... ಜಾತ್ರಾ

ಎಕಾ ತೆಂಪಾದಿಂ ಕಾಳೊ-ಧವೊ ಸಂಸಾರ್ ಆಸ್ಲೊ ಆಜ್ ರಂಗಾಳ್ ಜಾಲಾ, ಕಾಳೊ-ಧವ್ಯಾ ಸಂಸಾರಾಂತ್ ಚಡಿತ್ ಮಾಪಾನ್ ಸತ್-ಅಸತ್ ಆಸ್‌ಲ್ಲೆಂ ಪುಣ್ ಆತಾಂ ಮನ್ಶ್ಯಾನ್ ಅಪ್ಲೊ ಸಂಸಾರ್ ಏಕ್ ರಂಗಾಳ್ ಬಜಾರ್ ದೆಕುನ್ ಧಾಖವ್ಚಾಚೆಂಚ್ ಜಿವಿತ್ ಕರ್ನ್ ಘೆತ್ಲಾಂ. ದೆವಾಳಾಕ್ ಗೆಲ್ಯಾರ್ ಮಾತ್ರ್ ಭಕ್ತ್, ದಭಾಜೊ ಕೆಲ್ಯಾರ್ ಮಾತ್ರ್ ಫೆಸ್ತ್ ಆನಿ ದುಡು ದಿಲ್ಯಾರ್ ಮಾತ್ರ್ ಮೋಗ್. ಪುಣ್ ಆಮ್ಚೆ ಅಚಾರ್ ವಿಚಾರ್ ಪೊಕೊಳ್ ಕರ್ನ್ ಆಮ್ಚ್ಯಾ ಬದಲ್ಚ್ಯಾ ರಿತಿ ರಿವಾಜೆಂಚ್ಯಾ ಖಡಪಾಪಂದಾಕ್ ಜಿವಿ ಜಿವಿಚ್ ಉರ್ಡೊಂಚಿ ನೈತಿಕತಾ ಎಕಾ ಕವಿಕ್ ತರ್‌ಯೀ ದಿಸಾನಾಯೆ ವ್ಹಚಾನಾ ನ್ಹಯ್?

ಗೊಂಯ್ಚೊ ನಾಮಣೆಚೊ ಕವಿ ಬಾಬ್ ಗೌರೀಶ್ ವರ್ಣೇಕರ್ ಏಕ್ ಅಸಲಿಚ್ಚ್ ಕವಿತಾ ಘೆವ್ನ್ ಆಯ್ಲಾ. ಕವಿತಾ ಜೆದ್ನಾ ಮನಶ್ಯಾ ಜಿಣಯೆಚೆ ಆಟೆವಿಟೆ ಆನಿ ಸಂಘರ್ಶ್ ಉತ್ರಾಯ್ತಾ ತೆದ್ನಾಂ ತಿ ಸಾದ್ಯಾ ಮನಶಾಚ್ಯಾ ಕಾಳಜಾಕ್ ಲಾಗತಾ ಮ್ಹಣಚ್ಯಾಕ್ ಹಿ ಕಾಂಯ್ ಗೊವಾಯ್ ದೀತ್. ಹೊ ಜಾತ್ರೊ ಕಸಲೊ? ಕಿತ್ಯಾಕ್? ಕೊಣಾಕ್ ಭುಲಂವ್ಕ್, ಕೊಣಾಕ್ ಧಾಖಂವ್ಕ್ ಆನಿ ಕೊಣಾಕ್ ಹಾಲಂವ್ಕ್? ಹಿಂ ಸವಾಲಾಂ ಕಾಂಯ್ ಎಕೆಕಾ ಪಂಗತೆಚೆರ್ ತುಮ್ಚ್ಯಾ ಮತಿಂತ್ ಉದೆತಿತ್ ಪುಣ್ ಆಮ್ಚ್ಯಾ ಸಮಾಜೆಚ್ಯಾ ಎಕೆಕಾ ಜಾಗ್ಯಾಂನಿ ಜಾಂವ್ಚೊ ಡೋಂಗ್ ಆನಿ ಕಪಟ್ ಅಪುರ್ಭಾಯೆನ್ ಉತ್ರಾಂವ್ಚಿ ಹಿ ಕವಿತಾ ಕಾಂಯ್ ಏಕ್ ಪಾವ್ಟಿಂ ವಾಚುನ್ ವಿಸರ್ಚಿ ಭಿಲ್ಕುಲ್ ನ್ಹಯ್. ಕವಿತೆಚ್ಯಾ ಸಕತೆಕ್ ಮಾಪುಂಕ್ ತುಕಾಚ್ ಸೊಡತಾಂ.

... ಜಾತ್ರಾ

ಪೊಟಾ ಭುಕ ಭಾಗೊವಪಾಕ್

ಫಾಟೀ ದಾಗ ಶೊಕೊವಪಾಕ್

ಪಾಯಾಕ್ ಮಾತೀ ತಿಗೊವಪಾಕ್

.... ಜಾತ್ರೆಕ್

ವಿಚಿತ್ರ ಹೀ ಜಾತ್ರ

ವಳಖುನ್ ವಳಖನಾಶೀಲ್ಲೀ ಪಾತ್ರಾ

ಸಗಳಯಾಚ್ಯಾ ಹಾತಾ ಸುತ್ರಾ.. ಮ್ಹಾಡಾರ್

ದೆಣಗೀಚ್ಯಾ ದೆವಳಾಚೊ ದೇವ್

ಚಾರ್ ಹಾತಾಚೊ ಲಾಚಾರ್ ಖೊವ್

ಅರ್ಥಾಚೀ ಆರತೀ ಲ್ಹೆವ್... ಪುಜೆಕ್

ಫಟೀಗ ಪಣಾಚೆ ಗಡ್ಗಡೆ

ಮತೀಮನಾಚೆ ಗಿರಗೀರೆ

ಗಿರೆಸ್ತ್ ಕಗಾಲಾಚೆ ಕಡಕಡೆ... ಡಾವಾರ್

ದೊಣ್ಯಾಕ್ ಪಾಜೀಲ್ಲೆ ದಾತ್

ಪ್ರಸಾದ ಲೆವ್ಹಟಲ್ಲೆ ಹಾತ್

ಲಾಳಗೆಲ್ಲೆಂ ಖತ್... ಆಂಗಾರ್

ಉಜವಾತೆಚೀ ರಾಖ್

ವಾಸ್ ವಿಸರೀಲ್ಲೆ ನಾಕ್

ತನ್ಯಾ ಕವ್ಯಾಚೊ ದೀಕ್.. ಲಿಂಗಾರ್

ಸಂಗಣೀ ಮಾಗಣೀ ವ್ಹಡ್

ವಾಂಜ್ ನಾಲ್ಲಾ ಪಡ್

ಸವಾಯ್ ರೂಪಯಾ ಜಡ್... ತಾಟಾರ್

ಭಾರ್ ನಿವ್ಹೀಲೀ ತರಂಗಾ

ಗಾಡಯಾನ್ ಘೆತೀಲೀ ಸವಂಗಾ

ಸೊಸಾರ್ ಮಾರಪೀ ಹಂಗಾ... ಚೌಫಾರ್

ದಾಬೀಲ್ಯಾ ಆಂಗಾರ್

ಭಲ್ಲಾ ತುಕಾ ಭಾರ್

ಹಾಲತಾ ಫಾಟೊ ಆಕಡೊ.. ತಾಗಡೆರ್

ಸಾಂವಳೊ ಆನವಾಳೊ

ಕಿಸಸುರಪಾಕ್ ಚಿಡಡಲೊ

ಬಾಟಕೊ ಹವಸಲೊ... ಗಾದರ್ಯಾನೀ

ಘುಸ್ವಲಾ ಪಾಲಖೆ ವಾಟ್

ಖಾಂದ್ ಮಾರತಲ್ಯಾಚೀ ಜಾತ್

ವರ್ಗಣೆಚೆ ತಾಟ್... ಸಗಳಯಾಕ್

ಭೊವರೆಚೆ ಪದ್

ಜಾಣಾ ಎಕಲ್ಯಾಕ್ ಮದ್

ಬುದವತಾಚೊ ಸೊದ್.. ಗರವಯೆತ್

ಧರೂನ್ ಜಾಲ್ಟೆ ಖುಳಖುಳೆ

ನೆಟಯಾಚ್ಯಾ ಹಾತಾರ್ ವಾಳೆ

ಭುರಗ್ಯಾಚ್ಯಾ ಮಾಧಾರ್ ಬುಡುಕುಳೆ.. ಫೆರೆತ್

ದಿಲ್ಯಾ ದಾನಾಚೀ ಕಾಣಿ

ರಿನ್ ವಾರಾಚೀ ಪಾವಣೀ

ಗುತೀಲ್ಲೀ ಉಮಾಣೀ... ಸಾರೆ ಸಾ

- ಗೌರೀಶ್ ವರ್ಣೇಕರ್ [ಮಾರ್ಚ್ 2018]

ಗೌರೀಶ್ ವರ್ಣೇಕರ್: ಗೊಂಯ್ಚೊ ನಾಮ್ಣೆಚೊ ಕವಿ, ಉಲವ್ಪಿ ಆನಿ ಸಂಘಟಕ್. ಎದೊಳ್ ಪರ್ಯಾಂತ್ ಹಾಚೆ ’ಶೂನ್ಯ’, ’ಅರ್ಥ್’, ’ಗೀತ್ ತುಜೆಂ ಗಾಯ್ತಾನಾ’ ತಶೆಂಚ್ ’ಕೊಂಕಣಿ ಭಕ್ತಿ ಸರ್’ ಮ್ಹಳ್ಳೆ ಚ್ಯಾರ್ ಬೂಕ್ ಪರ್ಗಟ್ ಜಾಲ್ಯಾತ್. ಜಾಯ್ತ್ಯಾ ಕವಿಗೋಶ್ಟಿಂನಿ ಹಾಣೆಂ ವಾಂಟೊ ಘೆತ್ಲಾ ತಶೆಂಚ್ ಚಲವ್ನ್ ವೆಲ್ಯಾತ್.