ಆಶಾವಾದಿ ಕೀರ್ಣ್ (- ಪ್ರಸನ್ನ್ ನಿಡ್ಡೋಡಿ)

ಏಕ್ ಉಜ್ವಾಡಾ ಕಿರಣ್ ತೆಂ

ಮ್ಹಜ್ಯಾ ಜಿಣ್ಯೆ ದೊರ್‍ಯಾರ್

ತೀರ್ ಮಾರುನ್ ಭಿತರ್ ಸರಲೆಂ

ಸಾಂಗಾಲಾಗಲೆಂ- ಪಾಟಿಂ ಪಳೆನಾಕಾ

ಆಶಾವಾದಿ ಹಾಂವ್...

ಸಾಕಾಳಿಂ ಫುಡೆಂ-

ರಾಂದ್ಣಿರ್ ದವರ್ಲೆಲ್ಯಾ ಮೊಡ್ಕೆಂತ್

ಶಿಜೊಂಕ್ ಆಜ್ ತಾಂದುಳ್ ನಾ

ಉದ್ಕಾ ಬದಲಾಕ್ ರಗತ್ ಮ್ಹಜೆಂ

ಹುನೊನಿಂ ಖತ್ಕೊತೊಂಕ್ ಲಾಗಲಾಂ

ಕುಂಡಲ್ಯಾಂತ್ ಶಿಜ್ಚಿ ತರಕಾರಿ

ಮಾಸ್ ಜಾವ್ನ್ ಉಕಡೊಂಕ್ ಲಾಗಲಾಂ....

ಕುಜ್ನಾಂತ್ ದೆಕುನ್ ಭಾಯ್ರ್ ಯೆತಾಂ

ಕೀರ್ಣ್ ಮ್ಹಾಕಾ ವೆಡೊ ಘಾಲತಾ

ಆಂಗಣಾಂತ್ ಚೊವುಂಕ್ ಸಳ್ ಕರತಾ

ಖೆಳಚೆ ಭುರಗೆ ಝಗಡ್ಯಾಂತ್ ಮಗ್ನ್

ಸೆಜಾರಿ ಘರಾ ಪುಜಾ ವ್ಯರ್ಥ್

ಧರಮಾಂಕ್ ಆಮ್ಚ್ಯಾ ಗ್ರಹಣ್ ಲಾಗಲಾಂ...

ಕಿರಣ್ ತೆಂ ಮುಕಾರ್ ವರತಾ

ತಕ್ಲೆರ್ ಆತಾಂ ವೋತ್ ಚಡತಾ

ಕುಶಿಚ್ಯಾ ಜಾಗ್ಯಾರ್ ದೊರೊ ಘಾಲಾ

ತಾಂಚೊ - ಆಮ್ಚೊ ಸಂಬಂಧ್ ಮೊಡಲಾ

ಆಶಾವಾದಿ ಕೀರ್ಣ್ ಸಾಂಗ್ತಾ

ಬದ್ಲಾವಣೆಕ್ ವೇಂಗ್ ಮಾರತಾಂ

ದೆಕುನ್ಂಚ್-

ಪರವಾ ನಾಸತಾಂ ಸದಾಂ ದಿಸತಾ....

- ಪ್ರಸನ್ನ ನಿಡ್ಡೋಡಿ. [ಫೆಬ್ರೆರ್, 2020]

ಪ್ರಸನ್ನ ನಿಡ್ಡೋಡಿ: ಲಿಖ್ಣೆಂ ನಾಂವಾರ್ ಬರಂವ್ಚೊ ಹಿಲರಿ ಡಿ’ಸಿಲ್ವಾ ಮುಂಬಯಾಂತ್ ಕ್ರಿಯಾಳ್ ಕೊಂಕ್ಣಿ ಮೋಗಿ, ಏಕ್ ನಿರ್ದೇಶಕ್, ಬರಯ್ಣಾರ್, ವಿಮರ್ಶಕ್, ಕವಿ. ’ತಾನ್’ ಹಾಚ್ಯಾ ಕೊಂಕಣಿ ಕವಿತೆಂಚೊ ಜಮೊ 2018 ಇಸ್ವೆಂತ್ ಪರ್ಗಟ್ಲಾ. ಕೊಂಕ್ಣಿ, ಮರಾಠಿ, ಹಿಂದಿ ಕವಿತೆಂಚೆರ್ ಅಧ್ಯಯನ್ ಕರುನ್ ಆಸ್ಚೊ ಪ್ರಸನ್ನ ನಿಡ್ಡೋಡಿ ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಜೊಡುಂಕ್ ಸಕ್ಲಾ, ತಶೆಂಚ್ ಮುಂಬಯಾಂತ್ ಸಭಾರ್ ಕವಿಗೋಶ್ಟಿಂನಿ ವಾಂಟೊ ಘೆತ್ಲಾ.