ತೆಂವೂಯ್ ಎಕ್ ಚಲೀಚ್ ! [- ಮನೋಜ್ ನರೇಂದ್ರ ಕಾಮತ್]

[ಕವಿತಾ] ತೆಂವೂಯ್ ಎಕ್ ಚಲೀಚ್ ! [- ಮನೋಜ್ ನರೇಂದ್ರ ಕಾಮತ್]

ಎಕಾ ದಾದ್ಲ್ಯಾಕ್ ಹ್ಯಾ ಸಂಸಾರಾಂತ್ (ಭುರ್ಗೆಂ ಜಾವ್ನ್ ಯೆತಾನಾ) ಜಲ್ಮ್ ದಿಂವ್ಚಿ ಜಾವ್ನಾಸಾ ಬಾಯ್ಲ್. ಜಲ್ಮಲ್ಲೆಂ ಏಕ್ ಭುರ್ಗೆಂ ವ್ಹಡ್ ಜಾತಾ ಅಪ್ಲ್ಯಾ ಆವಯ್ಚೆಂ ದೂದ್ ಪಿಯೆವ್ನ್. ಇತ್ಲೆಂ ಸರ್ವ್ ಜಾಣಾಸುನ್‌ಯೀ ಆಜ್ ಆಮ್ಚ್ಯಾ ಸಮಾಜೆಂತ್ ಜುಲುಮ್ ಚಡುನ್ ಆಯ್ಲಾಂ ಎಕಾ ಅಸ್ತುರೆಚೆರ್. ಜಾಂವ್ ತಿ ಭಯ್ಣ್, ಬಾಯ್ಲ್, ಆವಯ್ ವ ಇಶ್ಟಿಣ್. ಮನ್ಶಾಪಣ್ ಆಸ್ಲೊ ಮನಿಸ್ ಹೆಂ ಲಿಸಾಂವ್ ಕೆದ್ನಾ ಶಿಕತ್? ಕೆದ್ನಾ ಸಮ್ಜತ್? ಆನಿ ಕೆದ್ನಾ ಪಾಳಿತ್?

ಅಪ್ಣಾಕ್ ಮೆಳ್ಣಾ ಮ್ಹಣುನ್ ಎಸಿಡ್ ಮಾರ್‌ಲ್ಲಿ ಚಲಿ ಸಯ್ತ್ ಕೊಣಾಚಿಕೀ ಧುವ್, ಭಯ್ಣ್ ಜಶೆಂ ಆಪ್ಣಾಚ್ಯಾಯ್ ಧುವೆಚೆರ್, ಭಯ್ಣಿಚೆರ್ ಅಶೆಂ ಘಡ್ತನಾ ಆಮಿ ಕಶೆಂ ಭಗ್ತಾಂವ್ ಮ್ಹಳ್ಳೆಂ ಚಿಂತಪ್ ಚಿಂತುಂಕ್ ಸಕಾನಾಸ್ಲೆ ಮನಿಸ್ ಖರೆಂಚ್ ಜಾವ್ನ್ ಮನಿಸ್ ಮ್ಹಣುಂಕ್ ಫಾವೊ? ಹೆಚ್ ಚಿಂತ್ಪಾಭಂವಾರಿಂ ವಿಣ್ಲಲಿ ಕವಿತಾ ಘೆವ್ನ್ ಅಯ್ಲಾ ಬಾಬ್ ಮನೋಜ್ ಕಾಮತ್. ಹ್ಯಾ ಕವಿತೆಂತ್ಲ್ಯಾ ಹೆರ್ ವಿಚಾರಾಂಚೆರ್ ಆಟೊವ್ ಕರುಂಕ್ ತುಮ್ಕಾಂಚ್ ಸೊಡ್ತಾಂ.

[ಕವಿತಾ] ತೆಂವೂಯ್ ಎಕ್ ಚಲೀಚ್ ! [- ಮನೋಜ್ ನರೇಂದ್ರ ಕಾಮತ್]

ತೆಂವೂಯ್ ಎಕ್ ಚಲೀಚ್!

ಆಪ್ಣಾಕ್ ಮೆಳ್ನಾ

ಮ್ಹೂಣ್ ಎಸೀಡ್ ಮಾರಿಲ್ಲೆಂ

ತೆಂವೂಯ್ ಎಕ್ ಚಲೀಚ್ ಆಸ್ಲೆಂ

ಆವ್ಯ್ಚೆಂ ತೆಂ ಸಪನ್

ಬಾಪಾಯ್ಚೆಂ ಮೊಗಾ ದಾಲನ್ ಆಸ್ಲೆಂ

ಆಯ್ಜ್ ತಾಚೊ ಚೆಹ್ರೊ

ವಳ್ಖೂಂಕ್ ಕಠೀಣ್ ಜಾಲ್ಲೊ

ಸೌಂದ್ರ್ಯ್ ಲಾಶಿಲ್ಲೆಂ

ಕಾಳೀಜ್ ತಳ್ಮಳಿಲ್ಲೆಂ

ಸೊಬೀತ್ ಮುಖಾಮಳ್ ಜಳಿಲ್ಲೊ

ಅವಿಚಾರೀಪಣಾಕ್ ಬಳಿ ಪಡೂನ್

ಆಯ್ಜ್ ಕೊಣಾಕೂಚ್ ತೆಂ ನಾಕಾ ಆಸ್ಲೆಂ

ಪಳಯ್ತ್ಲ್ಯಾಚೆ ನದ್ರೆಕ್ ಚುಕಯ್ತಾಲೆಂ

ನದ್ರೂಯ್ ಮುದ್ದಾಮ್ ಚುಕ್ತಾಲಿ

ಅಚ್ಳಯ್ ಚುಕಿಲ್ಲೆವರಿ

ತೆಂ ಫುಡಾರ್ ಶೆಣೊವ್ನ್ ಬಶಿಲ್ಲೆಂ

ಆತ್ಮವಿಶ್ವಾಸೂಯ್ ವಗ್ಡಾವ್ಲ್ಲೊ

ಕಾಂಯ್ ವರ್ಸಾಂ

ಅಶೀಂಚ್ ಗೆಲಿಂ ಶೆಣೂನ್

ಉಜ್ವಾಡಾನ್ ಲೆಗೀತ್

ಕಾಳೊಖ್ ಸೊಸೂನ್

ವಾತ್ ದಿವ್ಯಾಚಿ ಪೆಟ್ಲೀಚ್ ನಾ

ಸಾಸಾಯ್ ಉಜ್ವಾಡ್ ಜಾಲೊಚ್ ನಾ

ಆಯ್ಜ್ ತಾಂಣೆಂ ನವೊ ಮಾಗ್ ಕಾಡಿಲ್ಲೊ

ಚಿತ್ರಾಂ ರಂಗೊವಂಕ್ ತೆಂ ಶಿಕ್ಲೆಂ

ದಡಿಲ್ಲ್ಯೊ ಭಾವ್ನಾ ಉಕ್ತಾವಂಕ್ ಶಿಕ್ಲೆಂ

ತೆಂ ಚಿತ್ರಾಂಚೊ ಮೊಗ್ ಕರ್ತಾಲೆಂ

ಆಪ್ಲೊ ಮೊಗ್ ಥಂಯ್ ಸೊದ್ತಾಲೆಂ

ತಾಚೊ ಸಮಾಜಾವಯಲೊ ವಿಶ್ವಾಸ್ ಉಡಿಲ್ಲೊ

ಸಮಾಜಾಖಾತೀರ್ ಖೆಳ್ಣೆಂ ಮಾನಿಲ್ಲೆಂ ತೆಂ

ಹಳು ಹಳು ಜಿಯೆವಂಕ್ ಶಿಕ್ಲೆಂ

ವ್ದೆಶ್ ಧಗ್ಧಗಿಲ್ಲೊ ಜಿರೊವಂಕ್ ಶಿಕ್ಲೆಂ

ದೆಖ್ಣೆಂ, ನದ್ರೆಕ್ ಶಿರ್ಕಾವಪಿ

ಸಮಾಜಾಕ್ ದೆಖ್ ದಿವಂಕ್ ಶಿಕ್ಲೆಂ !

ಮರ್ಣಾಂತ್ಲ್ಯಾನ್ ಭಾಯ್ರ್ ಸರೂನ್

ತೆಂ ಜಗೂಕ್ ಸೊದ್ತಾಲೆಂ

ಸಮಾಜಾಚಿ ವಿಚಾರಸರಣಿ

ಬದ್ಲೂಂಕ್ ಸೊದ್ತಾಲೆಂ

ವಿಖಾರ್ ಸೌಂದ್ರ್ಯಾಂತ್ ನಾಶಿಲ್ಲೊ

ವಿಖಾರಿ ನದ್ರೆಂತ್ ನರಾಚ್ಯಾ

ವಿಖಾರ್ ಮಾದೀವಿಶಿಂ ಮಾತಿಲ್ಲೊ

ಎಕ್ ಜೀಣ್ ಸಾಸ್ಣಾಚಿ

ವಿಖಾರಿ ಕರೂನ್

ಸೌಂದ್ರ್ಯಾಚಿ ಸಂಕ್ಲ್ಪನಾ ಬದ್ಲೂನ್

ತೆಂ ಲೊಕಾಂಕ್ ಬದ್ಲೂಂಕ್ ಶಕ್ನಾಸಲೆಂ

ತಾಣೆಂ ಆಪ್ಣಾಕೂಚ್

ಬದ್ಲಪಾಚೊ ಯತ್ನ್ ಕೆಲ್ಲೊ

ದೆಖ್ ದಿವ್ನ್ ಹೆರಾಂಖಾತೀರ್

ಮ್ಹಜೆ, ತುಜೆ, ಸಗ್ಳ್ಯಾಂಖಾತೀರ್

ಹಿ ಮಾನ್ಸೀಕ್ ಕೀಡ್

ಆತಾಂ ತರಿಂ ಸೊಂಪೂಂಕ್ ಜಾಯ್

ವಿಕೃತೀಂತ್ಲ್ಯಾನ್ ಭಾಯ್ರ್ ಸರೂನ್

ಅಸ್ತುರೆಚೆಂ ಮನ್ ಆನಿ ಇಭ್ರತ್

ಜಪ್ಪಾಕ್ ದಾದ್ಲ್ಯಾನ್ ಶಿಕೂಂಕ್ ಜಾಯ್

- ಮನೋಜ್ ನರೇಂದ್ರ ಕಾಮತ್. [ದಸೆಂಬ್ರ್, 2019]