ಸೂಂಯೆರ್ (- ಅತಿಶಾ ಸುರ್ಲೇಕರ್)

[ಕವಿತಾ] ಸೂಂಯೆರ್  (- ಅತಿಶಾ ಸುರ್ಲೇಕರ್)

ಎಕಾ ವಯ್ರಸಾನ್ ಸಂಸಾರ್‌ಭರ್ ಲೊಕಾಂಕ್ ಭಿರಾಂತೆನ್ ಜಿಯೆಂವ್ಕ್ ಶಿಕಯ್ಲೆಂ. ಹ್ಯಾ ವಯ್ರಸಾನ್ ಜಾತ್-ಧರ್ಮ್ ಲೆಕ್ಲೊನಾ, ಗ್ರೇಸ್ತ್ ದುಬ್ಳೊ ಮ್ಹಣ್ ಲೆಕ್ಲೆಂ ನಾ, ದಾದ್ಲೊ ಬಾಯ್ಲ್ ಮ್ಹಣ್ ಲೆಕ್ಲೆಂ ನಾ. ಪುಣ್ ಹೆಚ್ ವೆಳಾರ್ ಕಾಂಯ್ ಯುಗಾಂನಿ ಸಮಾಜಿಂತ್ ಜಿಯೆವ್ನ್ ಆಸ್ಚ್ಯಾ ವೆಗ್-ವೆಗಳ್ಯಾ ವಾಯ್ರಸಾಂಚೆರ್ ಹಿ ಕವಿತಾ ಅಪುರ್ಭಾಯೆನ್ ಅರ್ಸೊ ಧರ್ತಾ. ಲೋಕ್ ಕಿತ್ಲೊ ಶಿಕ್ಪಿ ಜಾಲ್ಯಾರೀ ಸಭಾರ್ ಸಂಗ್ತೆಂನಿ ತಾಚ್ಯಾ ಗಿನ್ಯಾನಾಚೆಂ ದಾರ್ ಅಜೂನ್ ಬಂದ್ ಆಸಾ ಮ್ಹಳ್ಳೆಂ ಹಿ ಕವಿತಾ ಸೊಭಿತ್ ರಿತಿನ್ ಸಾಂಗ್ತಾ.

[ಕವಿತಾ] ಸೂಂಯೆರ್  (- ಅತಿಶಾ ಸುರ್ಲೇಕರ್)

ಸೂಂಯೆರ್

ಹಾಂವ್ ಅಸ್ಪೃಶ್ಯ್ ನ್ಹಂಯ್

ಅಸ್ತೂರೆಚಿ ಜಾತ್ ಮ್ಹಜಿ

ಮಾಸೀಕ್ ಪರಿಕ್ರಮಾ

ಹಿ ಅಸ್ಮಿತಾಯ್ ಮ್ಹಜಿ....

ಸಮಾಜಾಚಿ ರೀತ್ ನಿರಾಳಿ,

ಅಸ್ಮಿತಾಯ್ ಸಾಂಭಾಳೂಂಕ್

ಪಾಳ್ಚ್ಯೊ ಪಡ್ಟಾ

ನಿಯ್ಮ್ ಆನಿ ಅಟಿ...

ಮಾಸಿಕ್ ಪಾಳ್ಯೆಂತ್

ವಿಲಗ್ ಥಾಳ್ಯೆಂತ್ ಜೆವ್ತಾ

"ಸೊಶಿಯೆಲ್ ಡಿಸ್ಟನ್ಸ್ " ಪಾಳೀತ್

ಖಾಂಚ್ಕೊನಶಾಕ್ ಬಸಯ್ತಾತ್.

ಆಚಾಂವಾತಲೆ ಲೊಣ್ಚೆ

ಚಡ್ನಾಕಾ ದೆವ್ಳಾಚೆ ಪಾಂವ್ಡೆ

ಕಿತ್ಲೆಚ್ ಕೆಲೆ ಖಟ್ಲೆ

ನಶ್ಟೆಂ ಆಳ್ ಭಶ್ಟೆಂಪಣಾಚೆ.

ಶಿಕ್ಷೀತ್ ಪಿಳ್ಗಿ

ಉಗ್ತೆಂಪಣಾಂತ್ ಉಲಯ್ನಾ

"ಸೆನಿಟೆರಿ ನೆಪ್ಕೀನ್ "ಮಾಗೂಂಕ್,

ವಾಚಾ ತಾಂಕಾ ಫುಟ್ನಾ...

ನರ್ - ನಾರಿ ಸಮಾನ್ ಮ್ಹಣ್ಟಾ

ಫರ್ಮಾಸೀಂತ್ಲ್ಯಾನ್ ಭಾಯ್ರ್ ಸರ್ತಾಚ್

ತೀಚ್ "ನರ್ಜಾತ್",

ಫುತ್ಫುತೊನ್ ಹಾಸ್ತಾ.

ಸಾಂಗೂನ್ ಮನ್ ಥಕ್ಲಾ

ಆರೆ ಪಾಪ್ಯಾ!

"ಹಿ ಮಹಾಮಾರಿ ನ್ಹಂಯ್,

ಮಾಸಿಕ್ ಪರಿಕ್ರಮಾ

ದಿತಾ ಗವಾಯ್

ಪಾನ್ವೆಲ್ ಕುಳಾಚಿ

ಗರ್ಭಾಂತ್ ಫುಲಯ್ತಾ

ಪಿಕಾಳ್ ಕುಳಾಚ್ಯಾ ಪೊರ್ಸಾಂತ್

ಕಳೆ - ಕಳ್ಯೊ ಖೆಳಯ್ತಾ"...

ಜಾತ್ - ಪಾತೀಚೆ ಬಂಧನ್ ನಾ

ಗರೀಬ್ - ಶ್ರೀಮ್ತಾಂಚೊ ಭೆದ್ ನಾ

ದಾಳೀಲ್ಲಿ ಶೀಮ್

ಹಾಂವೆಚ್ ಕಿದ್ಯಾಕ್ ಹುಪಪ್ ನಾ?

ಹ್ಯಾ ಸಂವ್ಸಾರಾಂತ್,

ಕೊಣ್ ಆಸಾ ವ್ಹಯ್'ರೆ ಸವ್ಳೊ?

ಹೊ "ಸುಂಯೆರ್"

ಹಾಂವೆಚ್ ಕಿದ್ಯಾಚ್ ಪಾಳ್ಚೊ?

- ಅತಿಶಾ ಸುರ್ಲೀಕಾರ್. [ಅಕ್ಟೊಬ್ರ್, 2020]