ಕವಿತಾकविताPoem

Xalletole dis (- Namdev G Surlikar)

[kovita] Xalletole dis (- Namdev G Surlikar)

Eka tempadi sobhit yad haddun divpi kovita hi; tednam ghorant viz natl'li, chimnnechea telacho ujvadd ghorant prokas bhortalo. Ghor‌bhor monoxam asat punn pott‌bhor jeunko natle dis te. Nhesunk sarkem vostur na, pamyamni nhesunk vhanno nant, punn moilamni cholun iskolak vochunk aslem. Iskolak roza asledisamni xetant, gotteant va tottant kam'. Te dis aichea kallar konn‌yi somzotolo asakai? punn kitem-i nat‍l'lea tea disamni soit sokkodd aslem; kuttmant mayamog, gamvant xanti somodhan, ani kuddink bori bholaiki. Xalletlea disachi sobhit yad haddun ayil'li hi kovita yadincho vhor gheun yeta.

[kovita] Xalletole dis (- Namdev G Surlikar)

Xalletole dis

ghorant khaupak jeupak

ken'na mell'lle na zaitoxem

onoullea payanich bhomvlom

poixem nasle gheupak zotem

mottvem kalsamv bhenddar

donuy kuleancher pinjkem

khomsak nasle butamv

distale pott uktem

bhurgem vorgat hamstale

polloun pinjkem mhojem

khandar gheun yeup vochop

pustokanchem vojem

naslem kodel tamret

bosche poddttale sakar

donpar zata mhonnsor bhukhen

kallokh yetalo dolleam mukhar

buteo battleo nasleo ten'na

bhukh tan sostale

ghora pautokoch ghorchem jeunn

aslear jeutalo

obheas kelo na tor

poddttale fattir lodde

roddun roddun suzun

zatale tambdde dolle

onnou ghalun dourunoi

fatticher boddi poddttali

ghontti vajta mhonnsor

chedd'ddi legit bhijtali

xenkreancher dhompram ghaltokoch

fator topun zatalo ghavo

ragan magir naka tosleo

monatlea monat

bhurgem baik ghalli sovo

- Namdev G. Surlikar. [Nov, 2020]