कोरोनान केल्लें उगडापण.... (- प्रसन्न निड्डोडी)

दारां आज बंद पडल्यांत

सदां आरामायेन आसचो देव

आतां भक्तां थावन पयस गेला

पाद्री बावडो बेजारायेंत पडला

पुजारी तो आसकत दिसता

मुल्ला सायब खंतिषट जाला

आयकानासतां अवाज दान पेटिंचो

एकवटांत बळ आसा म्हणचे

राज नेता आज बोबो घाल्तात

’विंगड रावा जियेतेल्यात

एकवट नाका पडतेल्यात....’

कामगार बावडे पोटाक हात लावन

मूट शिताक आनी सावळी वोताक

आकलास कर्तात रात-दीस

नेता आजून‍य लेक घाल्ता नोटांक

खर्ग मारेकार दुबळ्या-दाकट्याचेंर

ना ताका धर्म या दातार

पोलीस, डोकटर, नर्स, सुभेदार

तेच आज जाल्यात सडवोणदार

भुकेल्ल्या पोटाक रेशन लायनीर

म्हजे तसल्या सबार पर्देशांक

देव खरोच दिसलो

मोगान दिल्ल्या खाणाच्या उंड्येंत

धन्यवाद तुका कोरोना

आशें येदोळ कोणी आयकोंक्नां

संसाराक उगडापण केलेंय तुवें

स्वार्थी व्यक्तीन‍च रचला ’आपापलो देव....’?

-  प्रसन्न निड्डोडी. [ज्यून, २०२०]

 प्रसन्न निड्डोडी: प्रसन्न निड्डोडी लिखणें नांवार बरंवचो हिलरी डी’सिलवा मुंबयांत क्रियाळ कोंकणी मोगी, एक निर्देशक, बरयणार, विमर्शक, कवी. ’तान’ हाच्या कोंकणी कवितेंचो जमो २०१८ इसवेंत पर्गट्ला. कोंकणी, मराठी, हिंदी कवितेंचेर अध्ययन करून आसचो प्रसन्न निड्डोडी सभार साहितीक स्पर्ध्यांनी इनामां जोडुंक सकला, तशेंच मुंबयांत सभार कविगोश्टिंनी वांटो घेतला.