सचॆतन

कविता जिण्येअन्भॊगाचें काप, कविता काळ्जाचि भास, पुण कविताच्च ऎक भास आनि सचॆतन (अंतस्कर्न) म्हळ्ळें आस्च्यांनि उचार्चे तसलि जाव्नासा. अनि तेद्नां ति कविता फकत्त उत्रांचि/प्रासांचि जाव्न उर्चेबद्लाक वेवेग्ळ्यो काण्यो थंय्चर उभ्जतात म्हण्च्याक हि कविता गोवाय दिता.

गोंय्चो परॆश नरॆश कामत वृत्तेन ऎक व्हख्तां दुकान चलय्ता, पय्लो हव्यास पॆंटिंग, रंगांनि खेळ्चि विध्या भॊव बरे रितिन सम्जाल्लो. हांगासर ताच्या कवितेंत व्हापार केल्ले एकॆक सब्ध एकॆक रंग दितात अशें अंतस्कर्नाचें पिंतुर वाच्प्याच्या मतिंत उभें जाता.

सचॆतन

ना वारें

ना पानांचि सळ्‌सळ

ना ऎकांद्रे शेवणों लेगीत

आशिकुशीक

हें झडांचें मौन

कांय

हें मरण झडांचें?

दिस्ता:

ह्या झिळ्मिळ्च्या काळोकांत

आसुंयेता ऎकाद्रि अव्यक्त आस

ह्या झडांच्या सुक्लेल्या खंद्यांनी

खंय तरी दडिल्लि

कोंब्यांचि

रंग्‍पिशी

सचॆतन!

- परॆश नरॆंद्र कामत [फेब्रेर, २०१६]

परॆश नरॆंद्र कामत: अलंग, गर्भाखोळ, शुभांकर आनि चित्रलिपि म्हळ्ळे च्यार कविताजमे पर्गट जाल्यात. वेगिंच पांच्वो कविताजमो ’रंगबोलि’ पर्गट्च्यार आसा. कोंक्णि भाशा मंडळ पुरस्कार, बि.बि.बॊर्कर स्मारक पुरस्कार, कला अकाडेमि साहित्य पुरस्कार, जनगंगा साहित्य पुरस्कार, गॊवा कोंकणि अकाडेमि साहित्य पुरस्कार आनि गोयां सर्कारा थाव्न युव सृजन पुरस्कार लाभ्ल्यात. हाच्यो कविता हिंदि, गुजराति, सिंधि, मराठि, पंजबि, तेलुगु आनि इग्लिश भासेंनि अनुवादित जाल्यात.