Vonmohotsou (- Uday Mhambro)

[kovita] Vonmohotsou (- Uday Mhambro)

Rananchea, rukanchea mohotvacher ek probondh boromvcho spordho kelo tor ami sogollim kaim panamni to borounko soktamv punn tim vhaparchim panam rukak katorn kel'lim mholl'llem amchea motik kednam tori gel'lem osa? somajik viddombonank ami doreka vorsant polloitamv. Pausall suru zal'loch novem zhodd lamvteleank uprant vorsachea bhara moineamni tea layil'lea zhoddak udok ghalchi gorz mhonnun disana. Sobhit chintpachi kovita hi khorich zaun porot porot vachunk prerit korta.

[kovita] Vonmohotsou (- Uday Mhambro)

Vonmohotsou

hamv hea vonant tog marun asa

karonn mhojea moderak dor na

eka kallar ekmekank ghoxttun

uzo pett'ttali tim datt ranam

atam kannyetuch urtoli

atam hanga vonant

poilimsaroko gupatt kallokh na

sureachi kirnnam atam

dhortorecho umavo ghetat

eka zhaddachi khandi

dusrea zhaddak tenkna

datt vonant raupachi

somvkoll axil'li zonauram

atam ranant ravunk bhietat

kole, vag, hot'ti

khann sodunk gavant votat

suknnim ghontter banduk visorleat

ranant atam gamv vospak lagleat

ani gavant

atam monxambhitor novem fedd ailam

zonglam vattaupache

zhaddam roupache

zhaddam zogoupache

pausant sotri hatant gheun

vonmohotsou korpache

zamnni vonam kabar keli

mhoje xezarochi tornni ttouttovit

zhaddam marun lakddam keli

tancheach hatant vonmohotsou monoitat

ani ami ranantoli zhaddam

hem sogllem moneamni polloitat !

- Uday Mhambro. [Jul, 2020]