ಪ್ರತಿಬಿಂಬ್

ಮನಿಸ್ ಜೆದ್ನಾಂ ಅಪ್ಲ್ಯಾ ಸಾವ್ಳೆಸವೆಂ ವಾ ಅಪ್ಲ್ಯಾ ಭಿತರ್ಲೆ ವೆಕ್ತಿಸವೆ ಜೆದ್ನಾಂ ಸಂವಾದ್ ಕರುಂಕ್ ಸಕ್ತಾ - ತೆದ್ನಾಂಚ್ ತೊ ಜಾಣ್ತೊ ಜಾತಾ. ಆನಿ ಹೆಂ ಸಲೀಸಾಯೆಚೆಂ ಚಿಂತಪ್ ನ್ಹಯ್. ಹ್ಯಾ ಕವಿತೆಂತ್ ತರ್‌ಯೀ ಸಂಕೀರ್ಣ್ ಇಮಾಜ್ಯೆಂಕ್ ಸುಟವ್ನ್ ಸಮ್ಜುಂಚೆಂ ಪ್ರೇತನ್ ಕೆಲ್ಯಾರ್ ಜಾಯ್ತ್ಯೊ ಕಾಣ್‌ಯೊ ಆಮ್ಕಾಂ ಆಯ್ಕುಂಕ್ ಮೆಳ್ತಾತ್ ಮ್ಹಣ್ಚ್ಯಾಂತ್ ದುಭಾವ್ ನಾ.

ಬಾಬ್ ಉದಯ್ ಮಾಂಬ್ರೊ ಗೊಂಯ್ಚೊ ಏಕ್ ನಾಮ್ಣೆಚೊ ಕವಿ, ವಾವ್ರಾಡಿ ತಶೆಂಚ್ ಕೊಂಕ್ಣಿ ಮೋಗಿ. ಹಾಚೆ ದೋನ್ ಬೂಕ್ ’ಹಾಯ್ ಸಾಯ್ಭಾ’, ’ಮನ್ಶಾಚ್ಯಾ ಸೋಧಾಂತ್’ ಪರ್ಗಟ್ ಜಾಲ್ಯಾತ್.

ಪ್ರತಿಬಿಂಬ್

ತುಜ್ಯಾ ಮಾಣ್ಕುಲ್ಯಾ ಪಾವ್ಲಾಂನಿ

ಘರಾಕ್ ಥಾಕಾಯ್ ದಿಲಿ

ಘರಾಚಿ ಜಮೀನ್, ತಿಜುಲೆ, ಸೊಪ್ಣಾಂ

ಘರಾಚೊ ಭಾರ್ ಆಸಾ ಖಾಂದಾರ್

ತೆಂ ಖೀಣ್ಭರ್ ವಿಸ್ರೂಂಕ್ ಪಾವ್ಲಿ

ಘರಾನ್ ಆಪ್ಲಿಂ ದಾರಾಂ, ಜನೆಲಾಂ

ಶೆಕಾನಶೆಕ್ ಉಗ್ತಿ ಕೆಲಿ

ತುಜ್ಯಾ ಖೆಳಾಂತಲಿ ಜನಾವ್ರಾಂ

ಜಿತಿ ಜಿವಿ ಜಾವ್ನ್

ಸಾಲ್ಭರ್ ವಾವ್ರೂಂಕ್ ಲಾಗ್ಲಿ

ಘರಾಚೆ ವಣ್ಟೀಕ್ ಲೆಗೀತ್

ಆಸ್ತಾತ್ ಖಂಯ್ ಕಾನ್

ತುಜ್ಯಾ ಲುಡ್ಬ್ಯಾ ಆವಾಜಾಕಡೆ

ಘರಾಚೆ ಸಗ್ಳೆ ಕಾನ್ ಲಾಗ್ಲೆ

ಬಾಕೀಚೆ ಆವಾಜ್ ಆಯ್ಕುಪಾಕ್

ಘರಾಚೆ ಕಾನ್ ಬಸ್ಲೆ

ಖೂಪ್ ವರ್ಸಾಂ ಘರಾನ್

ರಂಗ್ ಪಳೊವಂಕ್ ನಾಸ್ಲೊ

ತುಂವೆ ವಣ್ಟೀರ್ ಭಿರ್ಕಟಾವನ್

ವಣ್ಟೀಂಕ್ ಜೀವ್ ಹಾಡ್ಲೊ

ಘರ್ ಆತಾಂ ಭುಲ್ಲುಸಲಾಂ

ಘರ್ ಪಳಯ್ ಧಾದೊಸಲಾಂ

ತುಜ್ಯಾ ರೂಪಾನ್ ಘರಾನ್

ಆಪ್ಲೆಂ ಪ್ರತಿಬಿಂಬ್ ಪಳಯ್ಲಾಂ

- ಉದಯ್ ನರ್‌ಸಿಂಹ್ ಮ್ಹಾಂಬ್ರೊ - ಗೊಂಯ್ [ಮಾರ್ಚ್ 2018]