿಗತ್ ಆಮ್ಚೆಸಮೊರ್ ಉಭಿ ಜಾತಾ.

ಪ್ರಸನ್ನ್ ನಿಡ್ಡೋಡಿ ಸಾದ್ಯಾ ಉತ್ರಾಂನಿ ಸಂಕೀರ್ಣ್ ವಿಶ್ಯಾಂಕ್ ಅಪ್ಲ್ಯಾ ಕವಿತೆಂನಿ ಉತ್ರಾಂವ್ಚಿ ಶ್ಯಾಥಿ ಆಸ್ಚೊ ಕವಿ. ತಾಚೊ ಆಯ್ಲೆವಾರ್ ಪರ್ಗಟ್‌ಲ್ಲೊ ’ತಾನ್’ ಇತ್ಲೊ ಲೊಕಾಮೊಗಾಳ್ ಜಾಲಾ ಮ್ಹಳ್ಯಾರ್ ಚಡಾವತ್ ಪ್ರತಿಯೊ ಯೆದೊಳ್‌ಚ್ ವಿಕೊನ್ ಗೆಲ್ಯಾತ್ ಆನಿ ಹಾಚಿಂ ಕವಿತಾ ಖಾಯ್ಸ್ ಕೆಲ್ಲ್ಯಾಂನಿ ಹಾಚಿಂ ಕವಿತಾ ವಾಚುಂಕ್ ಚಡಿತ್ ಉರ್ಭಾ ಆನಿ ಆಸಕ್ತ್ ಧಾಕಯ್ಲ್ಯಾ. ಹಿ ಕವಿತಾ ಸೊಲುಂಕ್ ತುಕಾಚ್ ಉಲೊ ದಿತಾಂ.

ಬಾವ್‌ಟ್ಯಾಚೆಂ ಸ್ವಾತಂತ್ರ್

ತ್ರೀರಂಗಾಚೊ ಬಾವ್‌ಟೊ ಮ್ಹಜೊ

ರಡ್ತಾ ಆಜ್ ಘಾಲುನ್ ಕಾಳೆಂ ಮುಖೊಟ್

ಬಿರ್ಬಿರೆ ಪಾವ್ಸಾ ಥೆಂಬ್ಯಾ ಸಂಗಿಂ

ಮಿಸ್ಳೊನ್ ರಂಗಾಂತ್ ಗಳಯ್ತಾ ದುಕಾಂ

ಧ್ವಜಾನಿಂ ಉಭ್ಚೆಪ್ರಾಸ್ ಚಡ್ ದಿಸ್ತಾ

ತೊ ’ಸೊಜೆರಾಂಚ್ಯಾ ನಿರ್ಜೀವ್’ ಕುಡಿಚೆರ್

’ದೇಶ್-ಭಕ್ತಿಂಚ್ಯಾ’ ಹಾತಾರ್

ಆನಿ ’ದೇಶ್-ಪ್ರೇಮಿಂಚ್ಯಾ’ ತೊಂಡಾರ್

ದೇಶ್‍ಪ್ರೆಮಾಚೊ ಭಾಯ್ಲೊ ಘುರ್ತ್ ತೆದ್ನಾಂ

ಮಾತಿ, ಮಾನ್, ನಿಸರ್ಗ್ ಆನಿ ಅಹಿಂಸಾ

’ಜಯ್ ಕಿಸಾನ್-ಜೈ ಜವಾನ್’ ಎಕ್ವಟಾಚೆಂ ಬಂದನ್

ಪುಣ್ ಆಜ್ ಉಭೆಂಚ್ ಚಿರ್ಲಾಂ ವಿಕಾಸಾಚ್ಯಾ ಬಾಂದಾರ್

ಬಂಧಿ ಜಾಲಾ ಸ್ವಾತಂತ್ರಾಚೊ ಅಧಿಕಾರ್

ದೊರ್‍ಯೆಚ್ಯಾ ಪಾಸಾರ್, ಮನ್ಶ್ಯಾ-ದಂಗೆಂಚ್ಯಾ ವೆಸಾರ್

ಯೆಕ್ಟಾವ್ನ್ ಲೊಕಾಕ್ ಉಭೊನ್ ಆಸ್ಲೊ ಧ್ವಜಾರ್

ಆಯ್ಚೆಂ ವಾರೆಂ ಕಸ್ಲೆಂ ವಿಕಾಳ್,

ಉಮ್ಕಾಳ್ತಾ ಫಕತ್ತ್ ಸುತಾರ್

- ಪ್ರಸನ್ನ್ ನಿಡ್ಡೋಡಿ [ಮಾರ್ಚ್ 2018]