ಸೊಂರ್‍ಗೊ (- ಪ್ರೇಮ್ ಮೋರಸ್)

[ಕವಿತಾ] ಸೊಂರ್‍ಗೊ (- ಪ್ರೇಮ್ ಮೋರಸ್)

ಸೊಂರ್‍ಗೊ ಜೀವ್ ನಾತ್ಲಲಿ, ಮತ್ ನಾತ್ಲಲಿ ಏಕ್ ಖೆಳಾ-ವಸ್ತ್ ಮನಶಾನ್ ಕೆಲ್ಲಿ ತರ್‌ಯೀ ಸೊಂರ್‍ಗೊ ಮನಶಾಂಚ್ಯಾಕೀ ಉಭಾರ್ ಆಸುನ್ ಮನಶಾನ್ ಪಳೆಂವ್ಕ್, ಪಾರ್ಕುಂಕ್ ಜಾಯ್ನಾಸ್ಚೆಂ ಪಾರ್ಕುಂಕ್ ಸಕ್ತಾ. ಹಿ ಕವಿತಾ ಗುಂಡಾಯೆನ್ ಪಳೆಲಿ ತರ್ ಸಭಾರ್ ರಿತಿಚ್ಯೊ ವಯ್ಚಾರಿಕ್ ಕಾಣಿಯೊ ಅಪುರ್ಭಾಯೆನ್ ಸಾಂಗುನ್ ವೆತಾತ್. ತಾಂತುಂ ಏಕ್ ಅಶಿ ಆಸುಯೆತಾ; ಜೆದ್ನಾಂ ಪಾಸೊನ್ ಸಂಯಮ್/ಸೊಸ್ಣಿಕಾಯೆಚ್ಯಾ ಗಡಿಭಿತರ್ ಮನಿಸ್ ಜಿಯೆತಾ ತೆದೊಳ್ ಪರ‍್ಯಾಂತ್ ಮನಿಸ್ ಶಾಂತಿ/ಸಮಧಾನ್ ಆಪ್ಣಾಂವ್ಕ್ ಸಕ್ತಾ. ಆನಿ ಜೆದ್ನಾಂ ತ್ಯಾ ಸಂಯಮಾಚೊ ದಾಗೊ ತುಟ್ತಾ ತೆದ್ನಾಂ ಥಂಯ್ಚರ್ ಕಸಲೆಂಚ್ ಬಾಂಧುನ್ ಆಸಾನಾ; ನಾ ಸಂಬಂಧಾಚಿ ಗಡ್, ನಾ ಅಪ್ಲೊ-ಪೆಲೊ ಮ್ಹಳ್ಳಿ ತಡ್.

[ಕವಿತಾ] ಸೊಂರ್‍ಗೊ (- ಪ್ರೇಮ್ ಮೋರಸ್)

ಸೊಂರ್‍ಗೊ

ಪರ್ಜಳ್ಚ್ಯಾ ಸುರ್‍ಯಾಕ್ ಆಡ್ ಕೋಣ್ ರಾವಾತ್?

ನಿಳ್ಶ್ಯಾ ಗಗನಾರ್ ಹರ್ಧೆಂ ಕೋಣ್ ಫುಲಯ್ತ್?

ಉಡ್ಚ್ಯಾ ಪಡ್ಚ್ಯಾ ನಾದಾಕ್ ವಯ್ರ್ ಸಕ್ಲಾ ಉಬ್ತಾಯ್

ವಿಶಾಲ್ ಸಾಗೊರಾಚಿಂ ಲ್ಹಾರಾಂ ಥಂಡ್ ವಾರ್‍ಯಾಕ್ ಧಲ್ತಾಯ್

ಲ್ಹಾರಾಂಚ್ಯಾ ವಯ್ರ್ ಉಬ್ತಾನಾ ಮತಿಕ್ ಸಂತೊಸ್ ಲಾಭ್ತಾ

ಗಾಂವ್ಚಾ ಪೊರಾಂಚಿ ದೀಷ್ಟ್ ಸೊಂರ್‍ಗ್ಯಾ ತುಕಾ ಚೊಯ್ತಾ

ಸುಂಕಾಣ್ ತಾಚೆಂ ಮ್ಹಜ್ಯಾ ಹಾತಾಂತ್ ಧಲ್ತಾ

ಸುತ್ ತುಟ್ತಚ್ ಪಯ್ಸ್ ಪಯ್ಸ್ ಧಾಂವ್ತಾ

ತುಕಾ ಆಪ್ಣಾ ಸಂಗಿಂ ವ್ಹಡ್ಲೆಂ

ತುಂವೆಂ ಯೆಂವ್ಚ್ಯಾಕ್ ನೆಗಾರ್ ಕೆಲೆಂ

ಬಳಾನ್ ತುಕಾ ಲಾಗಿಂ ಹಾಡ್ಲೆಂ

ತುಂವೆಂ ವಳೂ ಮೆಟಾಂ ಕಾಡ್ಲಿಂ

ನಶೀಬಾನ್ ತುಕಾ ಸಾಂಗಾತ್ ದಿಲೊ

ಸುತಾನ್ ಆಪ್ಣಾಕ್ ಮೊಡುನ್ ಭಾಲೊ

ಅರ್ಧೆಂ ಸುತ್ ತುಜ್ಯಾ ಆಂಗಾರ್

ಅರ್ಧೆಂ ಸುತ್ ಮ್ಹಜ್ಯಾ ಮಸ್ತಕಾರ್

ದರ್ಯಾ ವಾಟೆರ್ ಉಬೊನ್ ಗೆಲೊ

ಸುರ್‍ಯಾ ಸಂಗಿಂ ದರ್ಯಾಂತ್ ಬುಡ್ಲೊ

- ಪ್ರೇಮ್ ಮೋರಸ್. [ಅಕ್ಟೊಬ್ರ್, 2020]