ವನ್‌ಮಹೊತ್ಸವ್ (- ಉದಯ್ ಮಾಂಬ್ರೊ)

ಕಾರಣ್ ಮ್ಹಜ್ಯಾ ಮದೆರಾಕ್ ದರ್ ನಾ

ಎಕಾ ಕಾಳಾರ್ ಎಕ್ಮೆಕಾಂಕ್ ಘಶ್ಟೂನ್

ಉಜೊ ಪೆಟ್ಟಾಲಿ ತಿಂ ದಾಟ್ ರಾನಾಂ

ಆತಾಂ ಕಾಣ್ಯೆತೂಚ್ ಉರ್ತಲಿ

ಆತಾಂ ಹಾಂಗಾ ವನಾಂತ್

ಪಯ್ಲೀಂ ಸಾರಕೊ ಗುಪಾಟ್ ಕಾಳೊಖ್ ನಾ

ಸುರ್ಯಾಚಿ ಕಿರ್ಣಾಂ ಆತಾಂ

ಧರ್ತರೆಚೊ ಉಮಾವ್ ಘೆತಾತ್

ಎಕಾ ಝಾಡಾಚಿ ಖಾಂದಿ

ದುಸ್ರ್ಯಾ ಝಾಡಾಕ್ ತೆಂಕ್ನಾ

ದಾಟ್ ವನಾಂತ್ ರಾವ್ಪಾಚಿ

ಸಂವ್ಕಳ್ ಆಶಿಲ್ಲಿ ಜನಾವ್ರಾಂ

ಆತಾಂ ರಾನಾಂತ್ ರಾವೂಂಕ್ ಭಿಯೆತಾತ್

ಕೊಲೆ, ವಾಗ್, ಹತ್ತಿ

ಖಾಣ್ ಸೊದೂಂಕ್ ಗಾವಾಂತ್ ವತಾತ್

ಸುಕ್ಣಿಂ ಘೊಂಟೆರ್ ಬಾಂದೂಕ್ ವಿಸರ್ಲ್ಯಾತ್

ರಾನಾಂತ್ ಆತಾಂ ಗಾಂವ್ ವಸ್ಪಾಕ್ ಲಾಗ್ಲ್ಯಾತ್

ಆನಿ ಗಾವಾಂತ್

ಆತಾಂ ಮನ್ಶಾಂಭಿತರ್ ನವೆಂ ಫೆಡ್ ಆಯ್ಲಾಂ

ಜಂಗ್ಲಾಂ ವಾಟಾವ್ಪಾಚೆ

ಝಾಡಾಂ ರೊವ್ಪಾಚೆ

ಝಾಡಾಂ ಜಗೊವ್ಪಾಚೆ

ಪಾವ್ಸಾಂತ್ ಸತ್ರಿ ಹಾತಾಂತ್ ಘೆವ್ನ್

ವನ್‌ಮಹೊತ್ಸವ್ ಕರ್ಪಾಚೆ

ಜಾಂಣಿ ವನಾಂ ಕಾಬಾರ್ ಕೆಲಿ

ಮ್ಹಜೆ ಶೆಜಾರಚಿ ತರ್ಣಿ ಟವ್ಟವೀತ್

ಝಾಡಾಂ ಮಾರುನ್ ಲಾಕ್ಡಾಂ ಕೆಲಿ

ತಾಂಚ್ಯಾಚ್ ಹಾತಾಂತ್ ವನ್‌ಮಹೊತ್ಸವ್ ಮನಯ್ತಾತ್

ಆನಿ ಆಮಿ ರಾನಾಂತಲಿ ಝಾಡಾಂ

ಹೆಂ ಸಗ್ಳೆಂ ಮೊನ್ಯಾಂನಿ ಪಳಯ್ತಾತ್ !

- ಉದಯ್ ಮಾಂಬ್ರೊ. [ಜುಲಾಯ್, 2020]