ನಾಮಣೆಚೊ ಉರ್ದು/ಹಿಂದಿ ಕವಿ ಸಾಹೀರ್ ಲುಧ್ಯಾನ್ವಿಚ್ಯಾ ಎಕಾ ಕವಿತೆಚ್ಯೊ ವಳಿ ಹ್ಯೊ;

ನಾಮಣೆಚೊ ಉರ್ದು/ಹಿಂದಿ ಕವಿ ಸಾಹೀರ್ ಲುಧ್ಯಾನ್ವಿಚ್ಯಾ ಎಕಾ ಕವಿತೆಚ್ಯೊ ವಳಿ ಹ್ಯೊ;

(ಹ್ಯಾ ಜಿಣಯೆಚ್ಯಾ ವಯ್ರ್ ಉಟೊನ್ ಯೆಂವ್ಚ್ಯಾ ತಶೆಂಚ್ ಸಕಯ್ಲ್ ದೆಂವೊನ್ ವೆಚ್ಯಾ ವೊತಾಕ್ ಕೊಣೆಂ ಭಾಂದ್ಲಾ?

ರಂಗಾಚೆರ್ ಕೊಣೆ ರಾಕ್ವಣ್ ಕೆಲ್ಯಾ, ರುಪಾಕ್ ಕೊಣೆ ಭಾಂದಲಾ?

ಕಿತ್ಯಾಕ್ ಹೆಂ ಹಠಾನ್ ರಾಕಚೆಂ...)

ಹ್ಯೊ ವಳಿ ಕಾಂಯ್ ಸಾದ್ಯೊ ನ್ಹಯ್. ಜಿಣಯೆಚ್ಯಾ ತತವಾಂಚೆರ್ ಆರಸೊ ಧರಚ್ಯೊ ವಳಿ ಹ್ಯೊ. ಹಾಂಗಾಸರ್ ಆಂಡ್ರ್ಯು ಸಯತ್ ಅಸಲ್ಯೊಚ್ ಅಪುರಭಾಯೆಚ್ಯೊ ವಳಿ ಘೆವನ್ ಆಯಲಾ. ಮನೀಸ್ ಆಜ್ ಆಸಾ ಫಾಲ್ಯಾಂ ನಾ. ಪುಣ್ ಯುಗಾಂ ಯುಗಾಂನಿ ತಾಕಾ ಸಾಂಗಾತ್ ದಿಲ್ಲಿಂ ಕಿರಣಾಂ, ವೆವೆಗಳ್ಯಾ ಕಾಳಾರ್ ತಾಕಾ ಸಾಂಗಾತ್ ದಿಲ್ಲಿಂ ಕಿರಣಾಂ ಸಯತ್ ಮನೀಸ್ ಯೆಂವಚ್ಯಾ ಆಧಿಂ ಆಸಲ್ಲಿಂ ತಶೆಂಚ್ ಮನೀಸ್ ಗೆಲ್ಲೆ ಉಪರಾಂತ್‌ಯೀ ಆಸತೆಲಿಂ. ಕಿರಣಾಂಕ್ ಕೊಣೆಂ ಧರಲಾಂ ಕೊಣೆಂ ಭಾಂದಲಾಂ ವಾ ಕಿರಣಾಂಕ್ ಕೊಣೆ ರಾವಯಲಾಂ ಮ್ಹಳ್ಳೆಂ ಚಿಂತಾಪ್ ಉಟಯತಾ.

ಹಾಂಗಾಸರ್ ಕಿರಣಾಂ ಏಕ್ ಭಾಂದ್ ಆಸುಯೆತಾ, ಸಕತ್ ಆಸುಯೆತಾ, ಉಜವಾಡ್ ಆಸುಯೆತಾ, ಮೋಗ್-ಮಯಪಾಸ್ ಆಸುಯೆತಾ ಪುಣ್ ಮನಶ್ಯಾಚ್ಯಾ ಚಿಂತಪಾ ಸಕತೆಚ್ಯಾಕೀ ಮಿಕವೊನ್ ಆಸಚಿ ಏಕ್ ಅಧ್ಭುತ್ ಸಕತ್. ಆನಿ ಹಿ ಕವಿತೆಚಿ ಸಕತ್ ಸಮಜುಂಕ್ ತುಕಾಚ್ ಆಪವಣೆಂ ದಿತಾಂ.

[ಕವಿತಾ] ಕಿರ್ಣಾಂಚೊ ಸಾಂಗಾತ್! [ಆಂಡ್ರು ಎಲ್. ಡಿ’ಕುನ್ಹಾ]

ಕಿರ್ಣಾಂಚೊ ಸಾಂಗಾತ್!

ಎಕ್ಸುರ್ಪಣಾಂತ್ ಶಿಜೊನ್ ಅಸ್ತಾನಾಂಯ್

ಧಾಂಪಲ್ಲ್ಯಾ ಜನೆಲಾಂತ್ಲ್ಯಾ ಇಡ್ಯಾಂತ್ಲ್ಯಾನ್ ರಿಗೊನ್

ಅಂಗಾಲಾಪಾನ್ ಆಂಗಾರ್ ವೆಡ್ಕೊಳ್ ಘಾಲ್ನ್ ರಾವ್ತಾತ್ ಹಿಂ ಕಿರ್ಣಾಂ

ಥೊಡಿಂ ಲಾಯ್ತಾತ್, ಥೊಡಿಂ ನ್ಹಾಣಯ್ತಾತ್, ಥೊಡಿ ಬೊಳಯ್ತಾತ್

ಆನಿ ಥೊಡಿ ಖೆಳಯ್ತಾತ್ ನೆಣ್ತ್ಯಾ ಭುರ್ಗ್ಯಾಂಪರಿಂ!

ಹಾಂ! ನಾತ್ರಾಂ ಭಾಯ್ರ್ ಖೆಳ್ತಾತ್!

ವೇಂಗ್ ಸುಟೊನ್ ಲಿಪ್ತಾತ್ ಸಾಂಜೆರ್

ತುಮ್ಚೆ ವಿಣೆಂ ಜಿವಿತ್ ವಾಂಜ್, ಸಾಂಡುನ್ ವಚಾನಾಕಾತ್’

ಪರತ್ಲ್ಯಾರಯ್... ಊಬ್ ಸೊಡುನ್ ವೆತಾತ್...

ಸುರ್ಯೊ ಸರಲ್ಲ್ಯಾ ಸಾಂಜೆ ಉಪ್ರಾಂತ್

ರಾತ್‍ಭರ್ ಶಿಜೊನಂಚ್ ಖತ್ಕತುನ್ ಉರ್ತಾಂ...

ಹಾಂ! ನಾತ್ರಾಂ ಭಾಯ್ರ್ ಕಿಡ್ಕಿಡ್ತಾತ್..

ಹಾಂವ್ ಜಾಣಾಂ...

ತಿಂ (ಕಿರ್ಣಾಂ) ಸದಾಂ ಯೆತಾತ್... ವೆತಾತ್

ಸಾಂಡುನ್ ಘಾಲ್ನಾಂತ್ ತಿಂ!

ಫಾಲ್ಯಾಂ ನಿಕೆಪುಂಕ್‍ಯ್ ಯೆತೆಲಿಂ..

ಗಾಲಾಂಕ್, ಜೊಡಲ್ಲ್ಯಾ ಬೊಟಾಂಕ್ ಉಮೆ ಧಾಂಪ್ತೆಲಿಂ...

ಅಡ್ಕಳ್ ನಾಸ್ತಾಂ ಪೊಂಡಾಭಿತರೀ ದೆಂವ್ತಲಿಂ..

ದೊರಿಯೆಂನಿ ದೆಂವಯಿಲ್ಲ್ಯಾ ಪೆಟೆಕ್

ವೆಡೊ ಘಾಲ್ನ್ ರಾವ್ತಾನಾ....

ಪಯ್ಸ್ ಥಾವ್ನ್ ಕೊಣೆಂಗಿ ಉಡಯಿಲ್ಲ್ಯಾ

ಮಾತಿಯೆಚಾ ಮಾರಾಂಕ್ ಫುಡ್ ಕರ್‍ತಲಿಂ..

ಹಾಂ! ನಾತ್ರಾಂ ಪುಲಾಂ ಉಡಯ್ತೆಲಿಂ!

ಕಿರ್ಣಾಂಕ್ ಪುರುಂಕ್ ಕೊಣಯ್ ಸಕ್ಲ್ಯಾತ್?

ಸಾಂಗತ್ ದಿಲ್ಲಿಂ ಕಿರ್ಣಾಂ ಜಿವಂತ್ ಉರ್‍ತಲಿಂ

ಮ್ಹಜೊ ಉಡಾಸ್ ಆನಿ ಉಜ್ವಾಡ್ ವಾಂಟುಂಕ್

ಫಾಲ್ಯಾಂಯ್ ಜಿಯೆಂವ್ಕ್ ಅಸಾ!

ಫಾಂತ್ಯಾಕ್ ರಾಕುನ್ ಅಸಾಂ, ಕಿರ್ಣಾಂಕ್ ವೆಂಗುಂಕ್!

- ಆಂಡ್ರು ಎಲ್. ಡಿ’ಕುನ್ಹಾ  [ಎಪ್ರಿಲ್ 2018]

ಆಂಡ್ರು ಎಲ್. ಡಿ’ಕುನ್ಹಾ: ವೃತ್ತೆನ್ ’ಫೈನಾನ್ಸ್ ಕನ್ಸಲ್ಟೆಂಟ್’ ವಾವ್ರ್ ಕರುನ್ ಆಸ್ಚೊ ಆಂಡ್ರು ಎಲ್. ಡಿ’ಕುನ್ಹಾ ಕೊಂಕ್ಣೆಚೊ ನಾಮ್ಣೆಚೊ ಕವಿ, ಕಾಣ್ಯೆಗಾರ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’, ’ಅಂಜುರಾಚೆಂ ಪಾನ್’, ’ಆಯೆರಾಚೊ ಬೂಕ್’ ಮ್ಹಳ್ಳೆ ತೀನ್ ಕವಿತಾಜಮೆ ಪರ್ಗಟ್ಲ್ಯಾತ್. ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ, ತಶೆಂ ವಿಮಲಾ ಪೈ ಪುರಸ್ಕಾರ್ ಹಾಕಾ ಫಾವೊ ಜಾಲ್ಯಾತ್. ಆಪ್ಲ್ಯಾ ಕುಟ್ಮಾಸವೆಂ ಸದ್ದ್ಯಾಕ್ ಮಂಗ್ಳುರಾಂತ್ ವಸ್ತಿ ಕರುನ್ ಅಸಾ.