ಕವಿತಾकविताPoem

ಭಾಂಗಾರಾಚೊ ಪಿಂಜ್ರೊ

ಕವಿತಾ

ಭಾಂಗಾರಾಚೊ ಪಿಂಜ್ರೊ

ಕವಿತೆಚ್ಯಾ ಥೊಡ್ಯಾಚ್ ಉತ್ರಾಂನಿ ಕಿತ್ಲೊ ಗುಂಡಾಯೆಚೊ ವಿಶಯ್ ಆಟಾಪುಂಕ್ ಸಾಧ್ಯ್ ಮ್ಹಣ್ಚ್ಯಾಕ್ ಹಿ ಕವಿತಾ ಅಪುರ್ಭಾಯೆಚಿ ಗವಾಯ್ ದಿತಾ. ಹಾಂಗಾಸರ್ ಸುಕ್ಣೆಂ, ಮುಕ್ತ್ ದಿಗಂತಾಚ್ಯಾ ಭಾಂಗಾರಾಂತ್ ಸ್ವತಂತ್ರ್ ರಿತಿನ್ ಉಭುಂಕ್ ಸಕ್ಚೆಂ ಧರ್ಣಿಚ್ಯಾ ವೊಡಿಂತ್ ಸಾಂಪಡ್ತಾ. ಕವಿತಾ ವಾಚುನ್ ಗೆಲ್ಲೆಪರಿಂಚ್ ಹೆಂ ಪಿಂತುರ್ ವಯ್ಲೆಭಾರ್ ದಿಸ್ತಾ ಪುಣ್ ಕವಿತೆಚ್ಯಾ ಉತ್ರಾಂಚೆರ್ ಇಲ್ಲೊ ಆಟೊವ್ ಕೆಲೊ ತರ್ ಆಮಿಂ, ಆಮ್ಚೆಂ ಚಿಂತಪ್, ಆಮ್ಚೆಂ ವೆಕ್ತಿತ್ವ್ ಸಯ್ತ್ ಹ್ಯಾ ಸುಕ್ಣ್ಯಾಕ್ ತಾಳ್ ಪಡಾನಾಂ? ಆಯ್ಚ್ಯಾ ಕಾಳಾರ್ ಆಮಿ ಚಡ್ತಾಂವಾಂನಿ ಭುಲ್ಚೆಂ ಭವ್ತಿಕ್ ದವ್ಲತೆಕ್, ದಾಕವ್ಪಾಕ್ ಶಿವಾಯ್ ದಿಗಂತಾಚ್ಯಾ ಭಾಂಗ್ರಾಳ್ಯಾ ಸಂಸಾರಾಕ್ ವೆಚೆಂ ಮನ್ ಸಯ್ತ್ ಆಸಾನಾಸ್ತಾಂ ಆಮಿಂ ಭಾಂರಾಳ್ಯಾ ಕಾಳೊಕಾಚ್ಯಾ ಪಿಂಜ್ರಾಂತ್ ಕಯ್ದ್ ಜಾತಾಂವ್.

ಆಂಡ್ರ್ಯೂಚ್ಯೊ ಥೊಡ್ಯೊ ಕವಿತಾ ಆಧ್ಯಾತ್ಮಿಕ್ ಚಿಂತ್ಪಾಚಿ ಸಾವ್ಳಿ ಆಟಾಪ್ಚೆ ತಸಲ್ಯೊ. ಹಿ ಸಯ್ತ್ ಆಧ್ಯಾತ್ಮಿಕ್ ಚಿಂತ್ಪಾಚಿ ಕುರುಃ ದಿತಾ. ದಿಗಂತಾಚೊ ಭಾಂಗ್ರಾಳೊ ಸಂಸಾರ್ ಮ್ಹಳ್ಯಾರ್ ಸಂಸಾರಿ ಆಶಾ-ಅತ್ರೆಗ್-ಸ್ವಾರ್ಥ್ ಮುಕ್ತ್ ಸಂಸಾರ್. ಪುಣ್ ಮನಿಸ್ ಹ್ಯಾ ಸಂಸಾರಾಂತ್ ಕಾಂಯ್ ಖಿಣಾಚ್ಯಾ ಸುಖಾಕ್ ಲಬ್ದೊನ್ ಕಶೆಂ ಸಮಾಜೆಚ್ಯಾ ಪಿಂಜ್ರ್ಯಾಂತ್ ಅಪ್ಣಾಕ್ ಕಯ್ದಿ ಕರವ್ನ್ ಜಿಯೆತಾ ಮ್ಹಳ್ಳೊ ನಿಯಾಳ್ ದಿತಾ.

ap-ald1

ಭಾಂಗಾರಾಚೊ ಪಿಂಜ್ರೊ

ಮುಕ್ತ್ ಮೊಳ್ಬಾರ್,
ಉಬ್ಚೆಂ ಸುಕ್ಣೆಂ
ದಿಗಂತಾಚ್ಯಾ ಭಾಂಗಾರಾಂತ್
ಉಪ್ಯೆಂವ್ಕ್ ಸಕ್ತೆಂ!

ಪುಣ್ ನಾ!
ಭಾಂಗಾರಾಚ್ಯಾ ಪಿಂಜ್ರ್ಯಾಕ್
ಭುಲ್ಲೆಂ
ಧರ್ಣಿಚ್ಯಾ ವೊಡಾಂತ್
ಅನಂತಾಕ್ ವಿಸ್ರಲೆಂ!

ಅತಾಂ,
ಪಿಂಜ್ರೊ ಪರ್ಜಳ್ತಾ
ಭಾಯ್ಲ್ಯಾ ಉಜ್ವಾಡಾಂತ್;
ಸುಕ್ಣೆಂ ಕಳ್ವಳ್ತಾ
ಭಿತರ್ಲ್ಯಾ ಕಾಳೊಕಾಂತ್

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

Your name

Your comment

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 15 pages by this writer