ಕವಿತಾकविताPoem

ಮ್ಹಜ್ಯಾ ಗಾಂವಾಂತ್!

ಕವಿತಾ

ಮ್ಹಜ್ಯಾ ಗಾಂವಾಂತ್!

ಜಿಬೆರ್ ಆಗ್ರುಂ ಮಾಂಡ್ತಾನಾ ತೊಂಡಾಕ್ ರೂಚ್ ಲಾಭಾನಾ, ದೊಳ್ಯಾಂಕ್ ಕ್ಯಾಟರಕ್ಟ್ ಜಾತಾನಾ ದಿಶ್ಟ್ ಸುಟಾವಿ ದಿಸಾನಾ. ಪುಣ್ ಹಾಂಗಾ ಜಿಬೆರ್ ಆಗ್ರುಂಯೀ ನಾ ದೊಳ್ಯಾಂನಿ ಕ್ಯಾಟರಕ್ಟ್‌ಯೀ ನಾ. ಮತ್ ಮಾತ್ರ್ ವಿಕಾಳ್ ಜಾವುನ್ ದೊಳ್ಯಾಂ ಸಮೊರ್ ಅಮಾಯಕಾಂಚೆರ್ ಜಾಂವ್ಚೊ ಜುಲುಮ್ ಪಳೆವ್ನ್ ಸವಯೆರ್ ಪಡೊನ್ ’ತೆಂ ಸದಾಂಚೆಂ’ ಮ್ಹಣ್ ಲೆಕುಂಕ್ ಲಾಗ್ಲ್ಯಾತ್. ಏಕ್ ವಿಚಿತ್ರ್ ಪಿಡೆಂತ್ ಮನಿಸ್ ಅಸ್ವಸ್ಥ್ ಜಾಲಾ. ಖಂಯ್ ಥಾವ್ನ್‍ಕಿ ಆಯಿಲ್ಲೊ ಎಕಾ ಥರಾಚೊ ಹಂಕಾರ್ ಮನ್ಶಾಕ್ ’ಅಪುಣ್‍ಚ್ ವರ್ತೊ, ಅಪುಣ್‍ಚ್ ಸಾರ್ಕೊ’ ಮ್ಹಳ್ಳ್ಯಾ ಜಿನ್ಸಾರ್ ಜಿಯೆಂವ್ಚೆಂ ಸದಾಂಚೆಂ ಜಾಲಾಂ. ಎಕಾ ತೆಂಪಾಧಿಂ ಧಿಮ್ಕುರಿಂ ಪಾವ್ಲಾಂನಿ ಪಾವ್ಲಾಂ ಕಾಡುಂಕ್ ಶಿಕ್ಚಿ ಹಿ ಚಾರ್ ದಿಸಾಂಚಿ ಮಿಂಜಾಸ್ಕಿ, ಧಾವೆಂತ್ ಇರೊನ್ ವೆಚ್ಯಾ ಮೆಣಾಚ್ಯಾ ವಾತಿಪರಿಂ ಇರೊನ್ ವೆತಾನಾ ಅಪ್ಣಾಕ್ ಕಿತ್ಲೆಂ ಪೊಕೊರ್ನ್ ಗೆಲಾಂ ತೆಂ ತಡವ್ ಜಾವ್ನ್ ತರ್‌ಯೀ ಸಮ್ಜತಾ. ದೆಕುನ್ ಆತಾಂ ’ಸಗ್ಳೆಂ ಸಾರ್ಕೆಂಚ್ ಆಸಾ’ ಮ್ಹಳ್ಳಿಂ ಬನಾವಟಿ ಆದರ್ಶಾಂಚಿಂ ಮುಕ್ಡಿಂ ತೊಂಡಾಚೆರ್ ನ್ಹೆಸುನ್, ’ವಯ್ಚಾರಿಕತಾ’ ಬಗ್ಲೆನ್ ಲೊಟುನ್ ಕಾಳೊಕಾಚ್ಯಾ ಭುಂಯಾರಾಂತ್ ರಾಜ್ವಟ್ಕಿ ಚಡಯ್ತೆಲ್ಯಾಂಕ್ ಎಕಾ ಖಿಣಾಚಿ ಪಣ್ತೆಚಿ ವಾತ್ ಪೆಟಂವ್ಕ್ ಹಿ ಕವಿತಾ ಪೆಚಾಡ್ತಾ.

ಕವಿ ಮೆಲ್ವಿನ್ ಜೆ. ವಾಸ್ ಅಪ್ರೂಪ್ ಪುಣ್ ಅಪುರ್ಭಾಯೆಚೊ ಕವಿ, ’ಆಟ್ವ್ಯಾ ರಂಗಾಚೊ ಧೊಣು’ ಪುಸ್ತಕಾಂತ್ ಹಾಣೆಂ ಉಭಾರ್ಲೆಲ್ಯೊ ಕಾವ್ಯಾಳ್ ಇಮಾಜೊ ತಶೆಂಚ್ ಸಾಂಕೇತಿಕ್ ರುಪಾಂಚ್ಯೊ ಸಾವ್ಳ್ಯೊ ಕೊಂಕಣಿ ಕಾವ್ಯಾಳ್ ಭಾಗಿಂತ್ ಏಕ್ ಅಥ್ವೊಚ್ ಅನ್ಭೋಗ್ ದಿತಾ. ಹಾಂಗಾಸರ್ ಸಯ್ತ್ ಕವಿತೆಚ್ಯಾ ಎಕೆಕಾ ಕಾಡ್ವ್ಯಾಂತ್ ವಯ್ಚಾರಿಕ್ ಚಿಂತ್ನಾಂಚೊ ವ್ಹಾಳೊ ಆನಿ ಆಯ್ಕನಾತ್ಲೆ, ಪಳೆನಾತ್ಲೆ, ಉಲಯ್ನಾತ್ಲೆ ಮನಿಸ್ ಸಮಾಜೆಂತ್ ಭರೊನ್ ಗೆಲ್ಯಾತ್ ಮ್ಹಳ್ಳೆಂ ಸುಟಾವೆಂ ಸಾಂಗೊನ್ ಗೆಲ್ಲೆಪರಿಂಚ್ ಆಮ್ಚೆಸಮೊರ್ ಏಕ್ ಸವಾಲ್ ಉಭೆಂ ಕರುನ್ ವೆತಾ; ’ಆಮಿಂ ಸಯ್ತ್ ಹ್ಯಾ ತೀನ್ ವರ್ಗಾಚ್ಯಾ ಮನ್ಶಾಂ ಪಯ್ಕಿಂತ್ ಆಸಾಂವ್?’

ಮ್ಹಜ್ಯಾ ಗಾಂವಾಂತ್!

ap-mjv1

ಗಡ್ದೆಚಿ ರಂಗ್‍ಮಾಂಚಿ ಮ್ಹಜ್ಯಾ ಗಾಂವ್ಚೊ ಮಾನ್
ತಾಚಿಂ ಪಾನಾಂ ಉಸಯ್ತಾನಾ ದೀಶ್ಟ್ ಉಚಾರತಾ ಶಿಣ್
ಶಿಂಪಡ್ಲೆಲಿಂ ಪಾತ್ರಾಂ, ಪಿಂಜ್ಲೆಲಿಂ ತಾಂಚಿ ಚಿತ್ರಾಂ
ಆರಾಂವ್ಕ್ ಮೆಳಾನಾತ್ಲೆಲಿಂ ಸುತ್ರಾಂ, ಪರದ್ಯಾರ್ ಖೆಳ್ಚಿಂ
ಜೀವ್ಘಾತ್ ಕರುಂಕ್ ಧಾಂವ್ಚಿಂ ಪಿಂತುರಾಂ.

ಹ್ಯಾ ಪಿಂತುರಾಂತ್,

ಜನನ್ ಆನಿಂ ಮರಣಾ ಮಧ್ಲೆಂ ಪಾಂಪಾಳೆಂ ಪಿಂರ್ಗಾತಾ
ಆವ್ರಾನ್ ಲೊಟುನ್ ಹಾಡ್ಲಲೊ ಮೊಡು ತಾಚ್ಯಾ ಪಂದಾ ಬಸ್ಲಾ
ಸ್ವಪ್ಣಾಂ ಘಾಂಟಾಯಿಲ್ಯಾ ಚಿಲಾಂಕ್ ವ್ಹಾಳಯ್ ಬೊಖೊರತಾ
ದಿವ್ಟೊಣೆ ಉಸ್ಕ್ಯಾರ್ ಆಮಾಸೆ ಬಾಳ್ ಸ್ವಪ್ಣಾಂತ್ ಹಾಸ್ತಾ.

ಕೊಣಾಚ್ಯಾಗೀ ಘಾಮಾಚೊ ಥೆಂಬೊ ನಿತಳ್ ಆಂಕ್ವಾರ್
ಧಾ ಕುಡ್ಕೆ ಕರುನ್ ತಾಂತುಂಯ್ ಸೊಧ್ಚೊ ರಾಯ್ ಕುಂವರ್
ದೊಳ್ಯಾಂಕ್ ಪಟ್ಟೊ, ಹಾತಿಂ ತ್ರಾಸ್, ಮೆಜಾಪ್ ಕಶೆಂ
ತ್ರಾಸಿಚಾ ಕುಲ್ಯಾಕ್ ತೆಂಕೊನ್ ರಾವ್ಲಾಂ ರುಪಿಯಾಂ ಉಶೆಂ.

ಪೆಂಟೆತ್ಲ್ಯಾ ಹೊಕ್ಲೆ ಮಾತ್ಯಾರ್ ಚಿಂಚೆಚೆಂ ಥೊರುಂ
ದೀಸ್ ಬುಡ್ತಾನಾ ಆಂಗ್ಣಾ ಪೊಂತಾರ್ ದಡ್ಬಡ್ಚೆಂ ಗೊರುಂ
ಉಭ್ಚಾ ಪಾಲ್ವಾರ್ ಹಜಾರಾಂನಿ ಮೊರಾ ದೊಳೆ
ಪಾಚ್ವ್ಯಾ ಶೆತಾ ಕಣ್ಶ್ಯಾಂ ಕಣ್ಶ್ಯಾಂಚೆ ಪಿಂಜ್ತಾತ್ ಗಳೆ.

ಫೆಸ್ತಾಕ್ ಆತಾಂ ನೀಬ್‍ಚ್ ನಾಕಾ, ಖ್ಯಾಸ್ತಾಕ್ ಜೀಬ್ ಪಾವ್ತಾ
ಇಜ್ಮೊಲಾ ಕರ್ಡ್ಯಾಂಕ್ ವಾರ್‌ಯ್ ಚಲ್ತಾ, ದೆವಾನಾಂವಿಂ ದೆಂವ್ಚಾರ್‌ಚ್ ಭೊಂವ್ತಾ.
ರಾಂದ್ಚಾ ಖ್ಹುರಾರ್ ಉಜೊ ಪಾಲ್ವಯ್ತಾ ಫಾಂತ್ಯಾಚೆಂ ಆದಾನ್
ದಿಸ್ಪೊಡ್ತೊ ಗ್ರಾಸ್ ಮ್ಹಣ್ತಾನಾ ಆತ್ಮ್ಯಾಚೆಂಯ್ ಜಾತಾ ಮರಣ್

ಶೆಜ್ರಾ ಆಂಗ್ಣಾಂತ್ ಸುಣ್ಯಾಂ ಮಾಜ್ರಾಂಚೊ ಖೆಳ್
ಕೋಣ್ ಮನಿಸ್ ಕೋಣ್ ಮನ್ಜಾತ್ ಧೊಸ್ತಾ ಸವಾಲ್
ತರ್ನ್ಯಾ ಪಾನಾರ್ ಪಾಳ್ಣೆಂ ಬಾಂದ್ಲಲೊ ಧೊವಾ ಥೆಂಬೊ
ಚುನ್ಯಾ ವೆಂಗೆಂತ್ ಸವ್ಕಾಸ್ ದಾಂಪ್ತಾ ದೊಳೊ.

ಕೋಣ್ ಕಿತೆಂಯ್ ಸಾಂಗಾ ಕೋಣ್ ಕಶೆಂಯ್ ಚಲ್ಯಾ
ರಂಗ್‍ಮಾಂಚಿಯೆ ವಯ್ಲ್ಯಾ ವಿದೂಶಕಾಕ್ ಮಾನ್ ಬಾಗಾಯಾ
ಸಭಾಸಾಲಾಂತ್ಲೆ ತೀನ್ ಮಾಂಕೊಡ್ ತಶೆಚ್‌ಗಾ
ಎಕ್ಲೊ ದಾಂಪ್ತಾ ದೊಳೆ, ಎಕ್ಲೊ ಕಾನ್, ಆನಿ ಎಕ್ಲೊ ತೋಂಡ್.
ಮ್ಹಜ್ಯಾ ಗಾಂವಾಂತ್!

[ಸಪ್ಟೆಂಬರ್, 2026]
ಮೆಲ್ವಿನ್ ಜೆ. ವಾಸ್