ಝುಜಾಚೆಂ ವ್ಹಾರೆಂ [ ಸರಸ್ವತಿ ದಾಮೋದರ್ ನಾಯ್ಕ್]

ಭಾಯ್ಲ್ಯಾ ದುಸ್ಮಾನಾಂಲಾಗಿಂ ಝುಜ್ಯೆತ್ ಪುಣ್ ಭಿತರ್ಲ್ಯಾ ದುಸ್ಮಾನಾಲಾಗಿಂ ಝುಜ್ಚೆಂ ಕಶೆಂ? ಹೆಂ ಸವಾಲ್ ಭೋವ್ ಮಾರ್ಮಿಕ್ ಸವಾಲ್. ಆಜ್ ಸಂಸಾರಾಚ್ಯಾ ವೆವೆಗ್ಳ್ಯಾ ಪ್ರಾಂತಾಂತ್ ಝುಜಾಚಿ ಭಿರಾಂತ್ ಧೊಸ್ತಾ, ದೆಕುನ್ ಆಜ್ ಪಾಸೊನ್ ಝುಜಾಕ್ ಆಯ್ತೆಂ ಜಾಂವ್ಚ್ಯಾಕ್ ಖರ್ಚ್ ಜಾಂವ್ಚೊ ದುಡು ಗರ್ಜೆವಂತಾಂಕ್ ಲಾಭಾನಾಸ್ತಾನಾ ಲೋಕ್ ಭುಕೆನ್ ಮೊರ್ತಾ. ಪುಣ್ ಹೆಂ ಝುಜ್ ಏಕ್ ನೇಮ್ ಮಾತ್ರ್, ಪುಣ್ ಖರೆಂಪಣಿಂ ಆಟೊವ್ ಕರ್ಚೊ ತರ್ ತ್ಯಾ ದುಸ್ಮಾನಾಚ್ಯಾಕೀ ಭಿರಾಂಕುಳ್ ದುಸ್ಮಾನ್ ಆಮ್ಚೆಮಧೆಂಚ್ ಆಸ್ತಾ, ಆಮ್ಚೆಪಯ್ಕಿಂತ್ ಆಸ್ತಾ ಆನಿ ಚಡ್ ಕರುನ್ ಆಮ್ಚೆಭಿತರ್‌ಚ್ ಆಸ್ತಾ ಮ್ಹಳ್ಳೆಂ ಚಿಂತಪ್ ಚಿಂತ್ಚೆ ಕಿತ್ಲೆ ಆಸಾತ್?

ಝುಜಾಚೆಂ ವ್ಹಾರೆಂ ಕವಿತಾ ಘೆವ್ನ್ ಆಯಿಲ್ಲಿ ಗೊಂಯ್ಚೊ ನಾಮ್ನೆಚಿ ಕವಿ ಬಾಯ್ ಸರಸ್ವತಿ ದಾಮೋದರ್ ನಾಯ್ಕ್ ಖಂಡಿತ್ ಹೆಚ್ ಚಿಂತ್ಪಾಕ್ ಆಪ್ಲ್ಯಾ ಕವಿತೆಂತ್ ಘೆವ್ನ್ ಆಯ್ಲ್ಯಾ. ದೆಕುನ್ ಹಿ ಕವಿತಾ ಫಕತ್ ಉತ್ರಾಂಚಿ ಸಜಾವಳ್ ಜಾವ್ನ್ ಉರಾನಾ, ಬಗಾರ್ ಮಾಟ್ಸೊ ನಿಯಾಳ್ ಕರುಂಕ್ ಉಲೊ ದಿತಾ. ಆತಾಂ ತೆಂ ಕಾಮ್ ತುಜೆರ್ ಸೊಡ್ತಾಂ.

[ಕವಿತಾ] ಝುಜಾಚೆಂ ವ್ಹಾರೆಂ [ಸರಸ್ವತಿ ದಾಮೋದರ್ ನಾಯ್ಕ್]

ಝುಜಾಚೆಂ ವ್ಹಾರೆಂ

ಮೊಳ್ಬಾಂತ್ ಕುಪಾಂ ದಾಂಟುನ್ ಆಯ್ಲ್ಯಾಂತ್

ಕಾಳಿಕುಟ್ ಭಿರಾಂಕುಳ್ ವಿಶ್ವ ಝುಜಾಂಚಿ

ಪ್ರತಿಶೋದ್ ಧುಮ್ಸುಂಕ್ ಲಾಗ್ಲಾ

ಭುಂಯೆವೆಲ್ಯಾ ದೆಸಾಂಭಿತರ್

ಜಾಗ್ಯಾ ಖಾತಿರ್, ಧರ್ಮಾ ಖಾತಿರ್, ತೆಲಾ ಖಾತಿರ್

ಉದ್ಕಾ ಖಾತಿರ್, ಮೊತೆಪಣಾ ಖಾತಿರ್, ಇಸ್ಟಾಗಾತಿ ಖಾತಿರ್

ದುಸ್ಮಾನ್‌ಪಣಾಂ ವಾಡ್ತಾತ್

ಬೋಂಬ್ ಉಡವ್ನ್ ಕೆದ್ನಾ ಕರ್ತೆಲ್ಯೆ ಉಧ್ವಸ್ತ್

ದೇಶ್ ದೇಶಾಂಕ್ ಸಾಂಗುಂಕ್ ನ್ಹಜೊ

ಆಯ್ಜ್ ಸುಖಾನ್ ಜಿಯೆತಲೆ ಸಾಂಗುಂಕ್ ಜಾಯ್ನಾ

ಕೆನ್ನಾ ಜಾತಲೆ ರೆಫ್ಯೂಜಿ

ಘರ್‌ದಾರ್ ಸಂಸಾರ್ ಸನೊವನ್ ಬಸ್ಲೆಲೆ

ಕೆನ್ನಾ ಕಾಯ್ ಸಂಪ್ತಲೊ ಖೆಳ್ ಹ್ಯಾ ಝುಜಾಂಚೊ?

ಕೆನ್ನಾ ಕಾಯ್ ಮನಿಸ್ ಶಾಣೊ ಜಾತಲೊ?

ಕೆನ್ನಾ ಕಾಯ್ ದೇಶಾಭಿತರ್ ಸಂಬಂಧ್ ಸುಧಾರ್ತಲೊ?

ಮ್ಹಜ್ಯಾ ಇಶ್ಟಾನ್ ಹುಸ್ಕೊ ಉಕ್ತಯ್ಲೊ

ತೊ ಖರೆಂಚ್ ಮನಾತ್ಲ್ಯಾನ್ ಉಲಯ್ತಾಲೊ

ಮ್ಹಾಕಾಯ್ ಹುಸ್ಕೊ ಜಾತ ಪರಿಸ್ತಿತೆಚೊ

ಮ್ಹಣ್ ಹಾಂವೆಂ ಮನಾನ್‌ಚ್ ತಾಕಾ ಮ್ಹಂಟ್ಲೆಂ

ತುಂ ತುಜ್ಯಾ ಪರ್ಕ್ಯಾ ಧರ್ಮಾನ್ ಕಾಜಾರ್ ಜಾಲ್ಯಾ

ಪುತಾಕ್ ಮಾಫ್ ಕರ್ತಲೊ ತೆನ್ನಾ

ತುಂ ತುಜ್ಯಾ ಶೆಜಾರ್‍ಯಾಂಕಡೆ ಚಿಮ್ಟಿಭರ್ ಜಾಗ್ಯಾಖಾತಿರ್

ಝಗ್ಗಡ್ಚೊ ನಾ ತೆನ್ನಾ

ತುಜ್ಯಾ ಧರನ್ ಭುಕೆನ್ ಉಭ್ಯಾ ಆಸ್ಲೆಲ್ಯಾ

ಭಿಕಾರಿಕ್ ಹಿಸ್-ಫಿಸ್ ಕರ್ಚೊನಾ ತೆನ್ನಾ

ಅಸ್ತುರ್ಯೆಕ್ ಸೊನ್ಮಾನ್ ದಿತೆಲೊ ತೆನ್ನಾ

ತುಜ್ಯಾ ಗಾಂವಾನ್ ಆಯಿಲ್ಲ್ಯಾ ಪರ್ಕ್ಯಾಕ್ ಆಪ್ಲೆ ಮ್ಹಣ್ತೆಲೊ ತೆನ್ನಾ

ಝುಜಾಚೆಂ ಹೆಂ ವ್ಹಾರೆಂ ಎಕಾ ತುಜ್ಯಾ ಕೊಡ್ಲ್ಯಾನ್ ದೇಶಾ ಕೊಡೆ ವಾವ್ತಾ

ತೆಂ ತುಂ ಬಂದ್ ಕರುಂಕ್ ಸಮ್ಜುಕಾಯೆಚಿ ಭುಮಿಕಾ ಘೆತೆಲೊ ತೆನ್ನಾ

- ಸರಸ್ವತಿ ದಾಮೋದರ್ ನಾಯ್ಕ್ [ಮಾರ್ಚ್, 2019]