ಶಾಳೆತಲೆ ದೀಸ್ (- ನಾಮ್‌ದೇವ್ ಗ. ಸುರ್ಲಿಕಾರ್)

[ಕವಿತಾ] ಶಾಳೆತಲೆ ದೀಸ್ (- ನಾಮ್‌ದೇವ್ ಗ. ಸುರ್ಲಿಕಾರ್)

ಎಕಾ ತೆಂಪಾದಿ ಸೊಭಿತ್ ಯಾದ್ ಹಾಡುನ್ ದಿವ್ಪಿ ಕವಿತಾ ಹಿ; ತೆದ್ನಾಂ ಘರಾಂತ್ ವೀಜ್ ನಾತ್ಲಿ, ಚಿಮ್ಣೆಚ್ಯಾ ತೆಲಾಚೊ ಉಜ್ವಾಡ್ ಘರಾಂತ್ ಪ್ರಕಾಸ್ ಭರ್ತಾಲೊ. ಘರ್‌ಭರ್ ಮನಶಾಂ ಆಸಾತ್ ಪುಣ್ ಪೊಟ್‌ಭರ್ ಜೆಂವ್ಕ್ ನಾತ್ಲೆ ದೀಸ್ ತೆ. ನ್ಹೆಸುಂಕ್ ಸಾರ್ಕೆಂ ವಸ್ತುರ್ ನಾ, ಪಾಂಯಾಂನಿ ನ್ಹೆಸುಂಕ್ ವ್ಹಾಣೊ ನಾಂತ್, ಪುಣ್ ಮಯ್ಲಾಂನಿ ಚಲುನ್ ಇಸ್ಕೊಲಾಕ್ ವಚುಂಕ್ ಆಸ್ಲೆಂ. ಇಸ್ಕೊಲಾಕ್ ರಜಾ ಆಸ್ಲೆದಿಸಾಂನಿ ಶೆತಾಂತ್, ಗೊಟ್ಯಾಂತ್ ವಾ ತೊಟಾಂತ್ ಕಾಮ್. ತೆ ದೀಸ್ ಆಯ್ಚ್ಯಾ ಕಾಳಾರ್ ಕೊಣ್‌ಯೀ ಸಮ್ಜತಲೊ ಆಸಾಕಾಯ್? ಪುಣ್ ಕಿತೆಂಯ್ ನಾತ್‍ಲ್ಲ್ಯಾ ತ್ಯಾ ದಿಸಾಂನಿ ಸಯ್ತ್ ಸಕ್ಕಡ್ ಆಸ್ಲೆಂ; ಕುಟ್ಮಾಂತ್ ಮಾಯಾಮೊಗ್, ಗಾಂವಾಂತ್ ಶಾಂತಿ ಸಮಧಾನ್, ಆನಿ ಕುಡಿಂಕ್ ಬರಿ ಭಲಾಯ್ಕಿ. ಶಾಳೆತ್ಲ್ಯಾ ದಿಸಾಚಿ ಸೊಭಿತ್ ಯಾದ್ ಹಾಡುನ್ ಆಯಿಲ್ಲಿ ಹಿ ಕವಿತಾ ಯಾದಿಂಚೊ ವ್ಹೊರ್ ಘೆವ್ನ್ ಯೆತಾ.

[ಕವಿತಾ] ಶಾಳೆತಲೆ ದೀಸ್ (- ನಾಮ್‌ದೇವ್ ಗ. ಸುರ್ಲಿಕಾರ್)

ಶಾಳೆತಲೆ ದೀಸ್

ಘರಾಂತ್ ಖಾವ್ಪಾಕ್ ಜೆವ್ಪಾಕ್

ಕೆನ್ನಾ ಮೆಳ್ಳೆ ನಾ ಜಾಯ್ತಶೆಂ

ಅನವ್ಳ್ಯಾ ಪಾಯಾನೀಚ್ ಭೊಂವ್ಲೊಂ

ಪಯ್ಶೆಂ ನಾಸ್ಲೆ ಘೆವ್ಪಾಕ್ ಜೊತೆಂ

ಮೊಟ್ವೆಂ ಕಾಲ್ಸಾಂವ್ ಭೆಂಡಾರ್

ದೊನೂಯ್ ಕುಲ್ಯಾಂಚೆರ್ ಪಿಂಜ್ಕೆಂ

ಖೊಮ್ಸಾಕ್ ನಾಸ್ಲೆ ಬುತಾಂವ್

ದಿಸ್ತಾಲೆ ಪೊಟ್ ಉಕ್ತೆಂ

ಭುರ್ಗೆಂ ವರ್ಗಾತ್ ಹಾಂಸ್ತಾಲೆ

ಪಳೊವ್ನ್ ಪಿಂಜ್ಕೆಂ ಮ್ಹಜೆಂ

ಖಾಂದಾರ್ ಘೆವ್ನ್ ಯೆವ್ಪ್ ವಚಪ್

ಪುಸ್ತಕಾಂಚೆಂ ವಜೆಂ

ನಾಸ್ಲೆಂ ಕದೆಲ್ ತಾಮ್ರೆತ್

ಬಸ್ಚೆ ಪಡ್ಟಾಲೆ ಸಾಕಾರ್

ದನ್ಪಾರ್ ಜಾತಾ ಮ್ಹಣ್ಸರ್ ಭುಖೆನ್

ಕಾಳೊಖ್ ಯೆತಾಲೊ ದೊಳ್ಯಾಂ ಮುಖಾರ್

ಬುತ್ಯೊ ಬಾಟ್ಲ್ಯೊ ನಾಸ್ಲ್ಯೊ ತೆನ್ನಾ

ಭೂಖ್ ತಾನ್ ಸೊಸ್ತಾಲೆ

ಘರಾ ಪಾವ್ತಕಚ್ ಘರ್ಚೆಂ ಜೆವ್ಣ್

ಆಸ್ಲ್ಯಾರ್ ಜೆವ್ತಾಲೊ

ಅಭ್ಯಾಸ್ ಕೆಲೊ ನಾ ತರ್

ಪಡ್ಟಾಲೆ ಫಾಟೀರ್ ಲಡೆ

ರಡೂನ್ ರಡೂನ್ ಸುಜೂನ್

ಜಾತಾಲೆ ತಾಂಬ್ಡೆ ದೊಳೆ

ಒಣವ್ ಘಾಲೂನ್ ದವ್ರುನಯ್

ಫಾಟೀಚೆರ್ ಬಡಿ ಪಡ್ಟಾಲಿ

ಘಂಟಿ ವಾಜ್ತಾ ಮ್ಹಣ್ಸರ್

ಚೆಡ್ಡಿ ಲೆಗೀತ್ ಭಿಜ್ತಾಲಿ

ಶೆಂಕ್ರ್ಯಾಂಚೆರ್ ಧೊಂಪ್ರಾಂ ಘಾಲ್ತಕಚ್

ಫಾತರ್ ತೊಪೂನ್ ಜಾತಾಲೊ ಘಾವೊ

ರಾಗಾನ್ ಮಾಗೀರ್ ನಾಕಾ ತಸ್ಲ್ಯೊ

ಮನಾತ್ಲ್ಯಾ ಮನಾತ್

ಭುರ್ಗೆಂ ಬಾಈಕ್ ಘಾಳಿ ಸವೊ

- ನಾಮ್‌ದೇವ್ ಗ. ಸುರ್ಲಿಕಾರ್. [ನವೆಂಬ್ರ್, 2020]