Valley Quadros Ajekar Hachea Kanneancher Ek Mottvi Nodor

’Ashawadi’, ’Khillo’, ’Kongal ani tachi Kukkeholl'lli’

Monxa jivitacha prostut porigotent okhkhi jinni, ek auk zaun uranastana doinik jivitant mellan dan dimvcho usvas ghoddie thaun ghoddiek aukasa vhaddaullek mezunk laita.

Prostutentlo monis somsaracha porimitek itlo lagim paula mhollear jitlem tachea chintnank to lagim asa titlem. Hem prokritin dil'lem nisorgantlem monxea vikasachem dennem. Oxem mhonntana hea monxa chintpa sokten ani prokritin taka dil'lea vikasacha dennea thaun zodduun ghet‌l'lea aidam marifat to khasgen kitem apnnaunko pauta tem to tacha khasgecha ya somajecha udor‌goti khatir gollsita. Oxench sahity‌y.

Sahiteak monxacha udor‌gotekhatir gollsuncha poilem sahiti opunn somajecho ek vantto zata. Tea vanttea bhitorlea porimitent taka kitem sogllem bhogunk asa tem to aikon ani polleun bhogta ani tea uprant to tea somajecha udor‌gote khatir vavurta.

Valley Quadros, Ajekar hacha sahiteant osolench bhogap ani tacha somajesovem tacho sombhondh rup rup zholltaka. Tachea edoll pais zal'lea tin mottvea kanneancha zomeank pollelem tor, tacho poilo porgott zal'lo kanneancho zomo zaunasa - ’Ashawadi.

Poilo kanneam zomo - Ashawadi:

Placeholder: the original page gave this picture no description, and none has been written yet. It came from daaiz\daaiz\articles\vim\vmjv1.asp.

Hea Ashawadi kannye zomeant boroinnarachea chintpa soktechea probhavak pollelear kanniank vhalloyil'lea ani tantrikotek upoyogsil'lea xoilek polletana hea kanniantlo naik an boroinnara modhem ek nigudd/osvoxtt riticho sombondh zhollkata. Hangasor ’osvoxtt’ mholl'llo sobdh kiteak vaparla mholl'llevixim sovistar ritir vivorsunk hem lekhon mhaka aukas korun dina zal'lean vachpean ’axavadi’ bukacher nodor ghalyet.

Axavadintlo naik opunn zolma thaun axavadi mholl'lleaporim disanam. Tachea bhitor ek zhuz asa. Hem zhuz antorik zhouz mhonnyet. Hea zhuzachea hor‍yek pamvddear to kitlem zoddta ani hogddaita mholl'llem axavadi ugtean pacharina zalear‌yi hea zhuzant eka kuxin dharmik molank onyeka kuxin noitik molank koxem to aplea jivita zhuzant hater zaun apnnaun gheta mholl'lle vichar asat. Dharmik molank ani noitik vicharank somzon ghemvchem ani vachpeak osvoxtt ritin somzomvchem hem preton mhonnyet.

Hea proitnant tacho ho axavadi tacha somajecha chuklelea dixek koxem zagounko sokat mholl'llo vixoi vachpean hea kanniank mandhun ghemvcha ritivoir adharun asa astam kanniamni lisamv zoddun dimvchem preton khub kelam.

Dusro Kanneam Zomo - ’Khillo’:

Placeholder: the original page gave this picture no description, and none has been written yet. It came from daaiz\daaiz\articles\vim\vmjv1.asp.
Monxan jiemvcha somajek ek zagotik (Universal) ya jeral somaz mhonnon ghetlear hea jeral somajeche sobhar vantte asat. Tanche poiki dharmik vantteachi sozaz‌yi ek. Hi somaz jeral somajentlea hor‍yeklea monxak ekachch mapan lagu zainam. ’khillo’ kanneam zomeant boroinnar tacheach dharmacha somajechim vividh rupam ani addomborik dorlancha ubhar toggottayechi prostutek vollok korun dimvchem proitn korta. Zamv tem acharanchem va vicharanchem. Magnneachem va rozaranche. Gorjechem va addomborachem apnnacha somajentlea dharmik sudharonna voir boroinnaran penkadd bhand‌l'lem rup rup dista. Pokoll‌ponna voir ani hipokresivoir taka viprit xinn ya kantthallo asa. Aplea somajek koxem sudharonnacha vatter vagounko zai mholl'lli khont asa. Thoddea kanniamni hem viporit mhonnon bhogta. Hacho onbhog bhouxa kanniantlem vivoronn vachtana vachpeak khonddit zatolo.

Oxem mhonntana to sompurnn sangasor aplea dhorma teuxim malvola mhonn nhoim. Tachea dhorma bhailea somajentlo huskoi hea kotha zomeant bhorpur asa.

Tisro kanneam zomo - ’kongal ani tachi kukkeholl'lli’:

Placeholder: the original page gave this picture no description, and none has been written yet. It came from daaiz\daaiz\articles\vim\vmjv1.asp. 
Khillo ani axavadintlo ho kothanaik ailevarchea hea kanneam zomeant jeral somaje teuxim choddit dhean dimvchem dison yeta. Aplea bhomvtincha somajek boroinnaran pollemvchi nodor, tea nodrek voraun pollemvi chintpasokot, hea chintpa soktek sahiteacha vortulant upeogsil'li rit hea boroinnaracha poilencha ’axavadi’ ani ’khillo’ kannie zomeacha vicharam pras chodd probhol ani unch mhonn dista. Hi boroinnarache, sahiteantle vhaddaull mhonnon ho khud'd vopta vhoi zalear‌yi, hamv hea vhaddaullek boroinnaran tacha ani somaje modhlea ontorak unnem korchem pramannik proitn mhonnon mandhtam. Kiteak mhollear, jitlo sombondh monxa ani somaje modhlo vaddta, titlo tanche modhlo ontor unno zata. Hangasor vastovik somajeche vichar kanniamni rup gheun udeleat astam, zat, kat, dhorm' vixim chodd meter zainastana zagotik somajecha vicharamvoir sudharonn haddchem pramannik proitn zalam.

Hea tin kanneam zomeamvixim ul'lekh kortana hangasor havem fokot't vicharank matr vinchlam xivai monoronzonak nhoim va kanneank nhoim. Hachem karann‌y bhovo sompem. Vachpean khud'd zaun hea tin‌y pustokank vachun polleun somzomvchem.