ತೆ ನೆಣ್ತೆ ಘಾಮಾ ಥೆಂಬೆ [ಆಂಡ್ರು ಎಲ್. ಡಿ’ಕುನ್ಹಾ]

[ಕವಿತಾ] ತೆ ನೆಣ್ತೆ ಘಾಮಾ ಥೆಂಬೆ [ಆಂಡ್ರು ಎಲ್. ಡಿ’ಕುನ್ಹಾ]

ಇಂಗ್ಲಿಶಾಂತ್ Sympathy ಆನಿಂ Empathy ಮ್ಹಳ್ಳೆ ದೋನ್ ಸಬ್ಧ್ ಆಸಾತ್, ದೋನ್ ವೆ-ವೆಗ್ಳೆ ಅರ್ಥ್ ದಿತಾತ್. Sympathy ಮ್ಹಳ್ಯಾರ್ ಹೆರಾಂಚಿಂ ಪರಿಗತ್ ಪಳೆವ್ನ್ ತಾಚೆರ್ ಭಿರ್ಮತ್ ಪಾಂವ್ಚಿ ಪುಣ್ Empathy ಮ್ಹಳ್ಯಾರ್ ಹೆರಾಂಚಿ ದೂಕ್ ಅಪ್ಣಾನ್ ಅನ್ಭೋಗ್ ಕರ್ಚಿ. ಏಕ್ ಖರೊ ಕವಿ ಮಾತ್ರ್ ಅಸಲೊ ಅನ್ಭೋಗ್ ಕರುಂಕ್ ಸಕ್ತಾ ಆನಿ ಕಾಂಯ್ ತೆಂಪಾಥಾವ್ನ್ ಕವಿ ಆಂಡ್ರ್ಯೂಚ್ಯೊ ಕವಿತಾ ಅಧ್ಯಯನ್ ಕರುನ್ ಹಾಂವ್ ಆಯ್ಲಾಂ ದೆಕುನ್ ಆಂಡ್ರ್ಯೂಚ್ಯಾ ಕವಿತೆಚ್ಯಾ ಎಕೆಕಾ ಉತ್ರಾಂನಿ ಲಿಪೊನ್ ಆಸ್ಚಿ ದಣ್ಸತೆಲ್ಯಾಂಚಿ ದೂಕ್, ಅತ್ರೆಗ್, ಆಶಾ ಕಾಳ್ಜಾಚ್ಯಾ ಕಾನಾಂಕ್ ಆಯ್ಕತಾತ್.

ಮನ್ಶಾಚ್ಯಾ ಪಾಂಚ್ ಇಂದ್ರಿಯಾಂತೂನ್ ಭಾಯ್ರ್ ಯೆಂವ್ಚೆಂ ಮ್ಹೆಳೆಂ. ಹೆಂ ಪ್ರಾಕೃತಿಕ್/ಸೈಸರ್ಗಿಕ್ ಸಹಜ್. ಪುಣ್ ತಾಂತುಂ ’ಘಾಮ್’ ಸಬ್ಧಾಚೊ ಸಾಹಿತಿಕ್ ಅರ್ಥ್ ವಿಸ್ತಾರ್ ಆಸಾ. ಮಿನತ್ ಆನಿ ಪ್ರಾಮಾಣಿಕತೆಚೊ ಸಂಕೇತ್ ದಿಂವ್ಚೊ ಘಾಮ್ ಪಯ್ಸ್ ಆಸೊನ್ ಆಂಗಾರ್ ಬಾಡಿಸ್ಪ್ರೇ/ಪರ್ಫ್ಯೂಮ್ ವೊತುನ್ ಘಾಮಾಚೆರ್ ಪಾನಾಂಗಟ್ಲೆ ಬರಯ್ತೆಲ್ಯಾಂತ್ಲಿ ಕವಿತಾ ಹಿ ನ್ಹಯ್. ರಸ್ತ್ಯಾದೆಗೆಲ್ಯಾ ಖಣಿಂತ್ ಸ್ವತಾ ಪಡ್ಲೆಲ್ಯಾ ವೆಳಾರ್ ಉಕ್ಲುಂಕ್ ಆಯಿಲ್ಲ್ಯಾ ಎಕಾ ಮಿನತ್ ಕರ್ತೆಲ್ಯಾಚ್ಯಾ ಘಾಮಾನ್, ಥೊಡ್ಯಾಚ್ ದಿಸಾದಿಂ ತಸಲ್ಯಾಚ್ ಘಾಮಾಚ್ಯಾ ಥೆಂಬ್ಯಾಂಚೆರ್ ಶಿಣೊನ್ ಆಂಗ್ ಹಿವ್ಳಾಯಿಲ್ಲ್ಯಾ ಚಿಂತ್ಪಾಕ್ ಅಪುರ್ಭಾಯೆನ್ ಖೊಂಕ್ಚಿ ಕವಿತಾ. ಹರ್ಶೆಂಚೆಪರಿಂ ’ಬಾಬಾಚ್ಯೊ ಯಾದಿ’ ಹ್ಯಾ ಉಕ್ಲುಂಕ್ ಆಯಿಲ್ಲ್ಯಾಕ್ ಅಪ್ಲೊ ಜಾವ್ನ್ ಕರ್ಚೆಂ ಸಾಂಕೇತಿಕ್ ಅರ್ಥ್ ಕರುನ್ ದಿತಾ. ಹಾಂಗಾಸರ್ ಘಾಮ್, ರಗತ್, ಜೀಬ್, ಖಣ್ ಸರ್ವ್ ಎಕೇಕ್ ವೆಕ್ತಿತ್ವ್, ಸ್ವಭಾವ್ ಉತ್ರಾವ್ನ್ ಕವಿತಾ ಫುಡೆಂ ವೆತಾ ಆನಿ ಅಖೇರಿಚ್ಯಾ ವ್ಹಳಿಂತ್ ತೆ ನಾಂವ್ ನಾತ್‌ಲ್ಲೆ ನೆಣ್ತೆ ಘಾಮಾ ಥೆಂಬೆ ಕವಿಚಿ ಕಾತ್, ಮಾಸ್ ಚಿರುನ್ ಶಿರಾಂಶಿರಾಂನಿ ಚರ್ತಾತ್ ಆನಿ ಮಿಟಾ ಹುಲೊಪ್ ಸೊಸುಂಕ್ ತಡ್ವನಾಸ್ತಾಂ ಕವಿತೆಚೆ ಸಬ್ಧ್ ಜಾತಾತ್ ...... ಭವ್ತಿಕ್ ಸಂಸಾರಾಚ್ಯಾ ಉತ್ರಾಂನಿ ಹ್ಯಾ ಸಬ್ಧಾಂನಿ ಸಾರ್ ಆಸ್ಚೊನಾ ಪುಣ್ ಸಂವೇದನಾತ್ಮಕ್ ಸಂಸಾರಾಂತ್ ಎಕೇಕ್ ಸಬ್ಧ್ ವಾಚ್ಪ್ಯಾಕ್ ಮೊನೊ ಕರ್ತಾ.

[ಕವಿತಾ] ತೆ ನೆಣ್ತೆ ಘಾಮಾ ಥೆಂಬೆ [ಆಂಡ್ರು ಎಲ್. ಡಿ’ಕುನ್ಹಾ]

ತೆ ನೆಣ್ತೆ ಘಾಮಾ ಥೆಂಬೆ

ತಾಚೊ ಘಾಮ್ ತಾಣೆ

ಬೊಟಾಂನಿ ಪುಸುನ್ ಹಾತ್ ಪಾಪುಡ್ತಾನಾ,

ಉಸ್ಳಾಲ್ಲ್ಯಾ ಥೆಂಬ್ಯಾಂಕ್ ವಾರ್‍ಯಾನ್ ಆರವ್ನ್

ತಾಚ್ಯಾ ಪಾಟ್ಲ್ಯಾನ್ ಚಮ್ಕುನ್ ವೆಚ್ಯಾ

ಮ್ಹಜ್ಯಾ ಆಂಗಾರ್ ಶಿಂವ್ರಾಯ್ತಾನಾ...

ಶ್ಶೀ! ಹಾಂವ್ ಕಾಂಟಾಳುನ್ ಕದ್ವಳ್ತಾಂ!

(ಘಾಮಾಂತ್ ಅಸಾ ತರೀ ಕಿತೆಂ

ಅಶೆಂಯ್ ಆಂಗ್ ಹಿವ್ಳಾಂವ್ಚಾ ತಸಲೆಂ!?)

ಘಡ್ಯೆನ್ ಚಾಬುಕ್ ಜಾಲಿ ಮ್ಹಜಿ ಜೀಬ್...

ಚಾರ್ ಉತ್ರಾಂ ಸಳ್ಸಳಿಂ

ತಾಚ್ಯಾ ಭಿಜಲ್ಲ್ಯಾ ಪಾಟಿಕ್ ಅಂರ್ದಿತಾನಾ-

ಚಲತ್ ರಾವ್ಲೊ ತೊ ಕಾನ್ ಧಾಂಪುನ್

ದೀಸ್ ಪಾಶಾರ್ ಜಾಲ್ಲೆ...

ತ್ಯಾ ಧೊನ್ಪಾರಾಂ,

ಏಕಾ ಕಾರಾನ್ ಭುಜಾಂಕ್ ಹಾಂಡುನ್,

ಮಾಕಾ ಖಣ್ಯೆಕ್ ಪರ್‍ತಿತಾನಾ

ಮೊಬಾಯ್ಲ್‌ಗಾರ್ ಮಾನಾಯ್ ಹಾತ್ ಲಾಂಬವ್ನ್

ಅಟೆವಿಟ್ಯಾಂಚೆ ವಿಡಿಯೊ ಕಾಡುಂಕ್ ಲಾಗ್ಲೆ!

ಮ್ಹಜ್ಯಾ ಪುನ್ಯಾನ್-

ರಸ್ತ್ಯಾಚೊ ಎಕ್ಲೊ ಕಾಮಾಗಾರ್

ದೆಂವ್ಲೊ ಖಣ್ಯೆಂತ್…

ಮ್ಹಜ್ಯಾ ಘಾಮಾಂತ್,

ಮ್ಹಜ್ಯಾ ರಗ್ತಾಂತ್,

ಮ್ಹಜ್ಯಾ ದುಕಾಂತ್,

ಮ್ಹಜ್ಯಾ ಘಾಯಾಂತ್,

ತಾಚ್ಯಾ ಘಾಮಾ ಥೆಂಬೆ

ಮಿಸ್ಳಾತಾನಾ...

ಭುರ್‍ಗ್ಯಾಪಣಾರ್ ಮುರ್‍ಯಾ ಥಾವ್ನ್ ಪಡೊನ್,

ಹಾಂವ್ ಘಾಯೆಲ್ಯಾವೆಳಿಂ

ಖೊರೆಂ ಸೊಡ್ನ್ ಧಾಂವೊನ್ ಯೇವ್ನ್,

ಉಕೊಲ್ನ್ ವೆಲ್ಲ್ಯಾ ಮ್ಹಜ್ಯಾ ಬಾಬಾಪರಿಂ,

ತ್ಯಾ ಮನ್ಜ್ಯಾನ್ ಜತ್ನೆನ್ ಉಕಲ್ನ್...

ಹೆರ್ ದೊಗಾಂ ಹಾತಿಂ ಒಪ್ಸಿಲೆಂ-

ಹೆ ಮನಿಸ್ ಮ್ಹಜ್ಯಾ ಬಾಬಾಚೆಂ ರೂಪ್!

ತಾಂಚೊಯ್ ಮಣಿಯೊ ಮ್ಹಜ್ಯಾ ಅಂಗಾರ್!

ಘಾಮ್ ಪವಿತ್ರ್ ಪವಿತ್ರ್

ಬಾಬಾಚ್ಯಾ ಮೊತಿಯಾಂಚೊ ಸುಂರ್‍ಗಾರ್!!

ತ್ಯಾ ವಾಟೆನ್ ಚಮ್ಕತಾನಾ,

ವಾರ್‍ಯಾನ್ ಆರಾವ್ನ್ ಮ್ಹಜೆರ್ ಶೆಣೆಲ್ಲೆ,

ಮ್ಹಜ್ಯಾ ಚಾಬುಕ್ ಜಿಬೆನ್ ಅನಾಥ್ ಕೆಲ್ಲೆ

ತೆ ನಾಂವ್ ನಾತಲ್ಲೆ

ನೆಣ್ತೆ ಘಾಮಾ ಥೆಂಬೆ,

ಮ್ಹಜಿ ಕಾತ್, ಮಾಸ್ ಚಿರುನ್

ಚರ್‍ತಾತ್ ಮ್ಹಜ್ಯಾ ಕಾಳ್ಜಾ ಶಿರಾಂನಿ !

ಮಿಟಾ ಹುಲೊಪ್ ತಡ್ವಾನಾಸ್ತಾಂ

ಕವಿತೆಂತ್ಲೆ ಸಬ್ದ್ ಜಾತಾತ್!

- ಆಂಡ್ರು ಎಲ್. ಡಿ’ಕುನ್ಹಾ  [ಎಪ್ರಿಲ್, 2025]