आशावादी कीर्ण(- प्रसन्न निड्डोडी)

[कविता] आशावादी कीर्ण(- प्रसन्न निड्डोडी)

मनीस; कूड, जीव, अतमो, चिंतप, आनी जिणी ह्या सरवांक आपणाव्न जियेंवक सकता. पुण जेदनां चिंतप ऎक आसुन जिवित दुसरे दिशेन चलता, तेदनां विचित्र घडता. पुण ज्ये कितें बदलावण जाता तिच अपली आंवड म्हणुन चिंतुंक लागता तें एका अरथान पिशेपण म्हळ्ळेपरिं भगता. ह्या कवितेंत असल्या एका चिंतपचेर आटोव आसा.

बाब प्रसन्न निड्डॊडिच्यो चडताव कविता अंतर्‌मनाचेर बरयिल्ल्यो, हांगासर्‌यी तसलीच ऎक कविता आसा. ह्या कवितेचें अस्वाद करुंक तुकाच उलो दितां.

[कविता] आशावादी कीर्ण(- प्रसन्न निड्डोडी)

आशावादी कीर्ण

फांत्या सुरयाच्या किरणां मधें

ऎक उज्वाडा किरण तें

म्हज्या जिण्ये दोर्‍यार

तीर मारुन भितर सरलें

सांगालागलें- पाटिं पळेनाका

आशावादी हांव...

साकाळीं फुडें-

रांद्णिर दवर्लेल्या मोड्केंत

शिजोंक आज तांदुळ ना

उद्का बदलाक रगत म्हजें

हुनोनिं खत्कोतोंक लागलां

कुंडल्यांत शिज्ची तरकारि

मास जाव्न उकडोंक लागलां....

कुज्नांत देकुन भाय्र येतां

कीर्ण म्हाका वेडो घालता

आंगणांत चोवुंक सळ करता

खेळचे भुरगे झगड्यांत मग्न

सेजारी घरा पुजा व्यर्थ

धरमांक आम्च्या ग्रहण लागलां...

किरण तें मुकार वरता

तक्लेर आतां वॊत चडता

कुशिच्या जाग्यार दोरो घाला

तांचो - आम्चो संबंध मोडला

आशावादी कीर्ण सांग्ता

बद्लावणेक वॆंग मारतां

देकुनंच-

परवा नासतां सदां दिसता....

- प्रसन्न निड्डोडी. [फेबरेर, २०२०]

प्रसन्न निड्डोडी: प्रसन्न निड्डोडी लिखणें नांवार बरंवचो हिलरी डी’सिलवा मुंबयांत क्रियाळ कोंकणी मोगी, एक निर्देशक, बरयणार, विमर्शक, कवी. ’तान’ हाच्या कोंकणी कवितेंचो जमो २०१८ इसवेंत पर्गट्ला. कोंकणी, मराठी, हिंदी कवितेंचेर अध्ययन करून आसचो प्रसन्न निड्डोडी सभार साहितीक स्पर्ध्यांनी इनामां जोडुंक सकला, तशेंच मुंबयांत सभार कविगोश्टिंनी वांटो घेतला.