ಕವಿತಾकविताPoem

ಪಾಂಖೆ ನಾಶಿಲ್ಲೆ ಘರ್ (- ಉದಯ್ ಮಾಂಬ್ರೊ)

[ಕವಿತಾ] ಪಾಂಖೆ ನಾಶಿಲ್ಲೆ ಘರ್ (- ಉದಯ್ ಮಾಂಬ್ರೊ)

ಆಜ್ ಮನಿಸ್ ಕಿತೆಂ ಸವ್ಲತಾಯೆಚೆ ಗುಲಾಮ್ ಜಾಲ್ಯಾತ್‌ಕಾಯ್ ಕಿತೆಂ? ಬದ್ಲಾವಣ್ ಕಿತೆಂ ಮನ್ಶಾಚೆಂ ಮನ್ಶಾಪಣ್ ಘೆವ್ನ್ ಗೆಲಾಂಕಾಯ್ ಮ್ಹಳ್ಳೆಂ ಸವಾಲ್ ಜಾಯ್ತೆ ಪಾವ್ಟಿಂ ಆಮಕಾಂ ಧೊಸಲ್ಲೆಂ ಆಸಾ. ಸಂಸಾರಾಚ್ಯಾ ಸುರವಾತೆಚೊ ಸುರಯೊ ಜಾಂವ್, ದರಯೊ ಜಾಂವ್ ಬದಲುಂಕ್ ನಾಂ, ಚಂದ್ರ್ ತಾರಾಂ ಸಯ್ತ್ ಅಜೂನ್ ಆಸಾತ್. ಮೊಳೊಬ್ ಸಯ್ತ್ ಅಜೂನ್ ತೆಂಚ್ ಪುಣ್ ಹ್ಯಾ ಸರ್ವಾಂಚ್ಯಾ ಸಾಕ್ಶೆಚೊ ಕಿರ್ಕೊಳ್ ಮನಿಸ್ ಮಾತ್ರ್ ಬದಲ್ಲಾ ಮ್ಹಳ್ಳೊ ಆಟೊವ್ ಕರುನ್ ದಿತಾ ಹಿ ಕವಿತಾ.

ಬಾಬ್ ಉದಯ್ ಮ್ಹಾಂಬ್ರೊ ಏಕ್ ಸಂವೇದನ್‌ಶೀಲ್ ಚಿಂತಪಾಚೊ ಕವಿ. ತಾಚಿ ಎಕೇಕ್ ಕವಿತಾ ತಾಚಿ ಗವಾಯ್. ಹಿ ಕವಿತಾ ಸಯ್ತ್ ವಾಚುನ್ ಕವಿತೆಚೊ ಅಸ್ವಾದ್ ಕರುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಪಾಂಖೆ ನಾಶಿಲ್ಲೆ ಘರ್ (- ಉದಯ್ ಮಾಂಬ್ರೊ)

ಪಾಂಖೆ ನಾಶಿಲ್ಲೆ ಘರ್

ಎಕಾ ಘರಾಕ್ ಪಾಂಖೆಚ್ ನಾಸ್ಲೆಂ

ತರಿ ಘರಾಂತಲಿ ಮನ್ಶಾಂ

ವತಾನ್ ಕರ್ಪನಾಸಲಿ

ಪಾವ್ಸಾನ್ ಭಿಜ್ನಾಸಲಿ

ಥಂಡೆನ್ ಕುಡ್ಕುಡನಾಸಲಿ

ಘರಾಂತಲಿ ಮನ್ಶಾಂ ಪೊಟಾಕ್ ಗರಜ್ ಪಡ್ಟಾ ತೆನ್ನಾ

ತೀನ್ ಫಾತ್ರಾಂಚಿ ಚೂಲ್ ಪೆಟಯ್ತಾಲಿ

ರಾತೀಕಡೆ ಫಾತರ್ ಉಶ್ಯಾಕ್ ಘೆವ್ನ್

ಜಮ್ನೀಕ್ ಫಾಂಟ್ ತೆಂಕೊವ್ನ್

ಮಳ್ಬಾಚಿ ಚಾದರ್ ಪಾಂಗುರತಾಲಿ

ಘರಾಕ್ ವಣ್ಟಿ ನಾಸ್ಲ್ಯೊ

ಫುತುಫುತು ಆವಾಜ್ ವಣ್ಟೀಕ್ ಆದಳ್ ನಾಸ್ಲೆ

ಘರಾಕ್ ದಾರಾಂಯ್ ನಾಸ್ಲಿ

ಯೆತ್ಲ್ಯಾ ವತ್ಲ್ಯಾಕ್ ಘರ್ ಉಕ್ತೆ ಆಸ್ಲೆ

ಘರಾಕ್ ಆಸ್ಲಿಂ ಜನೆಲಾಂ

ಜನೆಂಲಾಂತಸೂನ್ ನಿತಳ್ ನಿರ್ಮಳ್ ವಾರೆಂ ಯೆತಾಲೆ

ಘರಾಕ್ ಪಾಂಖೆಂ ನಾಸ್ಲೆ

ವಣ್ಟಿ ನಾಸ್ಲ್ಯೊ

ದಾರಾಂಯ್ ನಾಸ್ಲಿಂ

ಜನೆಲಾಂ ಮಾತ್ ಆಸ್ಲಿಂ

ಆನಿ ಆಸ್ಲಿ ತಿ ಬುನ್ಯಾದ್

ಘರಾಚಿ ಬುನ್ಯಾದ್ ಬರಿ ಘಟ್ ಆಸ್ಲಿ

- ಉದಯ್ ಮಾಂಬ್ರೊ. [ಜನೆರ್, 2020]