ತೂಂಚ್ ಮ್ಹಜೊ ಶ್ವಾಸ್

ಮನಿಸ್ ಅಸ್ಕತ್ ಸಂಯ್ಬಾಚೊ ದೆಕುನ್ ದೀಶ್ಟ್ ವಯ್ರ್ ದವರ್ತಾ ಪುಣ್ ತಾಚೊ ಪಾಂಯ್ ಸಕ್ಲಾಚ್ಚ್ ಆಸ್ತಾ. ದೆಕುನ್ ಚಡ್ತಾವ್ ಆಮಿ ’ಕೊಂಕಣಿ’ ಕೊಂಕಣಿ ಮ್ಹಣ್ತಾಂವ್ ತರ್‌ಯೀ ಖರೆಂಪಣಿಂ ಆಮಿ ಆನಿ ಆಮ್ಚಿಂ ಮಾತ್ರ್ ಆಮ್ಚ್ಯೆ ನದ್ರೆಕ್ ಪಡ್ತಾತ್ ಆನಿ ಅಸಲ್ಯಾ ಚಿಂತ್ಪಾಂತ್ ಆಮಿ ಫಕತ್ ಮಂಗ್ಳುರ್‌ಗಾರ್, ಗೊಂಯಾಂಗಾರ್, ಮುಂಬಯ್‌ಕಾರ್ ಮಾತ್ರ್ ಜಾವ್ನ್ ಉರ್ತಾಂವ್ ಶಿವಾಯ್ ಕೆದಿಂಚ್ ’ಕೊಂಕಣ್‌ಗಾರ್’ ಜಾಯ್ನಾಂವ್.

4 ಫೆಬ್ರೆರ್ 1987 ಇಸ್ವೆಂತ್ ’ಕೊಂಕ್ಣೆಕ್’ ಗೊಂಯ್ಚಿ ರಾಜ್ಯ್-ಭಾಸ್ ಜಾವ್ನ್ ಮಾಂದುನ್ ಘೆತ್ಲೆಂ ಪುಣ್ ಕೊಂಕ್ಣಿ ಇತ್ಲಿ ಗ್ರೇಸ್ತ್ ಆನಿ ವಿಸ್ತಾರ್ ಭಾಸ್ ಮ್ಹಳ್ಯಾರ್ ತಿ ಚ್ಯಾರ್ ಪ್ರಮುಖ್ ರಾಜ್ಯಾಂನಿ ಕಾಂಯ್ ಪನ್ನಾಸಾವಯ್ರ್ ಬೊಲಿಂನಿ ಉಲಂವ್ಚೆಂ ತಶೆಂಚ್ ಪಾಂಚ್ ಲಿಪಿಯಾಂಚ್ಯಾಕಿ ಚಡಿತ್ ಲಿಪಿಯಾಂನಿ ಸೊಭಂವ್ಚೆಂ ಕೊಂಕ್ಣೆಚಿ ಗ್ರೇಸ್ತ್‌ಕಾಯೆಚಿ ರುಜ್ವಾತ್ ಮ್ಹಣ್ಚ್ಯಾಂತ್ ದುಭಾವ್ ನಾ. ಹೆಚ್ಚ್ ಚಿಂತ್ಪಾಚಿ ಕವಿತಾ ಘೆವ್ನ್ ಕೊಂಕ್ಣೆಚಿ ವ್ಹಡ್ವಿಕಾಯ್ ಪಾಚಾರ್ತಾ ಬಾಯ್ ಉರ್ಜಿತಾ ಭೊಬೆ.

ತೂಂಚ್ ಮ್ಹಜೊ ಶ್ವಾಸ್

ತೂಂಚ್ ಮ್ಹಜೊ ಧ್ಯಾಸ್

ಪರ್ಮಳಟಾ ಮಾತ್ಯೆಚೊ

ಜಾವ್ನ್ ತುಂ ಸುವಾಸ್

ದಿಸ್ತಾ ತುಂ ಗೊಂಯ್ಚ್ಯಾ

ಕಣಾಕಣಾನಿ

ರೂಪ್ ಬದ್ಲತಾ ರುತು

ಜಶೆ ಖೀಣಾಖೀಣಾನಿ

ಮಾಲವ್ಣ್, ಗೊಂಯ್, ಮಂಗ್ಳುರಚಿ

ಬದ್ಲತಾ ಧಾಟ್ಣಿ

ಹಾಂಸತ್ ಧೊಲತ್ ಮೆಳ್ಟಾ

ತುಂ ಮ್ಹಜಿ ಕೊಂಕ್ಣಿ

ದಾಂಡ್ಗಿ ತುಂ ಕೆನ್ನಾ

ಕೆನ್ನಾ ತುಂ ದೆಖ್ಣಿ

ವ್ಹಾಂವ್ತಾ ನಾತ್ಯಾಂಚ್ಯಾ

ಘಟ್ಟ್ ಬಂಧ್ನಾನಿ

ಧಡ್ಧಡಟಾ ಗೊಂಯ್ಕಾರಾಚ್ಯಾ

ಕಾಳ್ಜಾ ಕಾಳ್ಜಾನಿ

ದಾತ್ಯಾವೆಲ್ಯೊ ಹೊವ್ಯೊ

ಸೊಬೀತ್ ಮ್ಹಣಿ

ಆಲ್ಲಯಾಂಚ್ಯಾ ಲ್ಹವ್ ಲ್ಹವ್

ಗೊಡ್ ಸುರಾನಿ

ರಗತ್ ಜಾವ್ನ್ ವ್ಹಾವ್ತಾ

ತುಂ ಮ್ಹಜಿ ಕೊಂಕ್ಣಿ

ಖೆಳ್ಟನಾ ಮೆಳ್ಟಾ

ತುಂ ರಾನ್ಚೆವಾಡಚೆಲ್ಯಾನಿ

ಜಾಣ್ಟ್ಯಾನಿ ನೆಣ್ಟ್ಯಾನಿ

ಘರಾಘರಾನಿ

ಶಾರಾನಿ ಗಾವಾನಿ

ಗೊಂಯ್ಚ್ಯಾ ಕೊನ್ಶಾನಿ

ಮಾಂಡೊ ಜಾತಾ ಕೆನ್ನಾ

ಮೆಳ್ಟಾ ಧಾಲಾನಿ

ಅಲ್ಲಡ್ ಬೆಧುಂದ್

ನಾಚ್ತಾ ಫುಗ್ಡ್ಯಾನಿ

ಅಮೃತಾ ಪರಸ್ ಗೊಡ್

ತುಂ ಮ್ಹಜಿ ಕೊಂಕ್ಣಿ

ಮಾಡಾನಿ ನ್ಹಂಯಾನಿ

ಗೀಮಾನ್ ತಶೆಂ ಶಿಂಯಾನಿ

ಆಸ್ಮಂತಾನ್ ಗರ್ಜುಪಿ

ಗೊಡ್ ಅಭಾಂಗಾನಿ

ಸಾದ್ ಘಾಲ್ತಾ

ಆಮ್ಚ್ಯಾ ಶಿರಂತರಾನಿ

ಆವ್ಯ್ವರೀಂಚ್ ಆವ್ಯ್ಭಾಸ್

ಕಾಳ್ಜಾ ಕಾಳ್ಜಾನ್ ಧಡ್ಧಡಟಾ

- ಉರ್ಜಿತಾ ಭೊಬೆ: [ಫೆಬ್ರೆರ್ 2018]

ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆನಿ ಆಸಕ್ತ್ ಆಸ್ಚಿ ಹಿ ಗೊಂಯ್ಚಿ ಕವಯತ್ರಿ, ತಿಚಿಂ ಸಭಾರ್ ಬರ್ಪಾಂ, ಕವಿತಾ ಗೊಂಯ್ಚ್ಯಾ ಪತ್ರಾಂನಿ ಪರ್ಗಟ್‌ಲ್ಯಾಂತ್. ತಿಚೊ ಪಯ್ಲೊ ಕವಿತಾಜಮೊ ವೆಗಿಂಚ್ ಪರ್ಗಟ್ ಜಾವ್ನ್ ಯೆಂವ್ಚ್ಯಾರ್ ಆಸಾ.