ಕವಿತಾकविताPoem

Bhangaracho Pinjro

Kovita

Bhangaracho Pinjro

Kovitechea thoddeach utramni kitlo gunddayecho vixoi attapunk sadhy mhonncheak hi kovita opurbhayechi govai dita. Hangasor suknnem, mukt digontachea bhangarant svotontr ritin ubhunk sokchem dhornnichea voddint sampoddta. Kovita vachun gel'leporinch hem pintur voilebhar dista punn kovitechea utrancher il'lo attovo kelo tor amim, amchem chintop, amchem vektitv soit hea suknneak tall poddanam? aichea kallar ami choddtamvamni bhulchem bhoutik doulotek, dakoupak xivai digontachea bhangrallea somsarak vechem mon soit asanastam amim bhamrallea kallokachea pinjrant koid zatamv.

Andrew-cheo thoddeo kovita adheatmik chintpachi saulli attapche tosoleo. Hi soit adheatmik chintpachi kuruh dita. Digontacho bhangrallo somsar mhollear somsari axa-otreg-svarth mukt somsar. Punn monis hea somsarant kaim khinnachea sukhak lobdon koxem somajechea pinjreant opnnak koidi koroun jieta mholl'llo niall dita.

Bhangaracho Pinjro

Mukt mollbar,
ubchem suknnem
digontachea bhangarant
upyeunko soktem!

Punn na!
bhangarachea pinjreak
bhul'lem
dhornnichea voddant
onontak visrolem!

Otam,
pinjro porzollta
bhailea ujvaddant;
suknnem kollvollta
bhitorlea kallokant

Borovpi

Andrew L. Dcunha

1984 (Pattlea 42 vorsam) thaun konknnent sahity rochun ascho Andrew L Dcunha ek lokamogall kovi. Gamvan Gurpur Kin'nikombollacho to otam Bejai vosti korn asa. Devadhin Denis ani Mary Dcunha hanchea sat bhurgeam poiki to nimanno. Tannem 1000 voir kovitam, 150 ko mikvon lekhnam ani 30 mottveo kannio boroileat. ’Vhollu Vhollu Vhall Vhallea’ (2004 - Ashawadi Prakashan), ’Onzurachem Pan’ (2013 - Kovita Trust) ani ’Ayeracho Buk’ (2014 - Karnataka Konknni Sahity Okaddemi) tache prokttit kovita zome. Tachea "Onzurachem Pan" Pustokak Karnataka Konknni Sahity Okaddemi proxsoti, AIKWO (Okhil Bharot Konknni Boroupeancho Ektar Pursokar), Vishwa Konkani Kendra-cho Vimala V. Pai Kovita Pursokar ani Dr.T.M.A.Pai Foundation-acho Pustok Pursokar taka lableat. Ailevar tachea "Ujvaddachye Vengent" kovita pustokak Karnataka Konknni Sahity Proxsoti lablea. 2023 vorsachi Rajy Mott'ttachi “Sondesh Konknni Sahity Proxsoti” taka lablea.

Mongllur Akax‍vanni thaun sumar 40 konknni kar‍yokromam tannem sador keleant. Sumar 38 vorsam adim Raknno potrar ‘Andru Mam'’ likhnne namvan bhurgeancho somsar vibhag tannem choloun vhela. Amcho Yuvok potrar nirvahok sompadok zaun vaur dila. "Izoicho Kollo" potracho sompadok zaun vavur‍la. Daiji Dubai Boroupeanchea Ektaracho Sompadok zaun vaur dila. Maai‍bhaas.com zalli zagear, Raknno, Dirvem, Ujvadd potramni kovita onkonn tannem choloilam. Raknnear tacho "Kas Somsar" onkonn, Noman Jezu Ballok potrar "Khas Somsar" onkonn oni Amcho Sondex potrar sokallik lekhnam sorag prokott zaun asat. Tannem att pustokank prostaun boroilam. Vevegllea konknni kovita spordeancho, konknni kovita sador sortencho toxench kornattok konknni sahity okaddemichea pustok proxsotecho voroinnar zaun vaur dila. Gamvant ani porgamvant sobar kovitagoxtti tannem choloun veleat. Kovitam vixim sobar probondh monddon keleat ani upneas dileat. “Kovita Trust” cho to trustee zaun asa. Kovita.com zalli zagear sompadokiyam to boroita.

All 14 pages by this writer