झुजाचें व्हारें [सरस्वती दामोदर नायक]

भायल्या दुस्मानांलागीं झुज्येत पूण भितरल्या दुस्मानालागीं झुजचें कशें? हें सवाल भोव मार्मीक सवाल. आज संसाराच्या वेवेगळ्या प्रांतांत झुजाची भिरांत धोसता, देकून आज पासोन झुजाक आयतें जांवच्याक खर्च जांवचो दुडू गर्जेवंतांक लाभानासताना लोक भुकेन मोर्ता. पूण हें झूज एक नेम मात्र, पूण खरेंपणीं आटोव कर्चो तर त्या दुस्मानाच्याकी भिरांकूळ दुस्मान आमचेमधेंच आसता, आमचेपयकिंत आसता आनी चड करून आमचेभितर‌च आसता म्हळ्ळें चिंतप चिंतचे कितले आसात?

झुजाचें व्हारें कविता घेवन आयिल्ली गोंयचो नाम्नेची कवी बाय सरस्वती दामोदर नायक खंडीत हेच चिंत्पाक आपल्या कवितेंत घेवन आयल्या. देकून ही कविता फकत उत्रांची सजावळ जावन उराना, बगार माटसो नियाळ करुंक उलो दिता. आतां तें काम तुजेर सोडतां.

[कविता] झुजाचें व्हारें [सरस्वती दामोदर नायक]

झुजाचें व्हारें

मोळबांत कुपां दांटून आयल्यांत

काळिकूट भिरांकूळ विश्व झुजांची

प्रतिशोद धुम्सुंक लागला

भुंयेवेल्या देसांभितर

जाग्या खातीर, धर्मा खातीर, तेला खातीर

उदका खातीर, मोतेपणा खातीर, इसटागाती खातीर

दुस्मान‌पणां वाडतात

बोंब उडवन केदना कर्तेल्ये उध्वसत

देश देशांक सांगुंक न्हजो

आयज सुखान जियेतले सांगुंक जायना

केन्ना जातले रेफयूजी

घर‌दार संसार सनोवन बसलेले

केन्ना काय संप्तलो खेळ ह्या झुजांचो?

केन्ना काय मनीस शाणो जातलो?

केन्ना काय देशाभितर संबंध सुधार्तलो?

म्हज्या इश्टान हुसको उक्तयलो

तो खरेंच मनातल्यान उलयतालो

म्हाकाय हुसको जात परिसतितेचो

म्हण हांवें मनान‌च ताका म्हंटलें

तूं तुज्या पर्क्या धर्मान काजार जाल्या

पुताक माफ कर्तलो तेन्ना

तूं तुज्या शेजार‍यांकडे चिमटिभर जाग्याखातीर

झग्गडचो ना तेन्ना

तुज्या धरन भुकेन उभ्या आसलेल्या

भिकारीक हीस-फीस कर्चोना तेन्ना

असतूऱ्येक सोन्मान दितेलो तेन्ना

तुज्या गांवान आयिल्ल्या पर्क्याक आपले म्हणतेलो तेन्ना

झुजाचें हें व्हारें एका तुज्या कोडल्यान देशा कोडे वावता

तें तूं बंद करुंक समजुकायेची भुमिका घेतेलो तेन्ना

- सरस्वती दामोदर नायक [मार्च, २०१९]