ಕವಿತಾकविताPoem

ಕೊರೊನಾನ್ ಕೆಲ್ಲೆಂ ಉಗ್ಡಾಪಣ್... (- ಪ್ರಸನ್ನ ನಿಡ್ಡೋಡಿ)

[ಕವಿತಾ] ಕೊರೊನಾನ್ ಕೆಲ್ಲೆಂ ಉಗ್ಡಾಪಣ್... (- ಪ್ರಸನ್ನ ನಿಡ್ಡೋಡಿ)

ಸಂಸಾರಾಂತ್ ಸರ್ವ್ ಭಳ್ವಂತ್ ಅಮೆರಿಕಾ ಸರ್ವ್ ಭಿರಾಂಕುಳ್ ಕೆಮಿಕಲ್ ಬಾಂಬ್, ಪುಣ್ ಹಾಚ್ಯಾಕೀ ಚಡ್ ಭಳ್ವಂತ್ ವೇಳ್. ವೆಳಾಕ್ ಸಂಸಾರಾಚಿಂ ನೇಮಾಂ ಬದ್ಲುಂಕ್ ವೇಳ್ ಲಾಗಾನಾ ಮ್ಹಣ್ಚ್ಯಾಕ್ ಆಮಿ ಗವಾಯ್. ತೆಂಪಾದಿಂ ಆಮಿ ವಾಚುನ್, ಶಿಕುನ್, ಆಯ್ಕುನ್ ತಶೆಂಚ್ ಸಮ್ಜುನ್ ಆಯಿಲ್ಲಿಂ ಚಡ್ತಾವ್ ಸತಾಂ ಆತಾಂ ಬದಲ್ಲ್ಯಾಂತ್. ಹೆಚ್ ಚಿಂತ್ಪಾಚ್ಯಾ ಬುನ್ಯಾದಿಚೆರ್ ಹಿ ಕವಿತಾ ಉಭಿ ಕೆಲ್ಯಾ.

[ಕವಿತಾ] ಕೊರೊನಾನ್ ಕೆಲ್ಲೆಂ ಉಗ್ಡಾಪಣ್... (- ಪ್ರಸನ್ನ ನಿಡ್ಡೋಡಿ)

ಕೊರೊನಾನ್ ಕೆಲ್ಲೆಂ ಉಗ್ಡಾಪಣ್....

ಚರ್ಚ್ ಮಸ್ಜಿದ್ ಮಂದಿರಾಚಿಂ

ದಾರಾಂ ಆಜ್ ಬಂದ್ ಪಡ್ಲ್ಯಾಂತ್

ಸದಾಂ ಆರಾಮಾಯೆನ್ ಆಸ್ಚೊ ದೇವ್

ಆತಾಂ ಭಕ್ತಾಂ ಥಾವ್ನ್ ಪಯ್ಸ್ ಗೆಲಾ

ಪಾದ್ರಿ ಬಾವ್ಡೊ ಬೆಜಾರಾಯೆಂತ್ ಪಡ್ಲಾ

ಪುಜಾರಿ ತೊ ಆಸ್ಕತ್ ದಿಸ್ತಾ

ಮುಲ್ಲಾ ಸಾಯ್ಬ್ ಖಂತಿಷ್ಟ್ ಜಾಲಾ

ಆಯ್ಕಾನಾಸ್ತಾಂ ಅವಾಜ್ ದಾನ್ ಪೆಟಿಂಚೊ

ಎಕ್ವಟಾಂತ್ ಬಳ್ ಆಸಾ ಮ್ಹಣ್ಚೆ

ರಾಜ್ ನೆತಾ ಆಜ್ ಬೊಬೊ ಘಾಲ್ತಾತ್

’ವಿಂಗಡ್ ರಾವಾ ಜಿಯೆತೆಲ್ಯಾತ್

ಎಕ್ವಟ್ ನಾಕಾ ಪಡ್ತೆಲ್ಯಾತ್....’

ಕಾಮ್ಗಾರ್ ಬಾವ್ಡೆ ಪೊಟಾಕ್ ಹಾತ್ ಲಾವ್ನ್

ಮೂಟ್ ಶಿತಾಕ್ ಆನಿ ಸಾವ್ಳಿ ವೊತಾಕ್

ಆಕ್ಲಾಸ್ ಕರ್ತಾತ್ ರಾತ್-ದೀಸ್

ನೆತಾ ಆಜೂನ್‍ಯ್ ಲೇಕ್ ಘಾಲ್ತಾ ನೊಟಾಂಕ್

ಖರ್ಗ್ ಮಾರೆಕಾರ್ ದುಬ್ಳ್ಯಾ-ದಾಕ್ಟ್ಯಾಚೆಂರ್

ನಾ ತಾಕಾ ಧರ್ಮ್ ಯಾ ದಾತಾರ್

ಪೊಲಿಸ್, ಡೊಕ್ಟರ್, ನರ್ಸ್, ಸುಭೆದಾರ್

ತೆಚ್ ಆಜ್ ಜಾಲ್ಯಾತ್ ಸಡ್ವೊಣ್ದಾರ್

ಭುಕೆಲ್ಲ್ಯಾ ಪೊಟಾಕ್ ರೇಶನ್ ಲಾಯ್ನಿರ್

ಮ್ಹಜೆ ತಸ್ಲ್ಯಾ ಸಬಾರ್ ಪರ್ದೆಶಾಂಕ್

ದೇವ್ ಖರೊಚ್ ದಿಸ್ಲೊ

ಮೊಗಾನ್ ದಿಲ್ಲ್ಯಾ ಖಾಣಾಚ್ಯಾ ಉಂಡ್ಯೆಂತ್

ಧನ್ಯವಾದ್ ತುಕಾ ಕೊರೊನಾ

ಆಶೆಂ ಯೆದೊಳ್ ಕೊಣೀ ಆಯ್ಕೊಂಕ್ನಾಂ

ಸಂಸಾರಾಕ್ ಉಗ್ಡಾಪಣ್ ಕೆಲೆಂಯ್ ತುವೆಂ

ಸ್ವಾರ್ಥಿ ವ್ಯಕ್ತಿನ್‍ಚ್ ರಚ್ಲಾ ’ಆಪಾಪ್ಲೊ ದೇವ್....’?

- ಪ್ರಸನ್ನ ನಿಡ್ಡೋಡಿ. [ಜ್ಯೂನ್, 2020]
ಪ್ರಸನ್ನ ನಿಡ್ಡೋಡಿ: ಲಿಖ್ಣೆಂ ನಾಂವಾರ್ ಬರಂವ್ಚೊ ಹಿಲರಿ ಡಿ’ಸಿಲ್ವಾ ಮುಂಬಯಾಂತ್ ಕ್ರಿಯಾಳ್ ಕೊಂಕ್ಣಿ ಮೋಗಿ, ಏಕ್ ನಿರ್ದೇಶಕ್, ಬರಯ್ಣಾರ್, ವಿಮರ್ಶಕ್, ಕವಿ. ’ತಾನ್’ ಹಾಚ್ಯಾ ಕೊಂಕಣಿ ಕವಿತೆಂಚೊ ಜಮೊ 2018 ಇಸ್ವೆಂತ್ ಪರ್ಗಟ್ಲಾ. ಕೊಂಕ್ಣಿ, ಮರಾಠಿ, ಹಿಂದಿ ಕವಿತೆಂಚೆರ್ ಅಧ್ಯಯನ್ ಕರುನ್ ಆಸ್ಚೊ ಪ್ರಸನ್ನ ನಿಡ್ಡೋಡಿ ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡುಂಕ್ ಸಕ್ಲಾ, ತಶೆಂಚ್ ಮುಂಬಯಾಂತ್ ಸಭಾರ್ ಕವಿಗೋಶ್ಟಿಂನಿ ವಾಂಟೊ ಘೆತ್ಲಾ.