Mati

’dhulli thaun ailai monxa, dhullik tum vetoloi’ hem dharmik chintop matr nhoi bogar somajik chintop. Tor‌yi monis zaun hea somsarant jiemvcho hechch matiek lagun monxaponnacho bhongostoll korta. Bhavo bhavalagim, sezar sezarilagim matr nhoi raxttr‍ raxttralagim soit zhujta ek mutt matiechea suvatek lagun, ani jik‌l'lo toxench solvol'lo, hechch matient opli nirjivo kuddik sanddun veta - hi kaim kalponik kanni nhoi, bogar ami horyeka disa pollemvchem oddhuk sot. Mati kovitench osolench opurbhayecho niall attapun asa.

Bab venkottex naik xikpi vorgacho, somzonnecho kovi mhonnun tachim kovita gouai ditat. Hea somsarant kitench thir/sasnnik mholl'llem na mholl'llem kovitechem tirll punn hea tirllachea bhomvtonnim hannem ubheo kel'leo imaji veveglle surachim gitanch gaitat oxem bhogta. Hi kovitechi sobhai toxench takt mapunk tukach soddtam.

Mati

kitole voiri rukari

pal'lo chigorevo

baunu eko dis mat'tinto mellota

bhumyo soddono

akaxaro uboleariyo

pako dhampotori matiko pauta.

Matiche svado ani svobhavo tosolocho

surove pausako matiye poromollu

uddogaso haddoita

matiche ruchi makoxi polleleako

sombondhu sokkoddo visraita

matiche vantto zatona

matetamyo poddota

konnai na zatona

mati mellonu apnnaunu geta

ausule mharentu vadduno

bhailelo mharento nid'dono

akheriko ujje mharentu asoleariyo

mati soddonu dina

jivantu jivo douronu

mharentu guttolono geta.

Eko vellache devu ani deullo tamyo

matiche gorbhantu asa

konnakoi soddunko na matino

hamvoi mati zauche

vellako rakuno asa.

- Venkottex Nayak, Mo'ddo'ntear [Janer, 2018]

Venkottex Nayak, Mo'ddo'ntear: Vrit'ten pradhyopok zaun vaur korcho Venkottex Nayak, konknni sahiteant kannyegar/kovi zaun vhollkecho tor‌yi, ek somvedon‌xil chintpacho kovi, kovita tachi poili asokt. Konknnechea fuddarant ek bhorvoxeacho kovi zaun udetolo mholl'llo mhozo axavad.