ವಲ್ಲಿ ಕ್ವಾಡ್ರಸ್ ಅಜೆಕಾರ್ ಹಾಚ್ಯಾ ಕಾಣ್ಯಾಂಚೆರ್ ಏಕ್ ಮಟ್ವಿ ನದರ್
’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’
ಮನ್ಶಾ ಜಿವಿತಾಚಾ ಪ್ರಸ್ತುತ್ ಪರಿಗತೆಂತ್ ಅಖ್ಖಿ ಜಿಣಿ, ಏಕ್ ಆವ್ಕ್ ಜಾವ್ನ್ ಉರಾನಾಸ್ತಾನಾ ದೈನಿಕ್ ಜಿವಿತಾಂತ್ ಮೆಳಾನ್ ದಾನ್ ದಿಂವ್ಚೊ ಉಸ್ವಾಸ್ ಘಡಿಯೆ ಥಾವ್ನ್ ಘಡಿಯೆಕ್ ಆವ್ಕಾಸಾ ವ್ಹಾಡಾವಳೆಕ್ ಮೆಜುಂಕ್ ಲಾಯ್ತಾ.
ಪ್ರಸ್ತುತೆಂತ್ಲೊ ಮನಿಸ್ ಸಂಸಾರಾಚಾ ಪರಿಮಿತೆಕ್ ಇತ್ಲೊ ಲಾಗಿಂ ಪಾವ್ಲಾ ಮ್ಹಳ್ಯಾರ್ ಜಿತ್ಲೆಂ ತಾಚ್ಯಾ ಚಿಂತ್ನಾಂಕ್ ತೊ ಲಾಗಿಂ ಆಸಾ ತಿತ್ಲೆಂ. ಹೆಂ ಪ್ರಕೃತಿನ್ ದಿಲ್ಲೆಂ ನಿಸರ್ಗಾಂತ್ಲೆಂ ಮನ್ಶ್ಯಾ ವಿಕಾಸಾಚೆಂ ದೆಣೆಂ. ಅಶೆಂ ಮ್ಹಣ್ತಾನಾ ಹ್ಯಾ ಮನ್ಶಾ ಚಿಂತ್ಪಾ ಸಕ್ತೆನ್ ಆನಿ ಪ್ರಕೃತಿನ್ ತಾಕಾ ದಿಲ್ಲ್ಯಾ ವಿಕಾಸಾಚಾ ದೆಣ್ಯಾ ಥಾವ್ನ್ ಜೊಡುಉನ್ ಘೆತ್ಲ್ಲ್ಯಾ ಆಯ್ದಾಂ ಮಾರಿಫಾತ್ ತೊ ಖಾಸ್ಗೆನ್ ಕಿತೆಂ ಆಪ್ಣಾಂವ್ಕ್ ಪಾವ್ತಾ ತೆಂ ತೊ ತಾಚಾ ಖಾಸ್ಗೆಚಾ ಯಾ ಸಮಾಜೆಚಾ ಉದರ್ಗತಿ ಖಾತಿರ್ ಗಳ್ಸಿತಾ. ಅಶೆಂಚ್ ಸಾಹಿತ್ಯ್ಯ್.
ಸಾಹಿತ್ಯಾಕ್ ಮನ್ಶಾಚಾ ಉದರ್ಗತೆಖಾತಿರ್ ಗಳ್ಸುಂಚಾ ಪಯ್ಲೆಂ ಸಾಹಿತಿ ಅಪುಣ್ ಸಮಾಜೆಚೊ ಏಕ್ ವಾಂಟೊ ಜಾತಾ. ತ್ಯಾ ವಾಂಟ್ಯಾ ಭಿತರ್ಲ್ಯಾ ಪರಿಮಿತೆಂತ್ ತಾಕಾ ಕಿತೆಂ ಸಗ್ಳೆಂ ಭೊಗುಂಕ್ ಆಸಾ ತೆಂ ತೊ ಆಯ್ಕೊನ್ ಆನಿ ಪಳೆವ್ನ್ ಭೊಗ್ತಾ ಆನಿ ತ್ಯಾ ಉಪ್ರಾಂತ್ ತೊ ತ್ಯಾ ಸಮಾಜೆಚಾ ಉದರ್ಗತೆ ಖಾತಿರ್ ವಾವುರ್ತಾ.
ವಲ್ಲಿ ಕ್ವಾಡ್ರಸ್, ಅಜೆಕಾರ್ ಹಾಚಾ ಸಾಹಿತ್ಯಾಂತ್ ಅಸಲೆಂಚ್ ಭೊಗಾಪ್ ಆನಿ ತಾಚಾ ಸಮಾಜೆಸವೆಂ ತಾಚೊ ಸಂಭಂಧ್ ರೂಪ್ ರೂಪ್ ಝಳ್ತಾಕಾ. ತಾಚ್ಯಾ ಎದೊಳ್ ಪಾಯ್ಸ್ ಜಾಲ್ಲ್ಯಾ ತೀನ್ ಮಟ್ವ್ಯಾ ಕಾಣ್ಯಾಂಚಾ ಜಮ್ಯಾಂಕ್ ಪಳೆಲೆಂ ತರ್, ತಾಚೊ ಪಯ್ಲೊ ಪರ್ಗಟ್ ಜಾಲ್ಲೊ ಕಾಣ್ಯಾಂಚೊ ಜಮೊ ಜಾವ್ನಾಸಾ - ’ಆಶಾವಾದಿ’.
ಪಯ್ಲೊ ಕಾಣ್ಯಾಂ ಜಮೊ - ಆಶಾವಾದಿ:
ಹ್ಯಾ ಆಶಾವಾದಿ ಕಾಣ್ಯೆ ಜಮ್ಯಾಂತ್ ಬರಯ್ಣಾರಾಚ್ಯಾ ಚಿಂತ್ಪಾ ಸಕ್ತೆಚ್ಯಾ ಪ್ರಭಾವಾಕ್ ಪಳೆಲ್ಯಾರ್ ಕಾಣಿಯಾಂಕ್ ವ್ಹಾಳಯಿಲ್ಲ್ಯಾ ಆನಿ ತಾಂತ್ರಿಕತೆಕ್ ಉಪಯೋಗ್ಸಿಲ್ಲ್ಯಾ ಶೈಲೆಕ್ ಪಳೆತಾನಾ ಹ್ಯಾ ಕಾಣಿಯಾಂತ್ಲೊ ನಾಯಕ್ ಆನ್ ಬರಯ್ಣಾರಾ ಮಧೆಂ ಏಕ್ ನಿಗೂಡ್/ಅಸ್ವಷ್ಟ್ ರಿತಿಚೊ ಸಂಬಂಧ್ ಝಳ್ಕಾತಾ. ಹಾಂಗಾಸರ್ ’ಅಸ್ವಷ್ಟ್’ ಮ್ಹಳ್ಳೊ ಸಬ್ಧ್ ಕಿತ್ಯಾಕ್ ವಾಪಾರ್ಲಾ ಮ್ಹಳ್ಳೆವಿಶಿಂ ಸವಿಸ್ತಾರ್ ರಿತಿರ್ ವಿವರ್ಸುಂಕ್ ಹೆಂ ಲೇಖನ್ ಮ್ಹಾಕಾ ಆವ್ಕಾಸ್ ಕರುನ್ ದೀನಾ ಜಾಲ್ಲ್ಯಾನ್ ವಾಚ್ಪ್ಯಾನ್ ’ಆಶಾವಾದಿ’ ಬುಕಾಚೆರ್ ನದರ್ ಘಾಲ್ಯೆತ್.
ಆಶಾವಾದಿಂತ್ಲೊ ನಾಯಕ್ ಅಪುಣ್ ಜಲ್ಮಾ ಥಾವ್ನ್ ಆಶಾವಾದಿ ಮ್ಹಳ್ಳ್ಯಾಪರಿಂ ದಿಸಾನಾಂ. ತಾಚ್ಯಾ ಭಿತರ್ ಏಕ್ ಝುಜ್ ಆಸಾ. ಹೆಂ ಝುಜ್ ಆಂತರಿಕ್ ಝೌಜ್ ಮ್ಹಣ್ಯೆತ್. ಹ್ಯಾ ಝುಜಾಚ್ಯಾ ಹರ್ಯೆಕ್ ಪಾಂವ್ಡ್ಯಾರ್ ತೊ ಕಿತ್ಲೆಂ ಜೊಡ್ತಾ ಆನಿ ಹೊಗ್ಡಾಯ್ತಾ ಮ್ಹಳ್ಳೆಂ ಆಶಾವಾದಿ ಉಗ್ತ್ಯಾನ್ ಪಾಚಾರಿನಾ ಜಾಲ್ಯಾರ್ಯೀ ಹ್ಯಾ ಝುಜಾಂತ್ ಎಕಾ ಕೂಶಿನ್ ಧಾರ್ಮಿಕ್ ಮೊಲಾಂಕ್ ಅನ್ಯೇಕಾ ಕುಶಿನ್ ನೈತಿಕ್ ಮೊಲಾಂಕ್ ಕಶೆಂ ತೊ ಆಪ್ಲ್ಯಾ ಜಿವಿತಾ ಝುಜಾಂತ್ ಹಾತೆರ್ ಜಾವ್ನ್ ಆಪ್ಣಾವ್ನ್ ಘೆತಾ ಮ್ಹಳ್ಳೆ ವಿಚಾರ್ ಆಸಾತ್. ಧಾರ್ಮಿಕ್ ಮೊಲಾಂಕ್ ಆನಿ ನೈತಿಕ್ ವಿಚಾರಾಂಕ್ ಸಮ್ಜೊನ್ ಘೆಂವ್ಚೆಂ ಆನಿ ವಾಚ್ಪ್ಯಾಕ್ ಅಸ್ವಷ್ಟ್ ರಿತಿನ್ ಸಮ್ಜೊಂವ್ಚೆಂ ಹೆಂ ಪ್ರೇತನ್ ಮ್ಹಣ್ಯೆತ್.
ಹ್ಯಾ ಪ್ರಯತ್ನಾಂತ್ ತಾಚೊ ಹೊ ಆಶಾವಾದಿ ತಾಚಾ ಸಮಾಜೆಚಾ ಚುಕ್ಲೆಲ್ಯಾ ದಿಶೆಕ್ ಕಶೆಂ ಜಾಗಂವ್ಕ್ ಸಕಾತ್ ಮ್ಹಳ್ಳೊ ವಿಶಯ್ ವಾಚ್ಪ್ಯಾನ್ ಹ್ಯಾ ಕಾಣಿಯಾಂಕ್ ಮಾಂಧುನ್ ಘೆಂವ್ಚಾ ರಿತಿವಯ್ರ್ ಆಧಾರುನ್ ಆಸಾ ಆಸ್ತಾಂ ಕಾಣಿಯಾಂನಿ ಲಿಸಾಂವ್ ಜೊಡುನ್ ದಿಂವ್ಚೆಂ ಪ್ರೇತನ್ ಖೂಬ್ ಕೆಲಾಂ.
ದುಸ್ರೊ ಕಾಣ್ಯಾಂ ಜಮೊ - ’ಖಿಳೊ’:
ಮನ್ಶಾನ್ ಜಿಯೆಂವ್ಚಾ ಸಮಾಜೆಕ್ ಏಕ್ ಜಾಗತಿಕ್ (Universal) ಯಾ ಜೆರಾಲ್ ಸಮಾಜ್ ಮ್ಹಣೊನ್ ಘೆತ್ಲ್ಯಾರ್ ಹ್ಯಾ ಜೆರಾಲ್ ಸಮಾಜೆಚೆ ಸಭಾರ್ ವಾಂಟೆ ಆಸಾತ್. ತಾಂಚೆ ಪಯ್ಕಿ ಧಾರ್ಮಿಕ್ ವಾಂಟ್ಯಾಚಿ ಸಜಾಜ್ಯೀ ಏಕ್. ಹಿ ಸಮಾಜ್ ಜೆರಾಲ್ ಸಮಾಜೆಂತ್ಲ್ಯಾ ಹರ್ಯೆಕ್ಲ್ಯಾ ಮನ್ಶಾಕ್ ಎಕಾಚ್ಚ್ ಮಾಪಾನ್ ಲಾಗು ಜಾಯ್ನಾಂ. ’ಖಿಳೊ’ ಕಾಣ್ಯಾಂ ಜಮ್ಯಾಂತ್ ಬರಯ್ಣಾರ್ ತಾಚ್ಯಾಚ್ ಧಾರ್ಮಾಚಾ ಸಮಾಜೆಚಿಂ ವಿವಿಧ್ ರುಪಾಂ ಆನಿ ಆಡಂಬರಿಕ್ ದೊರ್ಲಾಂಚಾ ಉಭಾರ್ ತಗ್ಗಟಾಯೆಚಿ ಪ್ರಸ್ತುತೆಕ್ ವಳೊಕ್ ಕರುನ್ ದಿಂವ್ಚೆಂ ಪ್ರಯತ್ನ್ ಕರ್ತಾ. ಜಾಂವ್ ತೆಂ ಆಚಾರಾಂಚೆಂ ವಾ ವಿಚಾರಾಂಚೆಂ. ಮಾಗ್ಣ್ಯಾಚೆಂ ವಾ ರಜಾರಾಂಚೆ. ಗರ್ಜೆಚೆಂ ವಾ ಆಡಂಬರಾಚೆಂ ಆಪ್ಣಾಚಾ ಸಮಾಜೆಂತ್ಲ್ಯಾ ಧಾರ್ಮಿಕ್ ಸುಧಾರಣಾ ವಯ್ರ್ ಬರಯ್ಣಾರಾನ್ ಪೆಂಕಾಡ್ ಭಾಂದ್ಲ್ಲೆಂ ರೂಪ್ ರೂಪ್ ದಿಸ್ತಾ. ಪೊಕೊಳ್ಪಣಾ ವಯ್ರ್ ಆನಿ ಹಿಪೊಕ್ರೆಸಿವಯ್ರ್ ತಾಕಾ ವಿಪ್ರೀತ್ ಶಿಣ್ ಯಾ ಕಾಂಠಾಳೊ ಆಸಾ. ಆಪ್ಲ್ಯಾ ಸಮಾಜೆಕ್ ಕಶೆಂ ಸುಧಾರಣಾಚಾ ವಾಟೆರ್ ವಾಗಂವ್ಕ್ ಜಾಯ್ ಮ್ಹಳ್ಳಿ ಖಂತ್ ಆಸಾ. ಥೊಡ್ಯಾ ಕಾಣಿಯಾಂನಿ ಹೆಂ ವಿಪರೀತ್ ಮ್ಹಣೊನ್ ಭೊಗ್ತಾ. ಹಾಚೊ ಅನ್ಭೋಗ್ ಭೋವ್ಶಾ ಕಾಣಿಯಾಂತ್ಲೆಂ ವಿವರಣ್ ವಾಚ್ತಾನಾ ವಾಚ್ಪ್ಯಾಕ್ ಖಂಡಿತ್ ಜಾತಲೊ.
ಅಶೆಂ ಮ್ಹಣ್ತಾನಾ ತೊ ಸಂಪೂರ್ಣ್ ಸಾಂಗಾಸರ್ ಆಪ್ಲ್ಯಾ ಧರ್ಮಾ ತೆವ್ಶಿಂ ಮಾಲ್ವಲಾ ಮ್ಹಣ್ ನ್ಹಂಯ್. ತಾಚ್ಯಾ ಧರ್ಮಾ ಭಾಯ್ಲ್ಯಾ ಸಮಾಜೆಂತ್ಲೊ ಹುಸ್ಕೊಯ್ ಹ್ಯಾ ಕಥಾ ಜಮ್ಯಾಂತ್ ಭರ್ಪೂರ್ ಆಸಾ.
ತಿಸ್ರೊ ಕಾಣ್ಯಾಂ ಜಮೊ - ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’:
ಖಿಳೊ ಆನಿ ಆಶಾವಾದಿಂತ್ಲೊ ಹೊ ಕಥಾನಾಯಕ್ ಆಯ್ಲೆವಾರ್ಚ್ಯಾ ಹ್ಯಾ ಕಾಣ್ಯಾಂ ಜಮ್ಯಾಂತ್ ಜೆರಾಲ್ ಸಮಾಜೆ ತೆವ್ಶಿಂ ಚಡಿತ್ ಧ್ಯಾನ್ ದಿಂವ್ಚೆಂ ದಿಸೊನ್ ಯೆತಾ. ಆಪ್ಲ್ಯಾ ಭಂವ್ತಿಂಚಾ ಸಮಾಜೆಕ್ ಬರಯ್ಣಾರಾನ್ ಪಳೆಂವ್ಚಿ ನದರ್, ತ್ಯಾ ನದ್ರೆಕ್ ವೊರಾವ್ನ್ ಪಳೆಂವಿ ಚಿಂತ್ಪಾಸಕತ್, ಹ್ಯಾ ಚಿಂತ್ಪಾ ಸಕ್ತೆಕ್ ಸಾಹಿತ್ಯಾಚಾ ವರ್ತುಲಾಂತ್ ಉಪ್ಯೋಗ್ಸಿಲ್ಲಿ ರೀತ್ ಹ್ಯಾ ಬರಯ್ಣಾರಾಚಾ ಪಯ್ಲೆಂಚಾ ’ಆಶಾವಾದಿ’ ಆನಿ ’ಖಿಳೊ’ ಕಾಣಿಯೆ ಜಮ್ಯಾಚಾ ವಿಚಾರಾಂ ಪ್ರಾಸ್ ಚಡ್ ಪ್ರಭಲ್ ಆನಿ ಊಂಚ್ ಮ್ಹಣ್ ದಿಸ್ತಾ. ಹಿ ಬರಯ್ಣಾರಾಚೆ, ಸಾಹಿತ್ಯಾಂತ್ಲೆ ವ್ಹಾಡಾವಳ್ ಮ್ಹಣೊನ್ ಹೊ ಖುದ್ದ್ ವೊಪ್ತಾ ವ್ಹಯ್ ಜಾಲ್ಯಾರ್ಯೀ, ಹಾಂವ್ ಹ್ಯಾ ವ್ಹಾಡಾವಳೆಕ್ ಬರಯ್ಣಾರಾನ್ ತಾಚಾ ಆನಿ ಸಮಾಜೆ ಮಧ್ಲ್ಯಾ ಅಂತರಾಕ್ ಉಣೆಂ ಕರ್ಚೆಂ ಪ್ರಾಮಾಣಿಕ್ ಪ್ರಯತ್ನ್ ಮ್ಹಣೊನ್ ಮಾಂಧ್ತಾಂ. ಕಿತ್ಯಾಕ್ ಮ್ಹಳ್ಯಾರ್, ಜಿತ್ಲೊ ಸಂಬಂಧ್ ಮನ್ಶಾ ಆನಿ ಸಮಾಜೆ ಮಧ್ಲೊ ವಾಡ್ತಾ, ತಿತ್ಲೊ ತಾಂಚೆ ಮಧ್ಲೊ ಅಂತರ್ ಉಣೊ ಜಾತಾ. ಹಾಂಗಾಸರ್ ವಾಸ್ತವಿಕ್ ಸಮಾಜೆಚೆ ವಿಚಾರ್ ಕಾಣಿಯಾಂನಿ ರೂಪ್ ಘೆವ್ನ್ ಉದೆಲ್ಯಾತ್ ಆಸ್ತಾಂ, ಜಾತ್, ಕಾತ್, ಧರ್ಮ್ ವಿಶಿಂ ಚಡ್ ಮೆತೆರ್ ಜಾಯ್ನಾಸ್ತಾನಾ ಜಾಗತಿಕ್ ಸಮಾಜೆಚಾ ವಿಚಾರಾಂವಯ್ರ್ ಸುಧಾರಣ್ ಹಾಡ್ಚೆಂ ಪ್ರಾಮಾಣಿಕ್ ಪ್ರಯತ್ನ್ ಜಾಲಾಂ.
ಹ್ಯಾ ತೀನ್ ಕಾಣ್ಯಾಂ ಜಮ್ಯಾಂವಿಶಿಂ ಉಲ್ಲೇಖ್ ಕರ್ತಾನಾ ಹಾಂಗಾಸರ್ ಹಾವೆಂ ಫಕತ್ತ್ ವಿಚಾರಾಂಕ್ ಮಾತ್ರ್ ವಿಂಚ್ಲಾಂ ಶಿವಾಯ್ ಮನರಂಜನಾಕ್ ನ್ಹಂಯ್ ವಾ ಕಾಣ್ಯಾಂಕ್ ನ್ಹಂಯ್. ಹಾಚೆಂ ಕಾರಾಣ್ಯ್ ಭೋವ್ ಸಂಪೆಂ. ವಾಚ್ಪ್ಯಾನ್ ಖುದ್ದ್ ಜಾವ್ನ್ ಹ್ಯಾ ತೀನ್ಯ್ ಪುಸ್ತಕಾಂಕ್ ವಾಚುನ್ ಪಳೆವ್ನ್ ಸಮ್ಜೊಂವ್ಚೆಂ.
